¹Ikiwa fukara ni mwenye hekima,

anayo sababu ya kujivuna,

tena ataketi pamoja na watu mashuhuri.

Usiamue kwa sura ya nje

²Usimsifu mtu kwa sura yake nzuri,

wala usimdharau mtu kwa sura yake.

³Nyuki ni miongoni mwa viumbe vidogo virukavyo,

lakini wanachotoa ni kitamu kuliko vitu vyote.

⁴Usijivune kwa sababu unavaa nguo maridadi,

wala kuvimba kichwa wakati unapopewa heshima.

Maana Bwana hufanya mambo ya ajabu,

mambo ambayo binadamu hawezi kuelewa.

⁵Wafalme wengi wamelazimika kuketi udongoni;

na mtu ambaye hakufikiriwa kabisa akavaa taji la kifalme.

⁶Watu mashuhuri wengi wameporomoshwa kabisa,

wakuu wengi wametiwa makuchani mwa wengine.

Uwe mwangalifu

⁷Usimlaumu mtu kabla ya kuchunguza,

fikiri kwanza halafu utoe lawama.

⁸Sikiliza kabla ya kujibu,

wala usimdakize mwingine anapoongea.

⁹Usiingilie jambo lisilokuhusu,

usijiingize katika ubishi wa wenye dhambi.

¹⁰Mwanangu, usishughulikie mambo mengi mno,

ukiongeza shughuli zako hutaepa kulaumiwa.

Hata ukijaribu kufuatia sana hutafika,

wala hutaweza kutoroka kwa kukimbilia mbali.

¹¹Watu wengine hufanya kazi kwa bidii sana,

lakini mwishowe hujikuta bado wanatindikiwa.

¹²Wako na wengine ambao hawana bidii na huhitaji msaada,

hawana mali na wamejaa umaskini.

Lakini Bwana huwaangalia kwa wema na kuwainua;

¹³huwachangamsha na kuwafanya wawe na vitu,

hata watu wengine huwaona na kushangaa.

¹⁴Mema na mabaya, uhai na kifo,

umaskini na utajiri, vyote hutoka kwa Bwana. [

¹⁵Hekima, elimu na ujuzi wa Sheria hutoka kwa Bwana; upendo na kujua kutenda mema hutoka kwake;

¹⁶uhalifu na giza viliumbwa kwa ajili ya wenye dhambi; wanaopenda ubaya watazeeka katika ubaya.]

¹⁷Zawadi za Bwana ni hakika kwa wenye kumcha,

wema wake utakuwako daima kuwaongoza.

¹⁸Watu wengine huwa matajiri kwa bidii na nguvu,

lakini tuzo wanalopata ni hili:

¹⁹Ingawa wanasema: “Sasa naweza kustarehe,

na kufurahia faida niliyopata,”

hawajui itadumu muda gani;

watakufa na kuwaachia wengine utajiri wao.

²⁰Wewe shikilia wajibu wako,

zeeka ukiwa kazini mwako.

²¹Usistaajabie kazi za wenye dhambi,

lakini mtumaini Bwana na fanya kazi yako.

Maana kwa Bwana ni jambo rahisi sana

kumtajirisha maskini mara moja.

²²Wema watapokea baraka ya Mungu.

Mungu huwabariki mara moja.

²³Usiseme, “Ninahitaji nini zaidi?

Nitapata nini wakati ujao?”

²⁴Tena, usiseme, “Nina kila kitu cha kunitosheleza.

Ni maafa gani yatakayoweza kunipata?”

²⁵Wakati wa fanaka mtu husahau matatizo;

na wakati wa matatizo hakuna akumbukaye fanaka.

²⁶Maana, kwa Bwana ni jambo rahisi mtu anapokufa,

kumtuza kadiri ya matendo yake.

²⁷Matatizo ya muda mfupi tu humsahaulisha mtu raha;

mtu hujulikana alivyo mwishoni mwa uhai wake.

²⁸Usiseme fulani ana heri kabla hajafa,

maana ushahidi wote hutolewa baada ya kufa.

Uwe mwangalifu kuchagua marafiki

²⁹Usikaribishe kila mtu nyumbani kwako;

maana mitego ya wajanja ni mingi.

³⁰Mtu mwenye majivuno ni kama chombo cha kukutia hatarini,

kama jasusi, atachunguza udhaifu wako.

³¹Atageuza mambo mema yaonekane kuwa maovu,

na kuona kosa katika matendo mema kabisa.

³²Cheche moja huwasha rundo la makaa,

na mwenye dhambi huvizia kumwaga damu.

³³Jihadhari na mfidhuli na matendo yake ya ulaghai,

la sivyo atakuletea dosari ya kudumu.

³⁴Mkaribishe nyumbani mtu mgeni naye atazusha mzozo;

atakufanya ufarakane na jamaa yako mwenyewe.