¹Во днех же сих, умножившымся учеником, бысть роптание еллинов ко евреом, яко презираемы бываху во вседневнем служении вдовицы их.

²Призвавше же дванадесять множество ученик, реша: не угодно есть нам, оставльшым слово Божие, служити трапезам:

³усмотрите убо, братие, мужы от вас свидетелствованы седмь, исполнены Духа свята и премудрости, ихже поставим над службою сею:

⁴мы же в молитве и служении слова пребудем.

⁵И угодно бысть слово сие пред всем народом: и избраша стефана, мужа исполнена веры и Духа свята, и филиппа, и прохора и никанора, и тимона и пармена, и николаа пришелца антиохийскаго,

⁶ихже поставиша пред апостолы: и помолившеся возложиша на ня руце.

⁷И слово Божие растяше, и множашеся число ученик во Иерусалиме зело: мног же народ священников послушаху веры.

⁸Стефан же исполнь веры и силы творяше знамения и чудеса велия в людех.

⁹Восташа же нецыи от сонма глаголемаго ливертинска и киринейска и александрска, и иже от киликии и асии, стязающеся со стефаном:

¹⁰и не можаху противустати премудрости и Духу, имже глаголаше.

¹¹Тогда подустиша мужы глаголющыя, яко слышахом его глаголюща глаголы хульныя на моисеа и на Бога.

¹²Сподвигоша же люди и старцы и книжники, и нападше восхитиша его и приведоша на сонмище,

¹³поставиша же свидетели ложны глаголющыя, яко человек сей не престает глаголы хульныя глаголя на место святое сие и закон:

¹⁴слышахом бо его глаголюща, яко Иисус назорей сей разорит место сие и изменит обычаи, яже предаде нам моисей.

¹⁵И воззревше нань вси седящии в сонмищи, видеша лице его яко лице ангела.