Wimbo wa ushindi

¹Siku ile watu wataimba wimbo huu katika nchi ya Yuda:

Sisi tuna mji imara:

Mungu anatulinda kwa kuta na ngome.

²Fungueni malango ya mji,

taifa aminifu liingie;

taifa litendalo mambo ya haki.

³Ee Mungu, wawaweka katika amani walio thabiti,

wawaweka katika amani kwa kuwa wanakutegemea.

⁴Mtumaini Mwenyezi-Mungu siku zote

kwa maana yeye ni mwamba wa usalama milele.

⁵Amewaporomosha waliokaa pande za juu,

mji maarufu ameuangusha mpaka chini,

ameutupa mpaka mavumbini.

⁶Sasa mji huo unakanyagwakanyagwa

kwa miguu ya watu maskini na fukara.

⁷Njia ya watu wanyofu ni rahisi;

ewe Mungu mwadilifu, wasawazisha njia yao.

⁸Katika njia ya maamuzi yako

tunakungojea ee Mwenyezi-Mungu;

kulikumbuka jina lako ndiyo tamaa yetu.

⁹Moyo wangu wakutamani usiku kucha,

nafsi yangu yakutafuta kwa moyo.

Utakapoihukumu dunia,

watu wote ulimwenguni watajifunza haki.

¹⁰Lakini waovu hata wakipewa fadhili,

hawawezi kujifunza kutenda haki.

Hata katika nchi ya wanyofu,

wao bado wanatenda maovu,

wala hawajali ukuu wako wewe Mwenyezi-Mungu.

¹¹Ee Mwenyezi-Mungu umeinua mkono kuwaadhibu,[#26:11 Taz Ebr 10:27]

lakini maadui zako hawauoni.

Waoneshe uwapendavyo watu wako nao wataaibika.

Moto wa hasira yako uwateketeze maadui zako!

¹²Wewe, ee Mwenyezi-Mungu, umetupatia amani;

umefanikisha shughuli zetu zote.

¹³Ee Mwenyezi-Mungu, Mungu wetu,

tulipata kutawaliwa na watu wengine na miungu yao,

lakini twakiri wewe pekee kuwa Mungu wetu.

¹⁴Watu hao wamekufa, wala hawataishi tena;

wamekuwa mizimu, wala hawatafufuka.

Maana wewe umewaadhibu na kuwaangamiza,

hakuna atakayeweza kuwakumbuka tena.

¹⁵Umelikuza taifa letu, ee Mwenyezi-Mungu,

naam, umelizidisha taifa letu.

Umeipanua mipaka yote ya nchi,

kwa hiyo wewe watukuka.

¹⁶Ee Mwenyezi-Mungu, walipotaabika walikutafuta,

walikuomba msaada ulipowaadhibu.

¹⁷Kama vile mama mjamzito anayejifungua

hulia na kugaagaa kwa uchungu,

ndivyo tulivyokuwa kwa sababu yako, ee Mwenyezi-Mungu.

¹⁸Sisi tulipata maumivu ya kujifungua

lakini tukajifungua tu upepo!

Hatukupata ushindi wowote kwa ajili ya nchi yetu,

hatukuweza kuongeza idadi ya watu katika nchi.

¹⁹Wafu wako wataishi tena,[#26:19 Taz Dan 12:2]

miili yao itafufuka.

Wanaolala mavumbini wataamka na kuimba kwa furaha!

Mungu atapeleka umande wake wa uhai,

nao walio kwa wafu watatoka hai.

Baada ya dhiki faraja

²⁰Njoni watu wangu, ingieni majumbani mwenu,

mkajifungie humo ndani.

Jificheni kwa muda mfupi,

mpaka ifike ghadhabu ya Mwenyezi-Mungu.

²¹Maana Mwenyezi-Mungu aja kutoka kwake juu,

kutoka makao yake huko mbinguni;

kuwaadhibu wakazi wa dunia kwa uovu wao.

Nayo dunia haitaficha tena wale waliouawa,

ila itaufichua umwagaji damu wote.