Moabu inaomba msaada kutoka Yerusalemu

¹Pelekeni wanakondoo kwa mtawala wa nchi,

pelekeni kutoka Sela jangwani mpaka mlimani Siyoni.

²Kama ndege wanavyohangaika na kurukaruka,

wakiwa wamefukuzwa kutoka viota vyao,

ndivyo walivyo mabinti wa Moabu

kwenye vivuko vya Arnoni.

³Wamoabu wanawaambia watu wa Yuda,

“Tupeni mwongozo, tuamulieni.

Enezeni ulinzi wenu juu yetu,

kama vile usiku uenezavyo kivuli chake.

Tuficheni sisi wakimbizi;

msitusaliti sisi tuliofukuzwa.

⁴Wakimbizi wa Moabu waishi kwenu,

muwe kimbilio lao mbali na mwangamizi.”

Mdhalimu atakapokuwa ametoweka,

udhalimu utakapokuwa umekoma,

na wavamizi kutoweka nchini,

⁵utawala adili utazinduliwa katika maskani ya Daudi,

mtawala apendaye kutenda haki,

na mwepesi wa kufanya yaliyo sawa;

atatawala humo kwa uaminifu.

⁶Watu wa Yuda wanasema hivi:

“Tumesikia juu ya kiburi cha Moabu,

tunajua jinsi alivyojivuna mno;

tumesikia juu ya majivuno, kiburi na ufidhuli wake;

lakini majivuno yake hayo ni bure.”

⁷Sasa Wamoabu wanalia;

wote wanaomboleza juu ya nchi yao.

Ombolezeni kwa pigo hilo kubwa,

na juu ya maandazi ya zabibu za Kir-haresethi.

⁸Mashamba ya Heshboni yamefifia.

Kadhalika na zabibu za Sibma

ambazo ziliwalevya wakuu wa mataifa

zikafika Yazeri na kusambaa hata jangwani,

chipukizi zake zikafika hata ngambo ya bahari.

⁹Kwa hiyo ninalia pamoja na Yazeri

kwa ajili ya mizabibu ya Sibma.

Machozi yananitoka kwa ajili yenu,

enyi miji ya Heshboni na Eleale;

maana vigelegele vya mavuno ya matunda,

vigelegele vya mavuno ya nafaka vimetoweka.

¹⁰Furaha na shangwe zimetoweka katika shamba la rutuba.

Kwenye mizabibu hakuna kuimba tena,

wala kupiga vigelegele.

Hakuna tena kukamua zabibu shinikizoni,

sauti za furaha za mavuno zimekomeshwa.

¹¹Hivyo, nafsi yangu yalilia Moabu kama kinubi,

na moyo wangu kwa ajili ya mji wa Kir-heresi.

¹²Watu wa Moabu wanapojitokeza kuabudu mungu wao,

wanapojichosha huko juu mahali pa ibada,

wanapokwenda mahali pao patakatifu kusali,

hawatakubaliwa.

¹³Hili ndilo jambo alilosema Mwenyezi-Mungu wakati uliopita kuhusu Moabu.

¹⁴Lakini sasa Mwenyezi-Mungu asema hivi: “Baada ya miaka mitatu kamili, ikihesabiwa kama mfanyakazi anavyohesabu siku zake, fahari ya Moabu itakwisha. Ingawa watu wake ni wengi, watakaobaki hai watakuwa wachache na wanyonge.”