Njoni hata kama hamna fedha

¹“Haya! Kila mwenye kiu na aje kwenye maji![#55:1 Taz Ufu 21:6; 22:17]

Njoni, nyote hata msio na fedha;

nunueni ngano mkale,

nunueni divai na maziwa.

Bila fedha, bila gharama!

²Mbona mnatumia fedha yenu

kwa ajili ya kitu kisicho chakula?

Ya nini kutoa jasho lenu kwa kitu kisichoshibisha?

Nisikilizeni mimi kwa makini,

nanyi mtakula vilivyo bora,

na kufurahia vinono.

³“Tegeni sikio enyi watu wangu, mje kwangu;[#55:3 Taz Mate 13:34]

nisikilizeni, ili mpate kuishi.

Nami nitafanya nanyi agano la milele;

nitawapeni fadhili nilizomwahidi Daudi.

⁴Mimi nilimfanya kiongozi na kamanda wa mataifa

ili yeye anishuhudie kwa watu wa mataifa.

⁵Sasa utayaita mataifa usiyoyajua,

watu wa mataifa yasiyokutambua watakujia mbio,

kwa sababu yangu mimi Mwenyezi-Mungu, Mungu wako;

kwa sababu yangu mimi Mtakatifu wa Israeli

niliyekufanya wewe utukuke.”

⁶Mtafuteni Mwenyezi-Mungu wakati bado anapatikana,

mwombeni msaada wakati yupo bado karibu.

⁷Waovu na waache njia zao mbaya,

watu wabaya waachane na mawazo yao mabaya;

wamrudie Mwenyezi-Mungu apate kuwahurumia,

wamwendee Mungu wetu maana atawasamehe.

⁸Maana, Mwenyezi-Mungu asema hivi:

“Mawazo yangu si kama mawazo yenu,

wala njia zangu si kama njia zenu.

⁹Kama vile mbingu zilivyo mbali na dunia,

ndivyo njia zangu zilivyo mbali na zenu,

na mawazo yangu mbali na mawazo yenu.

¹⁰“Kama vile mvua na theluji ishukavyo toka mbinguni,[#55:10 Taz 2Kor 9:10]

wala hairudi huko bali huinywesha ardhi,

ikaifanya ichipue mimea ikakua,

ikampatia mpanzi mbegu na kuwapa watu chakula,

¹¹vivyo hivyo na neno langu mimi:

Halitanirudia bila mafanikio,

bali litatekeleza matakwa yangu,

litafanikiwa lengo nililoliwekea.

¹²“Mtatoka Babuloni kwa furaha;

mtaongozwa mwende kwa amani.

Milima na vilima mbele yenu vitapaza sauti na kuimba,

na miti yote mashambani itawapigia makofi.

¹³Badala ya michongoma kutamea misonobari,

na badala ya mbigili kutamea mihadasi.

Hilo litakuwa jambo litakalowakumbusha watu

juu ya mambo niliyotenda mimi Mwenyezi-Mungu;

ishara ya milele ambayo haitafutwa.”