Kuliombea fanaka taifa

¹Ee Mwenyezi-Mungu,

umeifadhili nchi yako;

umemjalia Yakobo bahati nzuri tena.

²Umewasamehe watu wako kosa lao;

umezifuta dhambi zao zote.

³Umeizuia ghadhabu yako yote;

umeiacha hasira yako kali.

⁴Uturekebishe tena, ee Mungu mwokozi wetu;

uiondoe chuki uliyo nayo juu yetu.

⁵Je, utatukasirikia hata milele?

Je, utadumisha ghadhabu yako kwa vizazi vyote?

⁶Je, hutatujalia tena maisha mapya,

ili watu wako wafurahi kwa sababu yako?

⁷Utuoneshe, fadhili zako, ee Mwenyezi-Mungu,

utujalie wokovu wako.

⁸Hebu nisikie anachosema Mwenyezi-Mungu;

maana anaahidi kuwapa watu wake amani,

watu wake mwenyewe wasiporudia upuuzi wao

⁹Hakika yu tayari kuwaokoa wanaomheshimu,

na utukufu wake utadumu nchini mwetu.

¹⁰Fadhili zake na uaminifu vitakutana;

uadilifu na amani vitaungana.

¹¹Uaminifu utachipuka katika nchi;

uadilifu utashuka toka mbinguni.

¹²Naam, Mwenyezi-Mungu atatuletea fanaka,

na nchi yetu itatoa mazao yake mengi.

¹³Uadilifu utamtangulia Mungu

na kumtayarishia njia yake.