¹Laiti ungalizipasua mbingu ukashuka chini,

milima ikakuona na kutetemeka kwa hofu!

²Ingeteketea kama moto uchomavyo kichaka,

kama vile moto uchemshavyo maji.

Njoo upate kuwajulisha maadui zako jina lako

nayo mataifa yatetemeke kwa kuwako kwako!

³Wakati ulipotenda maajabu ambayo hatukutazamia,

ulishuka chini nayo milima ikatetemeka ilipokuona.

⁴Tangu kale hakuna aliyepata kuona[#64:4 Taz 1Kor 2:9]

wala kusikia kwa masikio yake;

hakuna aliyepata kumwona Mungu aliye kama wewe

atendaye mambo kwa ajili ya wale wanaomtegemea!

⁵Wewe waja kuwasaidia watendao haki kwa furaha,

wanaokukumbuka na kuzingatia njia zako.

Ulitukasirikia tulipokuwa wenye dhambi;

sisi tumeasi kwa muda mrefu.

⁶Sote tumekuwa kama watu walio najisi;

matendo yetu yote mema ni kama nguo chafu.

Sote tunanyauka kama majani,

uovu wetu watupeperusha kama upepo.

⁷Hakuna hata mmoja anayekuja kukuomba;

hakuna anayejishughulisha kukutafuta.

Wewe unauficha uso wako mbali nasi,

umetuacha tukumbwe na maovu yetu.

⁸Hata hivyo, ee Mwenyezi-Mungu, wewe ni Baba yetu.

Sisi ni kama udongo, wewe ni mfinyanzi.

Sisi sote ni kazi ya mikono yako.

⁹Usitukasirikie mno, ee Mwenyezi-Mungu,

usiukumbuke uovu wetu daima!

Ukumbuke kwamba sisi sote ni watu wako!

¹⁰Miji yako mitakatifu imekuwa nyika;

Siyoni umekuwa mahame,

Yerusalemu umekuwa uharibifu.

¹¹Nyumba yetu takatifu na nzuri,

ambamo wazee wetu walikusifu,

imeteketezwa kwa moto.

Mahali petu pote pazuri pamekuwa magofu.

¹²Je, kwa hayo yote utajizuia usifanye kitu?

Je, utaendelea kunyamaza tu, ee Mwenyezi-Mungu,

na kututesa kupita kiasi?