Kuisifu Hekima

¹Hekima anajisifu mwenyewe,

na kujitukuza miongoni mwa watu wake.

²Atajisifu kwenye kusanyiko la Mungu Mkuu,

atajisifu mbele ya jeshi lake na kusema,

³“Mimi nilitoka mdomoni mwake Mungu Mkuu,

na kuifunika dunia kama ukungu.

⁴Makao yangu yalikuwa mbinguni juu,

kiti changu cha enzi katika nguzo ya wingu.

⁵Peke yangu nilipita mzunguko wa mbingu,

nikatembea chini kabisa ahera.

⁶Juu ya mawimbi ya bahari duniani kote,

natawala kati ya watu wote na mataifa yote.

⁷Nilitafuta kwao wote mahali pa kupumzika,

nikatafuta ni eneo la nani ambako ningeishi.

⁸“Hapo huyo Muumba wa vitu vyote akanipa amri;

huyo aliyeniumba akanipangia mahali pa maskani yangu.

Aliniambia, ‘Fanya makao yako kwa Yakobo,

pokea sehemu yako kutoka kwa Israeli.’

⁹Tangu milele, mwanzoni kabisa aliniumba,

nami nitakuwako milele wala sitaacha kuwako.

¹⁰Nilimhudumia katika maskani yake takatifu,

na hivyo nikaimarika katika Siyoni.

¹¹Alinipa pia pa kupumzikia katika mji wake mpendwa,

makao yangu yalikuwa mjini Yerusalemu.

¹²Niliweka mizizi yangu kati ya watu maarufu,

sehemu yangu kati ya watu walio wake Bwana.

¹³“Nilirefuka kama mwerezi wa Lebanoni,

nikawa kama msunobari kwenye vilele vya Hermoni.

¹⁴Nilirefuka kama mtende wa Engedi

na kama miwaridi huko Yeriko,

nikawa mzuri kama mzabibu shambani,

nikawa mrefu kama mparamuzi.

¹⁵Nilinukia harufu ya vikolezo kama mdalasini na mkakaya,

nikaeneza harufu nzuri kama manemane safi.

Harufu kama ya udi, hunukia ubani,

kama harufu nzuri ya ubani hekaluni.

¹⁶Matawi yangu nilitandaza kama mwaloni,

nayo yana fahari na yanapendeza.

¹⁷Nilichipusha neema kama mzabibu,

maua yangu yakatukuka na kutoa matunda mengi. [

¹⁸Mimi ni mama wa upendo mzuri, kicho, uchaji wa Mungu, maarifa na tumaini takatifu. Na kwa kuwa mimi nadumu milele, nimetolewa kwa watoto wangu wote, kwa wale ambao amewataja.]

¹⁹Njoni kwangu enyi nyote mnaonitamani,

mkale na kushiba matunda yangu.

²⁰Kunikumbuka mimi ni kutamu kuliko asali,

kunipata mimi ni kutamu kuliko sega la asali.

²¹Wanilao mimi watataka tena zaidi

waninywao watataka kunywa zaidi.

²²Mwenye kunitii hataaibishwa kamwe,

wanaojishughulisha nami hawatatenda dhambi.”

Hekima na sheria

²³Yote haya ni kitabu cha agano la Mungu Mkuu,

kitabu cha sheria aliyotuamuru Mose tufuate.

Sehemu waliyopewa watu wa jumuiya ya Yakobo. [

²⁴Usiache kumtegemea Bwana kwa dhati, andamana naye ili akuimarishe; Bwana Mwenye Nguvu peke yake ndiye Mungu, hakuna awezaye kuokoa ila yeye.]

²⁵Sheria huwatiririshia watu hekima kama mto Eufrate,

na kama mto Tigri wakati wa matunda ya mwanzoni.

²⁶Sheria inawajaza maarifa kama mto Eufrate,

na kama mto Yordani wakati wa mavuno.

²⁷Hufanya mafunzo yangae kama mwanga,

kama Gihoni wakati wa kuchuma zabibu.

²⁸Mtu wa kwanza hakuweza kumjua Hekima kamili,

na mtu wa mwisho pia hataweza kumwelewa.

²⁹Maana mawazo yake ni mengi kama maji baharini,

na mashauri yake yana kina kuliko kilindi cha kuzimu.

³⁰Mimi nilijitokeza kama mfereji kutoka kwenye mto,

kama mfereji wa maji kwenda bustanini.

³¹Nilisema, “Nitainywesha bustani yangu,

na kulowanisha vitalu vyake.”

Na kumbe, mfereji wangu ukageuka mto,

na mto wangu ukageuka bahari.

³²Basi, mafunzo yangu nitayangarisha tena kama pambazuko;

nitayangarisha, yaangaze mpaka mbali.

³³Nitamimina mafundisho tena kama unabii

na kuviachia vizazi vijavyo.

³⁴Kumbukeni sikufanya kazi kwa ajili yangu mwenyewe,

bali kwa ajili ya wote wanaotafuta kufunzwa.