Watu wanaostahili kusifiwa

¹Moyo wangu wafurahia mambo matatu;

mambo yaliyo mazuri mbele ya Bwana na wanaadamu:

Ndugu wanaopatana vizuri,

jirani wenye uhusiano mwema,

na mke na mume wanaoishi kwa furaha.

²Moyo wangu wawachukia watu wa aina tatu,

watu ambao nachukizwa sana na maisha yao:

Maskini mwombaji mwenye kiburi,

tajiri ambaye ni mwongo,

na mzee mzinzi asiye na akili.

³Kama hukuokota chochote cha funzo ulipokuwa kijana,

utawezaje, basi, kupata chochote katika uzee wako?

⁴Ni jambo zuri mno kwa mzee mwenye mvi kuamua vema,

na mwenye umri mkubwa kujua namna ya kushauri!

⁵Ni jambo la kupendeza mno hekima katika wazee,

na mawaidha yafaayo na mashauri kutoka kwa watu mashuhuri!

⁶Uzoefu mwingi wa maisha ni taji ya wazee,

kumcha Bwana ndiyo fahari yao.

⁷Najua mambo tisa ambayo nayathamini sana moyoni;

naam, na jambo la kumi nitawaambieni pia:

Mtu anayefurahi kwa sababu ya watoto wake,

mtu aishiye hata akawaona maadui zake wanaangamia;

⁸mwanamume aliye na bahati ya kuishi na mke mwenye akili,

ambaye halimi shambani kwa ng'ombe pamoja na punda,

mtu ambaye hajakoseshwa na ulimi wake,

mtu asiyemtumikia mtu ambaye hastahili,

⁹mtu aliye na bahati ya kupata rafiki amini,

na mtu ambaye watu hufurahia kumsikiliza.

¹⁰Jinsi gani alivyo mkuu mtu aliyepata hekima!

Lakini hakuna aliye mkuu kuliko yule amchaye Bwana!

¹¹Kumcha Bwana ni muhimu kuliko mambo yote.

Mtu amchaye Bwana hana kifani! [

¹²Kumcha Bwana ni mwanzo wa kuandamana naye.]

Mke mwema na mke mbaya

¹³Hakuna jeraha baya kama jeraha la moyoni!

Hakuna ubaya mbaya kuliko ubaya wa mwanamke!

¹⁴Hakuna pigo baya kama la mtu mwenye chuki.

Hakuna kisasi kibaya kama kisasi cha adui.

¹⁵Hakuna sumu mbaya kama sumu ya nyoka,

na hakuna hasira mbaya kama hasira ya adui.

¹⁶Afadhali kuishi na simba na nyoka

kuliko kuishi na mwanamke mwovu.

¹⁷Uovu wa mwanamke humbadilisha sura,

uso wake ukawa kama uso wa dubu.

¹⁸Mumewe akila chakula kwa jirani

hawezi kujizuia kupiga kite kwa uchungu.

¹⁹Hakuna uovu mbaya kuliko uovu wa mke wa mtu;

huyo atapatwa na balaa la wenye dhambi.

²⁰Kama vile ilivyo shida kwa miguu ya mzee kupanda mlima uliojaa mchanga,

ndivyo ilivyo kwa mume mpole kuishi na mke mwenye makelele.

²¹Usinaswe na uzuri wa mwanamke,

wala usimtamani mwanamke kwa mali yake.

²²Ni ghadhabu, aibu na fedheha

mume kulishwa na mkewe.

²³Moyo wa huzuni, kukosa raha na kuvunjika moyo,

husababishwa na mke mwovu.

Mikono na magoti hafifu ya mumewe

husababishwa na mke asiyemfurahisha mumewe.

²⁴Dhambi ilianza kwa mwanamke,

na kwa sababu yake sote lazima tufe.

²⁵Kama vile huachi maji yavuje,

vivyo hivyo usikubali mke mwovu aseme apendavyo.

²⁶Kama hapendi kufuata kama unavyomwagiza,

basi mtenganishe nawe.