¹Heri mtu asiyekosea kwa ulimi wake;

hahitaji kusikitika kuwa amekosa.

²Heri mtu ambaye dhamiri yake haimshtaki,

na ambaye hajakata tamaa.

Matumizi ya mali

³Si sawa kwa mtu mchoyo kuwa tajiri.

Utajiri una maana gani kwa mtu bahili?

⁴Mtu anayekusanya mali kwa kujinyima mwenyewe,

anawakusanyia watu wengine.

Hao wataiponda mali yake katika anasa.

⁵Aliye bahili kwake mwenyewe atakuwa mkarimu kwa nani,

kama hafurahii utajiri wake mwenyewe?

⁶Hakuna mtu bahili kuliko anayejichukia mwenyewe;

ndivyo ubaya wake unavyomlipa yeye mwenyewe.

⁷Hata kama akitenda wema, hutenda kwa ajali,

na mwishowe hujulisha hali yake duni.

⁸Mtu mwenye kijicho ni mwovu;

huangalia pembeni na kuwadharau watu.

⁹Jicho la mchoyo haliridhiki na kile alicho nacho,

na uchoyo huidhoofisha roho.

¹⁰Mtu mchoyo ni bahili wa chakula,

haweki chakula mezani pake.

¹¹Mwanangu, tumia vitu vyako kukufurahisha uwezavyo,

na mtolee Bwana tambiko zitakiwazo.

¹²Kumbuka kwamba kifo hakitakawia,

na kwamba hujatangaziwa kauli ya kuzimu.

¹³Mtendee rafiki yako mema kabla hujafa;

uwe mkarimu na kumpa kadiri ya uwezo wako.

¹⁴Usijinyime siku moja ya furaha,

usiache sehemu yako ya furaha halali ikuponyoke.

¹⁵Siku moja utawaachia wengine matunda ya jasho lako;

yote uliyochuma kwa kazi ngumu yatagawanywa kwa kura.

¹⁶Wape wengine na kupokea kwao ujifurahishe moyo,

maana mtu hatazamii starehe huko kuzimu.

¹⁷Viumbe vyote hai huchakaa kama vazi,

maana kauli ya tangu zama ni: “Lazima mtakufa!”

¹⁸Kama vile majani katika mti uliotanda matawi:

Hupukutika yakaanguka na mengine huota,

ndivyo ilivyo kwa binadamu wenye mwili na damu:

Mmoja hufa na mwingine huzaliwa.

¹⁹Kila kilichotengenezwa huchakaa na kutoweka,

naye mtengenezaji hutoweka na kazi yake.

Furaha ya kuwa na Hekima

²⁰Heri mtu anayetafakari juu ya Hekima

mtu anayefikiri kwa busara.

²¹Yule anayezifikiria njia za Hekima,

na kuwaza na kuwazua pia juu ya siri zake.

²²Mtu amtafutaye Hekima kama vile mwindaji,

na kukaa kwenye njia zake kumngojea.

²³Mwenye kuchungulia madirishani mwake,

na kusikiliza milangoni mwake.

²⁴Mwenye makazi yake karibu na nyumba yake

na kufunga kigingi cha hema lake ukutani mwake.

²⁵Mwenye kusimika hema lake karibu naye

na kukaa katika makao yake mazuri.

²⁶Huweka watoto wake chini ya ulinzi wake,

na kupumzika chini ya matawi yake.

²⁷Kwake atapata kivuli cha kumkinga na joto,

na kukaa katika fahari yake.