Onyo dhidi ya sanamu

¹Ndugu, nataka mjue kwamba babu zetu wote walikuwa chini ya ulinzi wa lile wingu, na kwamba wote walivuka salama ile bahari.[#10:1-13 Paulo anatumia mfano wa Waisraeli walipotoka Misri. Ijapokuwa wakati huo walijaliwa mema mengi na Mungu hawakuishi maisha yaliyoafikiana na mema hayo.]

²Wote walibatizwa katika umoja na Mose katika lile wingu na katika ile bahari.[#10:1-2 Taz Kut 13:21-22; 14:19 (wingu) na 14:22-29 (bahari). Yamkini Paulo anataka kusema kwamba kama vile Waisraeli walivyoungana na Mose katika matukio hayo vivyo hivyo nao Wakristo wanaungana na Kristo katika ubatizo (Rom 6:3; 1 Kor 12:13; Gal 3:27).]

³Wote walikula chakula kilekile cha kiroho,

⁴wakanywa pia kinywaji kilekile cha kiroho, maana walikunywa kutoka ule mwamba wa kiroho uliowafuata; mwamba huo ulikuwa Kristo mwenyewe.[#10:4 Kulingana na mapokeo ya Kiyahudi ya nyakati za A.J. ilifikiriwa kwamba ule mwamba unaotajwa katika Kut 17:6 na ule wa Hes 20:8 ulikuwa uleule na uliwafuata Waisraeli katika safari yao jangwani.]

⁵Hata hivyo, wengi wao hawakumpendeza Mungu, na maiti zao zilisambazwa jangwani.

⁶Sasa, mambo hayo yote ni mfano tu kwetu; yanatuonya sisi tusitamani ubaya kama wao walivyotamani.[#10:6 Hes 11:4,24.]

⁷Msiwe waabudu sanamu kama baadhi yao walivyokuwa; kama yasemavyo Maandiko: “Watu waliketi kula na kunywa, wakasimama kucheza.”

⁸Wala tusizini kama baadhi yao walivyozini, wakaangamia siku moja watu 23,000.

⁹Tusimjaribu Bwana kama baadhi yao walivyomjaribu, wakauawa na nyoka.[#10:9 Baadhi ya hati za kale “Kristo”, na nyingine “Mungu”.; #10:9 Hes 21:5-6.]

¹⁰Wala msinung'unike kama baadhi yao walivyonung'unika, wakaangamizwa na Mwangamizi!

¹¹Basi, mambo hayo yaliyowapata wao ni kielelezo kwa wengine, na yaliandikwa ili kutuonya sisi ambao mwisho wa nyakati unatukabili.

¹²Anayedhani amesimama imara ajihadhari asianguke.

¹³Majaribu mliyokwisha pata ni ya kawaida kwa binadamu. Mungu ni mwaminifu, naye hataruhusu mjaribiwe kupita nguvu zenu, ila pamoja na majaribu, yeye atawapeni pia nguvu ya kustahimili na njia ya kutoka humo salama.[#10:13 Ingawa wengi wanafikiri hii inamaanisha kwamba Mungu habadilishi ahadi zake, wengi wanafikiri hapa Paulo ana maana kwamba “Mungu ni wa kutegemewa”. Rejea Kumb 7:9; 1Pet 4:19.]

¹⁴Kwa hiyo, wapenzi wangu, epeni ibada za sanamu.

¹⁵Naongea nanyi, watu wenye busara; jiamulieni wenyewe hayo nisemayo.

¹⁶Tunapomshukuru Mungu kwa kikombe kile cha baraka, je, huwa hatushiriki damu ya Kristo? Na tunapoumega mkate, je, huwa hatushiriki mwili wa Kristo?[#10:16 Kwanza kabisa, haya si maswali yanayotaka majibu ila ni mtindo wa maandishi ambayo lengo kuu ni kutilia mkazo jambo lililo dhahiri kabisa. Pili: kuhusu Karamu ya Bwana, rejea Mat 26:26-28 na sambamba zake. Tatu: katika Karamu ya Bwana, anayeshiriki anajiunganisha na mwili na damu ya Kristo na kushirikiana na wote wanaoshiriki.]

¹⁷Kwa kuwa mkate huo ni mmoja, sisi, ingawa ni wengi, tu mwili mmoja; maana sote twashiriki mkate huohuo.

¹⁸Angalieni kwa mfano Wayahudi wenyewe: wale wanaokula tambiko wanaungana na hiyo madhabahu.

¹⁹Nataka kusema nini, basi? Kwamba chakula kilichotambikiwa sanamu ni kitu zaidi ya chakula? Na hizo sanamu, je, ni kitu kweli zaidi ya sanamu?

²⁰Hata kidogo! Ninachosema ni kwamba tambiko wanazotoa watu wasiomjua Mungu wanawatolea pepo, sio Mungu. Sipendi kamwe nyinyi muwe na ushirika na pepo.

²¹Hamwezi kunywa kikombe cha Bwana na kikombe cha pepo; hamwezi kushiriki katika Karamu ya Bwana na katika meza ya pepo.

²²Au je, tunataka kumfanya Bwana awe na wivu? Mnadhani tuna nguvu zaidi kuliko yeye?

Kila kitu kwa ajili ya utukufu wa Mungu

²³Vitu vyote ni halali, lakini si vyote vinafaa. Vitu vyote ni halali lakini si vyote vinajenga.[#10:23 Taz 1Kor 6:12 maelezo.]

²⁴Mtu asitafute faida yake mwenyewe, ila faida ya mwenzake.

²⁵Kuleni chochote kile kiuzwacho sokoni bila ya kuulizauliza kwa sababu ya dhamiri zenu;

²⁶maana Maandiko yasema: “Dunia na vyote vilivyomo ni mali ya Bwana.”

²⁷Kama mtu ambaye si mwaamini akiwaalikeni nanyi mkakubali kwenda, basi, kuleni vyote atakavyowaandalieni bila kuulizauliza kwa sababu ya dhamiri zenu.

²⁸Lakini mtu akiwaambieni: “Chakula hiki kimetambikiwa sanamu,” basi, kwa ajili ya huyo aliyewaambieni hivyo na kwa ajili ya dhamiri, msile.[#10:28 Rom 14:14; 1Kor 8:7. Baadhi ya hati za kale zinaiongezea aya hii maneno: “kwa kuwa dunia na vyote vilivyomo ni vyake Bwana”.]

²⁹Nasema, “kwa ajili ya dhamiri,” si dhamiri yenu, bali dhamiri yake huyo aliyewaambieni.

Mtaniuliza: “Kwa nini uhuru wangu utegemee dhamiri ya mtu mwingine?

³⁰Ikiwa mimi nashiriki chakula hicho huku namshukuru Mungu, kwa nini nilaumiwe kwa chakula ambacho kwa ajili yake nimemshukuru Mungu?”

³¹Basi, chochote mfanyacho iwe ni kula au kunywa, fanyeni yote kwa ajili ya utukufu wa Mungu.

³²Msiwe kikwazo kwa Wayahudi au kwa Wagiriki au kwa kanisa la Mungu.

³³Muwe kama mimi; najaribu kuwapendeza wote kwa kila njia, bila kutafuta faida yangu mwenyewe ila faida ya wote, wapate kuokolewa.