¹Рече же архиерей: аще убо сия тако суть?

²Он же рече: мужие братие и отцы, послушайте. Бог славы явися отцу нашему аврааму сущу в месопотамии, прежде даже не вселитися ему в харрань,

³и рече к нему: изыди от земли твоея и от рода твоего и от дому отца твоего, и прииди в землю, юже аще ти покажу.

⁴Тогда изшед от земли халдейския, вселися в харрань: и оттуду, по умертвии отца его, пресели его в землю сию, на нейже вы ныне живете,

⁵и не даде ему наследия в ней, ниже стопы ногу: и обеща дати ему ю во одержание и семени его по нем, не сущу ему чаду.

⁶глагола же сице Бог, яко будет семя его пришелцы в земли чуждей, и поработят е и озлобят лет четыреста.

⁷И языку, емуже поработают, сужду аз, рече Бог: и по сих изыдут и послужат ми на месте сем.

⁸И даде ему завет обрезания. И тако роди исаака и обреза его в день осмый: и исаак иакова, и иаков дванадесять патриарх.

⁹И патриарси позавидевше иосифу продаша его во египет: и бе Бог с ним,

¹⁰и изят его от всех скорбей его, и даде ему благодать и премудрость пред фараоном царем египетским: и постави его началника над египтом и над всем домом своим.

¹¹Прииде же глад на всю землю египетскую и ханааню и скорбь велия, и не обретаху сытости отцы наши.

¹²Слышав же иаков сущую пшеницу во египте, посла отцы нашя первее,

¹³и внегда второе (приидоша), познан бысть иосиф братии своей, и яве бысть фараону род иосифов.

¹⁴Послав же иосиф призва отца своего иакова и все сродство свое, седмьдесят и пять душ.

¹⁵Сниде же иаков во египет, и скончася сам и отцы наши:

¹⁶и принесени быша в сихем и положени быша во гробе, егоже купи авраам ценою сребра от сынов еммора сихемова.

¹⁷И якоже приближашеся время обетования, имже клятся Бог аврааму, возрастоша людие и умножишася во египте,

¹⁸дондеже наста царь ин (во египте), иже не знаше иосифа:

¹⁹сей зле умыслив о роде нашем, озлоби отцы нашя, уморити младенцы их и не оживити.

²⁰В неже время родися моисей и бе угоден Богови, иже питан бысть месяцы три в дому отца своего:

²¹извержена же его взят его дщи фараонова и воспита и себе в сына:

²²и наказан бысть моисей всей премудрости египетстей, бе же силен в словесех и делех.

²³Егда же исполняшеся ему лет четыредесятих время, взыде на сердце ему посетити братию свою сыны израилевы:

²⁴и видев некоего обидима, пособствова и сотвори отмщение обидимому, убив египтянина.

²⁵Мняше же разумети братиям своим, яко Бог рукою его даст им спасение: они же не разумеша.

²⁶Во утрий же день явися им тяжущымся и привлачаше их в примирение, рек: мужие, братия есте вы, вскую обидите друг друга?

²⁷Обидяй же ближняго отрину его, рек: кто тя постави князя и судию над нами?

²⁸еда убити мя ты хощеши, имже образом убил еси вчера египтянина?

²⁹Бежа же моисей о словеси сем и бысть пришлец в земли мадиамстей, идеже роди сына два.

³⁰И исполньшымся летом четыредесятим, явися ему в пустыни горы синайския ангел Господень в пламени огнене в купине:

³¹моисей же видев дивляшеся видению: приступающу же ему разумети, бысть глас Господень к нему:

³²аз Бог отец твоих, Бог авраамов и Бог исааков и Бог иаковль. Трепетен же быв моисей не смеяше смотрити.

³³Рече же ему Господь: изуй сапоги ногу твоею, место бо, на немже стоиши, земля свята есть:

³⁴видя видех озлобление людий моих, иже во египте, и стенание их услышах, и снидох изяти их: и ныне гряди, послю тя во египет.

³⁵Сего моисеа, егоже отринуша, рекше: кто тя постави началника и судию? сего Бог князя и избавителя посла рукою ангела явльшагося ему в купине:

³⁶сей изведе их, сотворь чудеса и знамения в земли египетстей и в чермнем мори, и в пустыни лет четыредесять.

³⁷Сей есть моисей рекий сыном израилевым: пророка вам воздвигнет Господь Бог ваш от братии вашея яко мене: того послушайте.

³⁸Сей есть бывый в Церкви в пустыни со ангелом, глаголавшим ему на горе синайстей, и со отцы нашими, иже прият словеса жива дати нам,

³⁹егоже не восхотеша послушати отцы наши, но отринуша и и обратишася сердцем своим во египет,

⁴⁰рекше аарону: сотвори нам боги, иже предидут пред нами, моисею бо сему, иже изведе нас от земли египетския, не вемы, что бысть ему.

⁴¹И сотвориша телца во дни оны, и принесоша жертву идолу, и веселяхуся в делех руку своею.

⁴²Отвратися же Бог и предаде их служити воем небесным, якоже писано есть в книзе пророк: еда заколения и жертвы принесосте ми лет четыредесять в пустыни, доме израилев?

⁴³И восприясте скинию молохову и звезду бога вашего ремфана, образы, яже сотвористе покланятися им: и преселю вы далее вавилона.

⁴⁴Сень свидения бяше отцем нашым в пустыни, якоже повеле глаголяй моисеови сотворити ю по образу, егоже виде:

⁴⁵юже и внесоша приемше отцы наши со иисусом во одержание языков, ихже изрину Бог от лица отец наших, даже до дний давида:

⁴⁶иже обрете благодать пред Богом и испроси обрести селение Богу иаковлю.

⁴⁷Соломон же созда ему храм.

⁴⁸Но вышний не в рукотворенных церквах живет, якоже пророк глаголет:

⁴⁹небо мне престол есть, земля же подножие ногама моима: кий храм созиждете ми, глаголет Господь, или кое место покоищу моему?

⁵⁰Не рука ли моя сотвори сия вся?

⁵¹Жестоковыйнии и необрезаннии сердцы и ушесы, вы присно Духу святому противитеся, якоже отцы ваши, тако и вы:

⁵²кого от пророк не изгнаша отцы ваши? и убиша предвозвестившыя о пришествии праведнаго, егоже вы ныне предателе и убийцы бысте,

⁵³иже приясте закон устроением ангелским и не сохранисте.

⁵⁴Слышаще же сия, распыхахуся сердцы своими и скрежетаху зубы нань.

⁵⁵Стефан же сый исполнь Духа свята, воззрев на небо, виде славу Божию и Иисуса стояща о десную Бога,

⁵⁶и рече: се, вижу небеса отверста и Сына Человеча о десную стояща Бога.

⁵⁷Возопивше же гласом велиим, затыкаху ушы свои и устремишася единодушно нань,

⁵⁸и изведше вне града, камением побиваху его: и свидетелие (снемше) ризы своя положиша при ногу юноши нарицаемаго савла,

⁵⁹и камением побиваху стефана, молящася и глаголюща: Господи Иисусе, приими дух мой.

⁶⁰Преклонь же колена, возопи гласом велиим: Господи, не постави им греха сего. И сия рек успе.