Shukrani kwa kuokolewa kifoni

¹Nampenda Mwenyezi-Mungu,

kwa maana anisikia,

maana amesikia kilio cha ombi langu.

²Yeye amenitegea sikio,

hivyo nitamwomba muda wote niishio.

³Hatari ya kifo ilinizunguka,

vitisho vya kaburi vilinivamia;

nilijawa na mahangaiko na majonzi.

⁴Kisha nikamlilia Mwenyezi-Mungu:

“Ee Mwenyezi-Mungu, tafadhali unisalimishe!”

⁵Mwenyezi-Mungu amejaa wema na uaminifu;

Mungu wetu ni mwenye huruma.

⁶Mwenyezi-Mungu huwalinda wanyofu;

nilipokuwa nimekandamizwa aliniokoa.

⁷Uwe na utulivu mkuu, ee nafsi yangu,

maana Mwenyezi-Mungu amenitendea mema.

⁸Ameniokoa kifoni na kufuta machozi yangu;

akanilinda nisije nikaanguka.

⁹Nitatembea mbele yake Mwenyezi-Mungu,

katika nchi ya watu walio hai.

¹⁰Nilikuwa na imani hata niliposema:[#Taz 2Kor 4:13]

“Mimi nimetaabika mno.”

¹¹Hata nilisema kwa hofu yangu:

“Binadamu wote hawaaminiki!”

¹²Nimrudishie nini Mwenyezi-Mungu,

kwa ukarimu wote alionitendea?

¹³Nitamtolea tambiko ya divai kwa kunikomboa,

nitaomba kwa jina lake Mwenyezi-Mungu.

¹⁴Nitamtimizia Mwenyezi-Mungu nadhiri zangu,

mbele ya watu wake wote.

¹⁵Kifo cha waaminifu wake Mwenyezi-Mungu

si jambo dogo mbele yake.

¹⁶Ee Mwenyezi-Mungu, mimi ni mtumishi wako;

ni mtumishi wako, mtoto wa mjakazi wako;

umenifungulia vifungo vyangu.

¹⁷Nitakutolea tambiko za shukrani,

na kukupa heshima zangu.

¹⁸Nitakutimizia ahadi zangu, ee Mwenyezi-Mungu

mbele ya watu wako wote,

¹⁹waliokusanyika hekaluni mwako,

katikati ya Yerusalemu.

Msifuni Mwenyezi-Mungu!