¹Mtu yeyote agusaye lami atachafuka,

na anayeshirikiana na mwenye kiburi atakuwa kama yeye.

²Usikubali kubeba mzigo upitao nguvu zako,

usishirikiane na mwenye nguvu na tajiri kuliko wewe.

Chungu cha udongo chawezaje kushirikiana na birika la chuma?

Kama vikigongana hicho chungu ndicho kitakachovunjika.

³Tajiri humkosea mtu hata akadiriki kuongeza matusi juu.

Lakini maskini akikosa hulazimika kuomba msamaha.

⁴Tajiri atakunyonya kila anapopata faida kwako.

Lakini unapotaka akusaidie atakuacha hivihivi.

⁵Kama una kitu atakaa nawe;

atafyonza mali yako bila hata kujali.

⁶Anapokuhitaji atakudanganya,

atakuchekea na kukupa tumaini.

Atakuuliza kwa upole: “Unahitaji chochote?”

⁷Atakufanya uone haya kwa makaribisho yake ya chakula;

akiisha kukunyonya mara mbili tatu, atakucheka.

Kama ukimwona baadaye atajidai hakujui

na kukutikisia kichwa chake.

⁸Jichunge usije ukapotoshwa;

na kufedheheshwa kwa sherehe zako.

⁹Ukialikwa na mtu maarufu, uwe mtaratibu;

naye atakualika mara nyingi.

¹⁰Usijipeleke kwake kwa pupa,

la sivyo atakufukuza.

Lakini ukikaa mbali naye sana, atakusahau.

¹¹Usijidai kuwa sawa naye,

wala usisadiki maneno yake mengi.

Maana atakupima kwa mazungumzo yake marefu,

na anapokucheka, atakuwa anakuchunguza.

¹²Mtu asiyeshika siri ni mtu mkatili.

Hatasita kukudhuru au kukutia gerezani.

¹³Tunza siri zako na uwe mwangalifu,

maana unatembea kwenye hatari. [

Ukisikia kitu unapolala amka!

¹⁴Mpende Bwana maisha yako yote na kumwomba akuokoe.]

¹⁵Kila kiumbe hupenda kiumbe cha aina yake,

kadhalika na binadamu humpenda binadamu mwenzake.

¹⁶Viumbe vyote hujumuika na aina zao,

kadhalika na mtu hujumuika na aliye kama yeye.

¹⁷Mbwamwitu na mwanakondoo wana ushirika gani?

Ni vigumu zaidi kushirikisha mwenye dhambi na mcha Mungu!

¹⁸Je, kuna amani yoyote kati ya fisi na mbwa?

Na je, kuna amani yoyote kati ya tajiri na fukara?

¹⁹Pundamwitu ni mawindo ya simba;

nao maskini ni malisho ya matajiri.

²⁰Unyenyekevu ni chukizo kwa mtu mwenye kiburi,

vivyo hivyo maskini ni chukizo kwa mtu tajiri.

²¹Tajiri akitetereka hutegemezwa na rafikize.

Lakini maskini akianguka rafikize humsukumia mbali,

²²Tajiri akikosea, wa kumsaidia ni wengi;

hata akisema maneno yasiyofaa, humtetea kuwa sawa.

Lakini maskini akitetereka watamkaripia,

hata kama akiongea kwa busara, hakuna anayemjali.

²³Tajiri akiongea, wote hunyamaza,

huyasifu anayoongea hadi mawinguni.

Mtu maskini akiongea,

watu husema, “Ni nani huyu?”

Na akijikwaa, watamsukumiza chini.

²⁴Utajiri ni mzuri kama hauhusiani na dhambi,

na umaskini ni mbaya kwa maoni ya wasiomcha Mungu.

²⁵Hali ya mtu moyoni husababisha hali yake ya nje:

Iwe ya furaha au ya huzuni.

²⁶Uso mkunjufu ni alama ya furaha moyoni,

utaonekana mwenye furaha hata nje.

Lakini kuvumbua methali kunahitaji kufikiri sana.