Uovu wa binadamu

¹Dhambi huongea na mtu mwovu,[#Taz Rom 3:18]

ndani kabisa moyoni mwake;

jambo la kumcha Mungu halimo kabisa kwake.

²Mwovu hujipendelea mwenyewe,

hufikiri uovu wake hautagunduliwa na kulaaniwa.

³Kila asemacho ni uovu na uongo;

ameacha kutumia hekima na kutenda mema.

⁴Alalapo huwaza kutenda maovu,

hujiweka katika njia isiyo njema,

wala haachani na uovu.

Wema wa Mungu

⁵Fadhili zako ee Mwenyezi-Mungu zaenea hata mbinguni;

uaminifu wako wafika mawinguni.

⁶Uadilifu wako ni kama milima mikubwa,

hukumu zako ni kama vilindi vya bahari.

Wewe, ee Mwenyezi-Mungu, wawalinda wanadamu na wanyama

⁷Jinsi gani zilivyo bora fadhili zako!

Wanadamu hukimbilia kivulini mwa mabawa yako.

⁸Wawashibisha kwa utajiri wa nyumba yako;

wawanywesha kutoka mto wa wema wako.

⁹Wewe ndiwe asili ya uhai;

kwa mwanga wako twaona mwanga.

¹⁰Uendelee kuwafadhili wale wanaokutambua;

uzidi kuwa mwema kwa wanyofu wa moyo.

¹¹Usikubali wenye majivuno wanivamie,

wala watu waovu wanikimbize.

¹²Kumbe watendao maovu wameanguka;

wameangushwa chini, hawawezi kuinuka.