¹И бысть, егда сконча Иисус вся словеса сия, рече учеником своим:

²весте, яко по двою дню пасха будет, и Сын Человеческий предан будет на пропятие.

³Тогда собрашася архиерее и книжницы и старцы людстии во двор архиереов, глаголемаго каиафы,

⁴и совещаша, да Иисуса лестию имут и убиют:

⁵глаголаху же: но не в праздник, да не молва будет в людех.

⁶Иисусу же бывшу в вифании, в дому симона прокаженнаго,

⁷приступи к нему жена, сткляницу мира имущи многоценнаго, и возливаше на главу его возлежаща.

⁸Видевше же ученицы его негодоваша, глаголюще: чесо ради гибель сия (бысть)?

⁹можаше бо сие миро продано быти на мнозе и датися нищым.

¹⁰Разумев же Иисус рече им: что труждаете жену? дело бо добро содела о мне:

¹¹всегда бо нищыя имате с собою, мене же не всегда имате:

¹²возлиявши бо сия миро сие на тело мое, на погребение мя сотвори:

¹³аминь глаголю вам: идеже аще проповедано будет Евангелие сие во всем мире, речется и еже сотвори сия, в память ея.

¹⁴Тогда шед един от обоюнадесяте, глаголемый иуда искариотский, ко архиереом,

¹⁵рече: что ми хощете дати, и аз вам предам его? Они же поставиша ему тридесять сребреник:

¹⁶и оттоле искаше удобна времене, да его предаст.

¹⁷В первый же день опресночный приступиша ученицы ко Иисусу, глаголюще ему: где хощеши уготоваем ти ясти пасху?

¹⁸Он же рече: идите во град ко онсице, и рцыте ему: учитель глаголет: время мое близ есть: у тебе сотворю пасху со ученики моими.

¹⁹И сотвориша ученицы, якоже повеле им Иисус, и уготоваша пасху.

²⁰Вечеру же бывшу, возлежаше со обеманадесяте ученикома:

²¹и ядущым им, рече: аминь глаголю вам, яко един от вас предаст мя.

²²И скорбяще зело, начаша глаголати ему един кийждо их: еда аз есмь, Господи?

²³Он же отвещав рече: омочивый со мною в солило руку, той мя предаст:

²⁴Сын убо Человеческий идет, якоже есть писано о нем: горе же человеку тому, имже Сын Человеческий предастся: добро бы было ему, аще не бы родился человек той.

²⁵Отвещав же иуда предаяй его, рече: еда аз есмь, равви? глагола ему: ты рекл еси.

²⁶Ядущым же им, приемь Иисус хлеб и благословив преломи, и даяше учеником, и рече: приимите, ядите: сие есть тело мое.

²⁷И приемь чашу и хвалу воздав, даде им, глаголя: пийте от нея вси:

²⁸сия бо есть кровь моя, новаго завета, яже за многия изливаема во оставление грехов.

²⁹глаголю же вам, яко не имам пити отныне от сего плода лознаго, до дне того, егда е пию с вами ново во Царствии Отца моего.

³⁰И воспевше изыдоша в гору елеонску.

³¹Тогда глагола им Иисус: вси вы соблазнитеся о мне в нощь сию: писано бо есть: поражу пастыря, и разыдутся овцы стада:

³²по воскресении же моем варяю вы в галилеи.

³³Отвещав же петр рече ему: аще и вси соблазнятся о тебе, аз никогдаже соблажнюся.

³⁴Рече ему Иисус: аминь глаголю тебе, яко в сию нощь, прежде даже алектор не возгласит, трикраты отвержешися мене.

³⁵Глагола ему петр: аще ми есть и умрети с тобою, не отвергуся тебе. Такожде и вси ученицы реша.

³⁶Тогда прииде с ними Иисус в весь, нарицаемую гефсиманиа, и глагола учеником: седите ту, дондеже шед помолюся тамо.

³⁷И поемь петра и оба сына зеведеова, начат скорбети и тужити.

³⁸Тогда глагола им Иисус: прискорбна есть душа моя до смерти: пождите зде и бдите со мною.

³⁹И прешед мало, паде на лицы своем, моляся и глаголя: Отче мой, аще возможно есть, да мимоидет от мене чаша сия: обаче не якоже аз хощу, но якоже ты.

⁴⁰И пришед ко учеником, и обрете их спящих, и глагола петрови: тако ли не возмогосте единаго часа побдети со мною?

⁴¹бдите и молитеся, да не внидете в напасть: дух убо бодр, плоть же немощна.

⁴²Паки вторицею шед помолися, глаголя: Отче мой, аще не может сия чаша мимоити от мене, аще не пию ея, буди воля твоя.

⁴³И пришед обрете их паки спящих: беста бо им очи отяготене.

⁴⁴И оставль их, шед паки, помолися третицею, тожде слово рек.

⁴⁵Тогда прииде ко учеником своим и глагола им: спите прочее и почивайте: се, приближися час, и Сын Человеческий предается в руки грешников:

⁴⁶востаните, идем: се, приближися предаяй мя.

⁴⁷И еще ему глаголющу, се, иуда, един от обоюнадесяте, прииде, и с ним народ мног со оружием и дрекольми, от архиерей и старец людских.

⁴⁸Предаяй же его даде им знамение, глаголя: егоже аще лобжу, той есть: имите его.

⁴⁹И абие приступль ко Иисусови, рече: радуйся, равви. И облобыза его.

⁵⁰Иисус же рече ему: друже, (твори,) на неже еси пришел. Тогда приступльше возложиша руце на Иисуса и яша его.

⁵¹И се, един от сущих со Иисусом, простер руку, извлече нож свой, и удари раба архиереова, и уреза ему ухо.

⁵²Тогда глагола ему Иисус: возврати нож твой в место его: вси бо приемшии нож ножем погибнут:

⁵³или мнится ти, яко не могу ныне умолити Отца моего, и представит ми вящше неже дванадесяте легеона ангел?

⁵⁴како убо сбудутся писания, яко тако подобает быти?

⁵⁵В той час рече Иисус народом: яко на разбойника ли изыдосте со оружием и дрекольми яти мя? по вся дни при вас седех учя в церкви, и не ясте мене.

⁵⁶Се же все бысть, да сбудутся писания пророческая. Тогда ученицы вси оставльше его бежаша.

⁵⁷(Воини) же емше Иисуса ведоша к каиафе архиереови, идеже книжницы и старцы собрашася.

⁵⁸Петр же идяше по нем издалеча до двора архиереова: и вшед внутрь, седяше со слугами, видети кончину.

⁵⁹Архиерее же и старцы и сонм весь искаху лжесвидетелства на Иисуса, яко да убиют его,

⁶⁰и не обретаху: и многим лжесвидетелем приступльшым, не обретоша. Послежде же приступивша два лжесвидетеля,

⁶¹реста: сей рече: могу разорити церковь Божию и треми денми создати ю.

⁶²И востав архиерей рече ему: ничесоже ли отвещаваеши, что сии на тя свидетелствуют?

⁶³Иисус же молчаше. И отвещав архиерей рече ему: заклинаю тя Богом живым, да речеши нам, аще ты еси Христос, Сын Божий?

⁶⁴глагола ему Иисус: ты рекл еси: обаче глаголю вам: отселе узрите Сына Человеческаго седяща одесную силы и грядуща на облацех небесных.

⁶⁵Тогда архиерей растерза ризы своя, глаголя, яко хулу глагола: что еще требуем свидетелей? се, ныне слышасте хулу его:

⁶⁶что вам мнится? Они же отвещавше реша: повинен есть смерти.

⁶⁷Тогда заплеваша лице его и пакости ему деяху: овии же за ланиту удариша,

⁶⁸глаголюще: прорцы нам, Христе, кто есть ударей тя?

⁶⁹Петр же вне седяше во дворе. И приступи к нему едина рабыня, глаголющи: и ты был еси со Иисусом галилейским.

⁷⁰Он же отвержеся пред всеми, глаголя: не вем, что глаголеши.

⁷¹Изшедшу же ему ко вратом, узре его другая, и глагола сущым тамо: и сей бе со Иисусом назореом.

⁷²И паки отвержеся с клятвою, яко не знаю Человека.

⁷³Помале же приступивше стоящии, реша петрови: воистинну и ты от них еси, ибо беседа твоя яве тя творит.

⁷⁴Тогда начат ротитися и клятися, яко не знаю Человека. И абие петель возгласи.

⁷⁵И помяну петр глаголгол Иисусов, реченный ему, яко прежде даже петель не возгласит, трикраты отвержешися мене. И изшед вон плакася горько.