Ukuu wa Mungu

¹Yeye aishiye milele aliumba ulimwengu wote.

²Bwana peke yake ndiye atendaye kwa uadilifu. [Na hakuna mwingine isipokuwa yeye.

³Huuongoza ulimwengu kwa kiganja cha mkono wake, na kila kitu hutii matakwa yake. Yeye ni mfalme wa vitu vyote, na nguvu zake hutenganisha kati ya kilicho kitakatifu na kilicho najisi.]

⁴Hajampa yeyote uwezo wa kutosha kutangaza kazi zake,

na wala hakuna mtu awezaye kuzichunguza.

⁵Nani anaweza kupima nguvu zake kuu?

Nani anaweza kuhesabu kikamilifu rehema zake?

⁶Haiwezekani kuzipunguza au kuziongeza.

Haiwezekani kuyaelewa maajabu ya Bwana.

⁷Binadamu anapofikia mwisho wa hayo

anajikuta kwamba ndio tu anaanza;

na akiacha, anabaki katika bumbuazi.

Mtu si kitu

⁸Mtu ni nini na anafaa nini?

Uzuri wake ni nini na ubaya wake ni nini?

⁹Mtu akiishi miaka 100,

ameishi maisha marefu.

¹⁰Lakini kama vile tone la maji kutoka baharini,

na kama chembe ya mchanga wa pwani,

ndivyo ilivyo hiyo miaka michache katika milele.

¹¹Kwa hiyo Bwana huwavumilia watu

na kuwamiminia huruma zake.

¹²Yeye anaona na ajua kuwa mwisho wao ni mbaya

kwa hiyo huwajalia msamaha kwa wingi.

¹³Mtu humhurumia jirani yake tu,

lakini Bwana ana huruma kwa viumbe vyote hai.

Yeye huwaonya, huwafunza na kuwafundisha watu.

Huwarudisha kama mchungaji arudishapo kundi lake.

¹⁴Yeye huwarehemu wanaokubali nidhamu yake

na wanaotamani maamuzi yake.

Wema na kusaidia maskini

¹⁵Mwanangu, usichanganye matendo yako mema na lawama.

Unapomsaidia maskini usimhuzunishe kwa maneno yako.

¹⁶Je, umande si unaburudisha wakati wa joto kali?

Hivyo neno moja laweza kufaa kuliko zawadi.

¹⁷Neno jema lafaa kuliko zawadi,

mtu mkarimu anavyo vyote viwili.

¹⁸Mpumbavu ni mkatili na mwenye matusi.

Zawadi ya mtu mchoyo huzima macho.

¹⁹Jifunze kabla ya kusema.

Tunza afya yako kabla hujaugua.

²⁰Jichunguze kabla ya hukumu

na siku ile itakapofika, utapata msamaha.

²¹Jinyenyekeshe kabla ya kupatwa na ugonjwa.

Unapokaribia kutenda dhambi, rudi.

²²Usizuiliwe na chochote kutimiza nadhiri zako,

wala usingoje hadi kifo, usamehewe.

²³Jitayarishe kabla ya kuweka nadhiri;

wala usiwe kama mtu anayemjaribu Bwana.

²⁴Fikiri juu ya ghadhabu yake siku utakapokufa,

na wakati wa adhabu, atakapogeuzia mbali uso wake.

²⁵Wakati wa fanaka, fikiria wakati wa njaa.

Wakati wa utajiri, fikiria umaskini na ufukara.

²⁶Tangu asubuhi mpaka jioni, hali hubadilikabadilika.

Bwana aweza kugeuza haraka hali za viumbe vyote.

²⁷Mwenye hekima ni mwangalifu katika kila kitu.

Anapokabiliwa na dhambi huchukua hadhari asikosee.

²⁸Kila mwenye akili anajua hekima,

na humsifu yeyote anayeipata.

²⁹Watu wanaoelewa misemo wanapata kuwa na hekima;

nao hububujika methali zifaazo.

Kujichunguza mwenyewe

³⁰Usizifuate tamaa zako mbaya,

bali zuia uchu wako.

³¹Ukijiachia kufurahia tamaa mbaya,

utakuwa kitu cha kuchekwa na maadui zako.

³²Usijitumbukize katika anasa kubwa,

usije ukafilisika kwa gharama zake.

³³Usiwe muflisi kukopa fedha za karamu

wakati wewe huna chochote mfukoni.