Jua

¹Fahari ya huko juu ni uangavu wa anga lake;

anga laonekana kumetameta kwa fahari yake.

²Jua litokezapo linatangaza likingaa.

Hilo ni kitu cha ajabu alichoumba Mungu Mkuu.

³Mchana laikausha ardhi,

nani awezaye kustahimili joto lake?

⁴Mtu huchochea tanuri na kusikia joto lake,

lakini jua huichoma milima mara tatu zaidi.

Jua hupuliza mionzi yake ya moto,

na miali yake mikali hupofusha macho.

⁵Jinsi gani alivyo mkuu Bwana aliyeliumba,

na ambaye kwa amri yake laendelea na mkondo wake.

Mwezi

⁶Vilevile mwezi huangaza kwa wakati wake,

nao ni alama ya milele;

huongoza nyakati na majira.

⁷Nyakati za sikukuu hutambuliwa kwa mwezi;

mwanga wake huwa mkubwa halafu hupungua.

⁸“Mwezi” wa kalenda jina lake latokana na mwezi,

hukua kwa namna ya ajabu katika vipindi vyake;

wenyewe ni ishara ya majeshi ya angani

ukingaa katika anga la mbinguni.

Nyota

⁹Mngao wa nyota unaonesha uzuri wa anga

mapambo mazuri sana katika mbingu za juu za Bwana.

¹⁰Kwa amri yake yeye Mtakatifu

zinasimama mahali zilipopangiwa;

kamwe hazikiuki jukumu lao la ulinzi.

Upinde wa mvua

¹¹Tazama upinde wa mvua, umsifu yeye aliyeuumba!

Upinde wa mvua ni mzuri mno kwa mngao wake!

¹²Hulizingira anga kwa nusu mzingo wake mzuri,

mikono ya Mungu Mkuu imeutandaza.

Maajabu ya maumbile

¹³Kwa amri yake Bwana hupeleka theluji,

na umeme humulika anapoamuru.

¹⁴Kadhalika ghala zake hufunguka,

mawingu yakaruka kutoka humo kama ndege.

¹⁵Kwa ukuu wake huyakusanya mawingu,

na kuipasua barafu ikawa mvua ya mawe.

¹⁶Atokeapo, milima hutetemeshwa,

kwa kutaka kwake upepo wa kusi huvuma.

¹⁷Sauti yake ya ngurumo huikemea nchi,

kadhalika na upepo wa kaskazi na kimbunga.

Huitawanya theluji ikashuka chini kama ndege,

kama vile nzige wanaotua.

¹⁸Tunashangaa kuona uzuri wa weupe wake,

na kustaajabia kuanguka kwake.

¹⁹Hutawanya ukungu juu ya nchi kama chumvi,

na unapoganda huweko vitu vilivyochongoka kama miiba.

²⁰Huvumisha upepo baridi wa kaskazi,

barafu ikaganda juu ya maji,

ikafunika madimbwi yote ya maji,

ikiwa kama ngao ya kujikingia.

²¹Huiteketeza milima na kuchoma nyika,

akazinyausha nyasi changa kama kwa moto.

²²Lakini ukungu hurekebisha tena kila kitu,

umande unapotokea na kuburudisha.

²³Kwa hekima yake aliituliza bahari kuu,

na kuweka huko visiwa.

²⁴Wanaosafiri baharini husimulia hatari zake,

nasi tunashangaa juu ya hayo tunayosikia.

²⁵Baharini mna viumbe vya ajabu na vya kushangaza,

viumbe vikubwa mno na aina zote za viumbe hai.

²⁶Bwana humwezesha kila mjumbe wake kufaulu,

kwa neno lake kila kiumbe hushikishwa pamoja.

²⁷Ingawa tunasema mengi, hatuwezi kufikia mwisho wao,

kwa kifupi: “Bwana ni kila kitu.”

²⁸Tupate wapi nguvu ya kumsifu?

Maana yeye ni mkuu kuliko kazi zake zote.

²⁹Bwana ni wa kutisha na mkuu sana,

nguvu zake ni za ajabu mno.

³⁰Unapomsifu Bwana, msifu kadiri uwezavyo,

maana yeye, anastahili zaidi ya hayo yote.

Unapomtukuza, mtukuze kwa nguvu zako zote.

Wala usichoke maana huwezi kumsifu yeye ipasavyo.

³¹Nani aliyemwona, akaweza kueleza alivyo?

Au, nani awezaye kumtukuza ipasavyo?

³²Maajabu mengi makuu kuliko haya, yamefichika,

maana tumeziona tu kazi zake chache.

³³Maana Bwana amefanya vitu vyote,

akawapa heshima wale wamchao.