¹павел и тимофей, раби Иисус Христовы, всем святым о Христе Иисусе сущым в филиппех, с епископы и диаконы:

²благодать вам и мир от Бога Отца нашего и Господа Иисуса Христа.

³Благодарю Бога моего о всей памяти вашей,

⁴всегда во всяцей молитве моей за всех вас с радостию молитву мою творя,

⁵о общении вашем в благовествование от перваго дне даже и доныне,

⁶надеявся на сие истое, яко начный дело благо в вас совершит е даже до дне Иисус Христова:

⁷якоже есть праведно мне сие мудрствовати о всех вас, за еже имети ми в сердцы вас, во узах моих и во ответе и извещении благовестия, соHбщников мне благодати всех вас сущих.

⁸Свидетель бо ми есть Бог, яко люблю всех вас по милости Иисус Христове:

⁹и о сем молюся, да любовь ваша еще паче и паче избыточествует в разуме и во всяцем чувствии,

¹⁰во еже искушати вам лучшая, да будете чисти и непреткновенни в день Христов,

¹¹исполнени плодов правды Иисус Христом, в славу и похвалу Божию.

¹²Разумети же хощу вам, братие, яко яже о мне паче во успех благовествования приидоша,

¹³яко узы моя явленны о Христе быша во всем судищи и в прочих всех,

¹⁴и множайшии братия о Господе, надеявшиися о узах моих, паче дерзают без страха слово Божие глаголати.

¹⁵Нецыи убо по зависти и ревности, друзии же и за благоволение Христа проповедают:

¹⁶ови убо от рвения Христа возвещают нечисте, мняще печаль нанести узам моим:

¹⁷ови же от любве, ведяще, яко во ответе благовествования лежу.

¹⁸Что убо? Обаче всяцем образом, аще виною, аще истиною Христос проповедаемь есть, и о сем радуюся, но и возрадуюся:

¹⁹вем бо, яко сие сбудется ми во спасение вашею молитвою и подаянием духа Иисус Христова,

²⁰по чаянию и упованию моему, яко ни о единем же постыжуся, но во всяцем дерзновении, якоже всегда, и ныне возвеличится Христос в теле моем, аще животом, аще ли смертию.

²¹Мне бо еже жити, Христос, и еже умрети, приобретение (есть).

²²Аще же, еже жити (ми) телом, сие мне плод дела: и что изволю, не вем.

²³Обдержимь же есмь от обою, желание имый разрешитися и со Христом быти, много паче лучше:

²⁴а еже пребывати во плоти, нужнейше (есть) вас ради.

²⁵И сие известне вем, яко буду и спребуду вам всем в ваш успех и радость веры,

²⁶яко да похвала ваша избыточествует о Христе Иисусе во мне, моим пришествием паки к вам.

²⁷Точию достойне благовествованию Христову жителствуйте, да аще пришед и видев вас, аще и не сый у вас, услышу яже о вас, яко (истиною) стоите во единем дусе, и единодушне сподвизающеся по вере благовествования (волею),

²⁸и не колеблющеся ни о единем же от сопротивных: еже тем убо есть явление погибели, вам же спасения. И сие от Бога:

²⁹яко вам даровася, еже о Христе, не токмо еже в него веровати, но и еже по нем страдати,

³⁰тойже подвиг имуще, яков же во мне видесте и ныне слышите о мне.