¹Понеже убо мнози начаша чинити повесть о извествованных в нас вещех,

²якоже предаша нам, иже исперва самовидцы и слуги бывшии словесе:

³изволися и мне последовавшу выше вся испытно, поряду писати тебе, державный феофиле,

⁴да разумееши, о нихже научился еси словесех утверждение.

⁵Бысть во дни ирода царя иудейска, иерей некий, именем захариа, от дневныя чреды авиани: и жена его от дщерей аароновех, и имя ей елисаветь.

⁶Беста же праведна оба пред Богом, ходяща во всех заповедех и оправданиих Господних безпорочна.

⁷И не бе има чада, понеже елисаветь бе неплоды, и оба заматоревша во днех своих беста.

⁸Бысть же служащу ему в чину чреды своея пред Богом,

⁹по обычаю священничества ключися ему покадити вшедшу в церковь Господню:

¹⁰и все множество людий бе молитву дея вне, в год фимиама:

¹¹явися же ему ангел Господень, стоя о десную олтаря кадилнаго:

¹²и смутися захариа видев, и страх нападе нань.

¹³Рече же к нему ангел: не бойся, захарие: зане услышана бысть молитва твоя, и жена твоя елисаветь родит сына тебе, и наречеши имя ему иоанн:

¹⁴и будет тебе радость и веселие, и мнози о рождестве его возрадуются:

¹⁵будет бо велий пред Господем: и вина и сикера не имать пити, и Духа святаго исполнится еще из чрева матере своея:

¹⁶и многих от сынов израилевых обратит ко Господу Богу их:

¹⁷и той предидет пред ним духом и силою илииною, обратити сердца отцем на чада, и противныя в мудрости праведных, уготовати Господеви люди совершены.

¹⁸И рече захариа ко ангелу: по чесому разумею сие? аз бо есмь стар, и жена моя заматоревши во днех своих.

¹⁹И отвещав ангел рече ему: аз есмь гавриил предстояй пред Богом, и послан есмь глаголати к тебе и благовестити тебе сия:

²⁰и се, будеши молчя и не могий проглаголати, до негоже дне будут сия: зане не веровал еси словесем моим, яже сбудутся во время свое.

²¹И беша людие ждуще захарию: и чудяхуся коснящу ему в церкви.

²²Изшед же не можаше глаголати к ним: и разумеша, яко видение виде в церкви: и той бе помавая им, и пребываше нем.

²³И бысть яко исполнишася дние службы его, иде в дом свой.

²⁴По сих же днех зачат елисаветь жена его, и таяшеся месяц пять, глаголющи:

²⁵яко тако мне сотвори Господь во дни, в няже призре отяти поношение мое в человецех.

²⁶В месяц же шестый послан бысть ангел гавриил от Бога во град галилейский, емуже имя назарет,

²⁷к Деве обрученней мужеви, емуже имя иосиф, от дому давидова: и имя Деве Мариамь.

²⁸И вшед к ней ангел рече: радуйся, благодатная: Господь с тобою: благословена ты в женах.

²⁹Она же видевши смутися о словеси его и помышляше, каково будет целование сие.

³⁰И рече ангел ей: не бойся, Мариамь: обрела бо еси благодать у Бога.

³¹И се зачнеши во чреве, и родиши сына, и наречеши имя ему Иисус:

³²сей будет велий, и Сын вышняго наречется: и даст ему Господь Бог престол давида отца его:

³³и воцарится в дому иаковли во веки, и Царствию его не будет конца.

³⁴Рече же Мариамь ко ангелу: како будет сие, идеже мужа не знаю?

³⁵И отвещав ангел рече ей: Дух святый найдет на тя, и сила вышняго осенит тя: темже и раждаемое свято наречется Сын Божий:

³⁶и се, елисаветь южика твоя, и та зачат сына в старости своей: и сей месяц шестый есть ей нарицаемей неплоды:

³⁷яко не изнеможет у Бога всяк глаголгол.

³⁸Рече же Мариамь: се, раба Господня: буди мне по глаголу твоему. И отиде от нея ангел.

³⁹Воставши же Мариамь во дни тыя, иде в горняя со тщанием, во град иудов:

⁴⁰и вниде в дом захариин и целова елисаветь.

⁴¹И бысть яко услыша елисаветь целование Мариино, взыграся младенец во чреве ея: и исполнися Духа свята елисаветь,

⁴²и возопи гласом велиим, и рече: благословена ты в женах, и благословен плод чрева твоего:

⁴³и откуду мне сие, да приидет Мати Господа моего ко мне?

⁴⁴се бо, яко бысть глас целования твоего во ушию моею, взыграся младенец радощами во чреве моем:

⁴⁵и блаженна веровавшая, яко будет совершение глаголголанным ей от Господа.

⁴⁶И рече Мариамь: величит душа моя Господа,

⁴⁷и возрадовася дух мой о Бозе спасе моем:

⁴⁸яко призре на смирение рабы своея: се бо, отныне ублажат мя вси роди:

⁴⁹яко сотвори мне величие сильный, и свято имя его:

⁵⁰и милость его в роды родов боящымся его:

⁵¹сотвори державу мышцею своею: расточи гордыя мыслию сердца их?

⁵²низложи сильныя со престол, и вознесе смиренныя:

⁵³алчущыя исполни благ и богатящыяся отпусти тщы:

⁵⁴восприят израиля отрока своего, помянути милости,

⁵⁵якоже глагола ко отцем нашым, аврааму и семени его до века.

⁵⁶Пребысть же Мариамь с нею яко три месяцы и возвратися в дом свой.

⁵⁷Елисавети же исполнися время родити ей, и роди сына.

⁵⁸И слышаша окрест живущии и ужики ея, яко возвеличил есть Господь милость свою с нею: и радовахуся с нею.

⁵⁹И бысть во осмый день, приидоша обрезати отроча, и нарицаху е именем отца его, захарию.

⁶⁰И отвещавши мати его рече: ни, но да наречется иоанн.

⁶¹И реша к ней, яко никтоже есть в родстве твоем, иже нарицается именем тем.

⁶²И помаваху отцу его, еже како бы хотел нарещи е.

⁶³И испрошь дщицу, написа, глаголя: иоанн будет имя ему. И чудяхуся вси.

⁶⁴Отверзошася же уста его абие и язык его, и глаголаше благословя Бога.

⁶⁵И бысть на всех страх живущих окрест их: и во всей стране иудейстей поведаеми бяху вси глаголи сии.

⁶⁶И положиша вси слышавшии в сердцы своем, глаголюще: что убо отроча сие будет? И рука Господня бе с ним.

⁶⁷И захариа отец его исполнися Духа свята, и пророчествова, глаголя:

⁶⁸благословен Господь Бог израилев, яко посети и сотвори избавление людем своим:

⁶⁹и воздвиже рог спасения нам, в дому давида отрока своего:

⁷⁰якоже глагола усты святых сущих от века пророк его,

⁷¹спасение от враг наших и из руки всех ненавидящих нас:

⁷²сотворити милость со отцы нашими и помянути завет святый свой,

⁷³клятву, еюже клятся ко аврааму отцу нашему, дати нам,

⁷⁴без страха, из руки враг наших избавльшымся,

⁷⁵служити ему преподобием и правдою пред ним вся дни живота нашего.

⁷⁶И ты, отроча, пророк вышняго наречешися: предидеши бо пред лицем Господним, уготовати пути его,

⁷⁷дати разум спасения людем его, во оставление грех их,

⁷⁸милосердия ради милости Бога нашего, в нихже посетил есть нас восток свыше,

⁷⁹просветити во тме и сени смертней седящыя, направити ноги нашя на путь мирен.

⁸⁰Отроча же растяше и крепляшеся духом: и бе в пустынех до дне явления своего ко израилю.