Dawa na ugonjwa

¹Mpe daktari heshima anayostahili,

kwa sababu ya huduma zake kwako,

kwa vile naye aliumbwa na Bwana.

²Maana kipaji chake cha kuponya chatoka kwa Mungu Mkuu;

naye hupata zawadi kutoka kwa mfalme.

³Ujuzi wa daktari humfanya maarufu,

naye huheshimiwa miongoni mwa wakuu.

⁴Bwana aliumba dawa zote kutoka ardhini,

na mtu mwenye busara hawezi kuzidharau.

⁵Je si kwa kijiti maji yaligeuzwa kuwa mazuri

ili Mungu awaoneshe watu nguvu yake?

⁶Bwana aliwapa watu maarifa na ujuzi,

ili atukuzwe katika kazi zake za ajabu!

⁷Kwa dawa huwaponya watu na kuondoa maumivu;

⁸mchanganya dawa hutengeneza mchanganyiko wake.

Kazi za Bwana hazina mwisho;

afya yote duniani hutoka kwake.

⁹Mwanangu, ukiugua usiwe mzembe juu ya ugonjwa,

bali mwombe Bwana naye atakuponya.

¹⁰Acha makosa yako, uamue kutenda mema,

na kutakasa moyo wako dhambi zote.

¹¹Mtolee Bwana tambiko ya harufu nzuri,

na tambiko ya ukumbusho ya unga safi.

Umiminie tambiko zako mafuta,

kadiri unavyoweza kupata.

¹²Kisha mengine mwachie daktari;

maana Bwana ndiye aliyemuumba;

usikubali akuache maana unamhitaji.

¹³Kuna wakati ambapo kupona kwawategemea madaktari.

¹⁴Maana nao pia wanamwomba Bwana

ili awape mafanikio katika uchunguzi wao,

na katika kuponya ili kuokoa maisha.

¹⁵Mtu anayetenda dhambi dhidi ya Muumba wake,

mwache aanguke mikononi mwa daktari.

Matanga

¹⁶Mwanangu, mlilie mtu aliyekufa;

lia kwa uchungu, kuonesha huzuni yako.

Uuzike mwili wake kwa heshima ipasavyo,

wala usipuuze mazishi yake.

¹⁷Lia kwa uchungu na kwa moyo,

hudhuria matanga kama anavyostahili marehemu,

omboleza siku mbili tatu usije ukasemwa;

kisha ufarijike kutokana na huzuni yako.

¹⁸Maana huzuni huweza kusababisha kifo,

na huzuni ya moyo hunyonya nguvu za mtu.

¹⁹Mtu akiondolewa duniani huzuni imekwisha,

lakini maisha ya maskini, huulemesha moyo.

²⁰Usiruhusu moyo wako kutawaliwa na huzuni;

ifukuze huzuni, ukifikiria mwisho wako.

²¹Usisahau kwamba hakuna kurudi nyuma,

humsaidii marehemu chochote na unajidhuru mwenyewe.

²²Kumbuka, utakufa kama alivyokufa,

jana yeye, kesho wewe.

²³Marehemu anapowekwa kupumzika kaburini,

nako kumkumbuka kuachwe;

nawe usiendelee kumlilia roho yake ikisha ondoka.

Shughuli

²⁴Nafasi humwezesha msomi kujifunza hekima,

aliye na shughuli chache aweza kupata hekima.

²⁵Atakuwaje na hekima mtu anayeshughulika tu na jembe?

Fahari yake ni kuongoza ng'ombe,

kuwafanya wakokote plau,

na mazungumzo yake yote ni juu ya mifugo!

²⁶Mawazo yake ni kupiga mifuo shambani,

na kuwalisha ndama wake.

²⁷Kadhalika na kila mfanyakazi na fundi,

ambaye hufanya kazi usiku na mchana;

na wanaonakshi mihuri wakibuni daima mbinu mpya;

hufanya bidii kunakshi mifano mizuri,

na kukesha wakiikamilisha kazi yao.

²⁸Kadhalika na mfuachuma kwenye fuawe yake;

hufikiria cha kufanya na chuma chake,

miali ya moto hudhoofisha mwili wake,

akilivumilia joto la tanuri;

sauti ya nyundo yake huziba masikio yake,

macho yake hukodolea chombo afuacho.

Moyo wake umepania kuikamilisha kazi yake

na huwa mwangalifu kukamilisha nakshi yake.

²⁹Kadhalika na mfinyanzi kazini mwake,

hulizungusha gurudumu kwa mguu wake,

kila siku yu macho juu ya kazi yake

na hukesha kutimiza idadi itakiwayo.

³⁰Huupondaponda udongo kwa mkono wake

huufinyanga kwa miguu yake,

hutia maanani sana kumaliza kazi yake,

na huwa mwangalifu kusafisha kinu chake.

³¹Wote hao huitegemea mikono yao,

na kila mmoja ana ujuzi wa kazi yake.

³²Bila wao mji haujengeki;

na watu hawawezi kuutembelea wala kuishi huko.

³³Hata hivyo, hawafikii hali ya kuwa halmashauri ya watu,

wala hawapewi hadhi katika kikao cha hadhara.

Hawawi mahakimu wala kuelewa hukumu zinazotolewa.

³⁴Hawawezi kueleza mafunzo au maamuzi ya sheria,

wala hawajaonekana wakitumia methali.

Lakini huufanya ulimwengu ulioumbwa utengemae,

na dua lao lahusu mambo ya shughuli zao!