Mungu ataadhibu Ashuru na Israeli

¹Kauli ya Mungu dhidi ya Damasko.[#17:1-3 Taz Yer 49:23-27; Amo 1:3-5; Zek 9:1]

“Damasko utakoma kuwa mji;

utakuwa rundo la magofu.

²Mitaa yake imeachwa mahame milele.

Itakuwa makao ya makundi ya wanyama,

wala hakuna mtu atakayewatisha.

³Ngome za kujihami za Efraimu zitatoweka,

na utawala wa Damasko utakwisha.

Waashuru ambao watabaki hai,

watakuwa na fedheha kama wazawa wa Israeli.

Mimi Mwenyezi-Mungu wa majeshi nimenena.

Watakaosalia katika Israeli

⁴“Siku hiyo, fahari ya Yakobo itaporomoshwa,

na unono wake ataupoteza.

⁵Atakwisha kama shamba lililovunwa,

atafanyiwa kama mvunaji avunavyo nafaka,

atakuwa kama shamba lililovunwa bondeni Refaimu.

⁶Atabakiziwa wachache kama vile baada ya zeituni:

Zeituni mbili, tatu katika tawi la juu;

nne, tano katika matawi ya mti uzaao sana.

Mimi Mwenyezi-Mungu, Mungu wa Israeli, nimenena.”

Mwisho wa kuabudu sanamu

⁷Siku hiyo, watu watamwangalia Muumba wao, na kuelekeza macho yao kwa huyo Mtakatifu wa Israeli.

⁸Hawatazielekea tena madhabahu ambazo ni kazi za mikono yao wenyewe, wala kuzitazamia tena kazi za mikono yao wenyewe, yaani sanamu za mungu Ashera na madhabahu za kufukizia ubani.

⁹Siku hiyo miji yao imara itaachwa mahame, kama miji ambayo Wahivi na Waamori waliihama walipokuwa wakiwakimbia wazawa wa Israeli. Kila kitu kitakuwa uharibifu.[#17:9 Kadiri ya Septuaginta; Kiebrania: Kama magofu ya msitu na kilele cha mlima.]

¹⁰Maana wewe Israeli umemsahau Mungu aliyekuokoa,

hukumkumbuka Mwamba wa usalama wako.

Kwa hiyo, hata mkipanda mimea ya Baali,

na kuiweka wakfu kwa mungu wa kigeni;

¹¹hata mkiifanya ikue siku hiyohiyo mliyoipanda

na kuifanya ichanue asubuhi hiyohiyo,

mavuno yenu yatatoweka

siku hiyo ya balaa na maumivu yasiyoponyeka.

Mataifa adui yanashindwa

¹²Lo! Ngurumo ya watu wengi!

Wananguruma kama bahari.

Lo! Mlio wa watu wa mataifa!

Yanatoa mlio kama wa maji mengi.

¹³Mataifa yananguruma kama ngurumo ya maji mengi,

lakini Mungu atayakemea, nayo yatakimbilia mbali.

Yatafukuzwa kama makapi mlimani mbele ya upepo;

kama vumbi litimuliwalo na kimbunga.

¹⁴Wakati wa jioni yanaleta hofu kuu,

lakini kabla ya asubuhi yametoweka!

Hilo ndilo litakalowapata wanaonyakua mali yetu,

ndilo litakalowapata wanaotupora.