Sifa kwa wema wa Mungu

¹Nitamtukuza Mwenyezi-Mungu nyakati zote,

sitaacha kamwe kuzitamka sifa zake.

²Mimi nitaona fahari juu ya Mwenyezi-Mungu,

wanyonge wasikie na kufurahi.

³Mtukuzeni Mwenyezi-Mungu pamoja nami,

sote pamoja tulisifu jina lake.

⁴Nilimwomba Mwenyezi-Mungu naye akanijibu,

na kuniondoa katika hofu zangu zote.

⁵Mgeukieni Mungu mpate kufurahi;

nanyi hamtaaibishwa kamwe.

⁶Maskini alimlilia Mwenyezi-Mungu, naye akamsikia,

na kumwokoa katika taabu zake zote.

⁷Malaika wa Mwenyezi-Mungu huwalinda wote wamchao,

na kuwaokoa katika hatari.

⁸Jaribuni mwone Mwenyezi-Mungu alivyo mwema.[#Taz 1Pet 2:3]

Heri mtu anayekimbilia usalama kwake.

⁹Mcheni Mwenyezi-Mungu enyi watakatifu wake;

maana wenye kumcha hawatindikiwi na kitu.

¹⁰Hata wanasimba hutindikiwa na kuona njaa;

lakini wanaomtafuta Mwenyezi-Mungu hawakosi chochote chema.

¹¹Njoni enyi vijana mkanisikilize,

nami nitawafundisha kumcha Mwenyezi-Mungu.

¹²Je, watamani kufurahia maisha,[#Taz 1Pet 3:10-12]

kuishi maisha marefu na kufurahia mema?

¹³Basi, acha kusema mabaya,

na kuepa kusema uongo.

¹⁴Jiepushe na uovu, utende mema;

utafute amani na kuizingatia.

¹⁵Mwenyezi-Mungu huwaangalia waadilifu,

na kusikiliza malalamiko yao;

¹⁶lakini huwapinga watu watendao maovu,

awafutilie mbali kutoka duniani.

¹⁷Waadilifu wakimlilia Mwenyezi-Mungu yeye huwasikia,

na kuwaokoa katika taabu zao zote.

¹⁸Mwenyezi-Mungu yu karibu na waliokufa moyo;

huwaokoa wote waliokata tamaa kabisa.

¹⁹Mateso ya mwadilifu ni mengi,

lakini Mwenyezi-Mungu humwokoa kutoka yote.

²⁰Huvilinda viungo vya mwili wake wote,[#Taz Yoh 19:36]

hakuna hata mfupa wake mmoja utakaovunjwa.

²¹Ubaya huwaletea waovu kifo;

wanaowachukia waadilifu wataadhibiwa.

²²Mwenyezi-Mungu huokoa maisha ya watumishi wake,

wote wanaomkimbilia hawataadhibiwa.