¹Nani aliyeamini mambo tuliyosikia?[#53:1 Taz Yoh 12:38; Rom 10:16]

Nani aliyetambua kuwa mkono wa Mwenyezi-Mungu ulihusika?

²Maana, mbele yake Mwenyezi-Mungu,

mtumishi wake alikua kama mti mchanga,

kama mzizi katika nchi kavu.

Hakuwa na umbo wala sura ya kutupendeza,

wala hakuwa na uzuri wowote wa kutuvutia.

³Alidharauliwa na kukataliwa na watu,

alikuwa mtu wa uchungu na huzuni.

Alikuwa kama mtu kinyaa kwa watu;

alidharauliwa na tukamwona si kitu.

⁴Hata hivyo alivumilia majonzi yetu,[#53:4 Taz Mat 8:17]

na kubeba huzuni zetu.

Sisi tulifikiri amepata adhabu,

amepigwa na Mungu na kuteswa.

⁵Lakini alijeruhiwa kwa sababu ya dhambi zetu,[#53:5 Taz 1Pet 2:24]

aliumizwa kwa sababu ya maovu yetu.

Kwa kuadhibiwa kwake sisi tumepata uhai;

kwa kupigwa kwake sisi tumepona.

⁶Sisi sote tumepotea kama kondoo,[#53:6 Taz 1Pet 2:25]

kila mmoja wetu ameelekea njia yake.

Lakini Mwenyezi-Mungu alimtwika adhabu,

ambayo sisi wenyewe tuliistahili.

⁷Alidhulumiwa na kuteswa,[#53:7 Taz Ufu 5:6]

lakini alivumilia kwa unyenyekevu,

bila kutoa sauti hata kidogo.

Alikuwa kama mwanakondoo apelekwaye machinjoni,

kama kondoo akaavyo kimya anapokatwa manyoya.

Hakutoa sauti hata kidogo.

⁸Alidhulumiwa, akahukumiwa na kupelekwa kuuawa;

na hakuna mtu aliyejali yanayompata.

Alifukuzwa kutoka nchi ya walio hai,

kwa sababu ya makosa ya watu wangu.

⁹Walimzika pamoja na wahalifu;[#53:9 Taz 1Pet 2:22]

katika kifo aliwekwa pamoja na matajiri,

ingawa hakutenda ukatili wowote,

wala hakusema neno lolote la udanganyifu.

¹⁰Mwenyezi-Mungu alipenda kumwumiza

na kumweka katika huzuni.

Alijitoa mhanga kwa ajili ya kuondoa dhambi.

Mtumishi wa Mungu atakuwa na wazawa;

ataishi maisha marefu.

Yeye ndiye atakayetimiza mpango wa Mwenyezi-Mungu.

¹¹Mungu asema:

“Baada ya kutaabika sana,

mtumishi wangu atafurahi.

Kwa kuwajibika kwake kikamilifu,

atatosheka na matokeo hayo.

Kwa maarifa yake mtumishi wangu mwadilifu

atawafanya wengi wawe waadilifu

Yeye atazibeba dhambi zao.

¹²Kwa hiyo, nitamweka katika cheo cha wakuu,

atagawa nyara pamoja na wenye nguvu;

kwa kuwa alijitolea mwenyewe kufa,

akawekwa katika kundi moja na wakosefu,

alizibeba dhambi za watu wengi,

akawaombea msamaha hao wakosefu.”