Wakati wa kufaa kuongea

¹Mtu anaweza kukaripiwa wakati usiofaa;

kuna ukimya ambao huonesha mtu ana hekima.

²Afadhali zaidi kumwonya mtu kuliko kukaa na hasira.

³Anayekiri kosa lake anajiepusha na balaa.

⁴Kama vile towashi anayetaka kumnajisi msichana

ndivyo alivyo mtu anayetaka kutekeleza maamuzi yake kwa nguvu.

⁵Kuna mtu ambaye akinyamaza anaonekana ana hekima;

hali mwingine huchukiwa kwa kuwa ni domo kaya mno.

⁶Mtu mwingine hunyamaza kwani hana la kusema;

na mwingine hunyamaza kwani anajua wakati wa kuongea.

⁷Mwenye hekima atanyamaza mpaka wakati ufaao;

Lakini domo kaya na mjinga huukosa wakati wa kufaa.

⁸Mtu wa maneno mengi mno, atachukiwa,

kadhalika na asiyewapa wengine nafasi ya kuongea.

⁹Mtu aweza kupata bahati njema katika taabu;

na bahati njema yaweza ikaishia katika hasara.

¹⁰Kuna zawadi isiyokuletea faida yoyote;

lakini zawadi nyingine huleta faida maradufu.

¹¹Mara nyingine fahari huleta hasara.

Lakini wako wengine waliofaulu sana kutoka hali duni.

¹²Mtu hununua vitu vingi kwa bei ya chini,

kumbe hulipa mara saba zaidi ya bei yake.

¹³Mwenye hekima hufanya apendeke kwa maneno yake;

lakini uungwana wa wajinga ni bure tu.

¹⁴Zawadi ya mpumbavu, haitakufaa kitu,

maana anatazamia mengi kutoka kwako, si moja.

¹⁵Yeye hutoa kidogo na kupiga domo sana,

hufungua mdomo na kutangaza.

Leo hukopesha, kesho anakitaka.

Mtu kama huyo ni wa kuchukiza.

¹⁶Mpumbavu husema, “Sina rafiki.

Hakuna anayenishukuru kwa wema wangu.

Wanakula chakula changu na kunisema vibaya.”

¹⁷Naam! Ataendelea kuchekwa na wengi!

Mazungumzo yasiyofaa

¹⁸Afadhali kuteleza sakafuni kuliko kuteleza kwa ulimi;

maangamizi ya waovu yatakuja haraka.

¹⁹Mtu asiye na shukrani ni kama hadithi isiyo wakati wake,

na ambayo wajinga huirudiarudia.

²⁰Methali ikitoka kwa mpumbavu hukataliwa,

maana haisemi wakati ulio wake.

²¹Mtu aweza kuzuiwa kutenda dhambi kwa umaskini wake,

kwa hiyo anapopumzika hatakuwa na la kujuta.

²²Mtu aweza kupoteza maisha yake kwa kuona aibu,

au akayapoteza kuwaogopa watu.

²³Mtu aweza kumwahidi rafiki kitu kwa aibu,

hata akamfanya kuwa adui bila sababu.

²⁴Uongo ni doa baya sana kwa mtu;

uko daima mdomoni mwa mpumbavu.

²⁵Afadhali mwizi kuliko mwenye tabia ya uongo;

lakini wote wawili wataangamia.

²⁶Tabia ya kusema uongo huleta fedheha,

nayo itabaki daima na mwenye kusema uongo.

²⁷Anayaongea kwa hekima, ataendelea vizuri;

mwenye busara atawapendeza wakuu.

²⁸Anayelima ardhi atapata mavuno kwa wingi;

na anayewapendeza wakuu atajipatia haki.

²⁹Bakshishi na zawadi hupofusha macho ya wenye hekima,

ni kizibo mdomoni cha kuwazuia wasikaripie ubaya.

³⁰Hekima ya kuficha na hazina iliyofichika,

je, vina faida yoyote ile?

³¹Afadhali mtu afichaye upumbavu wake,

kuliko mtu afichaye hekima yake.