Mchango wa kusaidia ndugu waumini

¹Sasa, yahusu ule mchango kwa ajili ya watu wa Mungu: fanyeni kama nilivyoyaagiza makanisa ya Galatia.[#16:1 “Watu wa Mungu”, neno kwa neno “watakatifu”. Kuhusu mchango huu na hao walengwa taz Mate 20:1-6 maelezo na Rom 15:25,26,27,28, 29 maelezo. Yawezekana, kutokana na jinsi ya kusema hapa, kwamba Wakorintho walikuwa wamemuuliza Paulo kuhusu mchango huo katika ile barua yao (1Kor 7:1) naye Paulo sasa anawajibu lakini anatoa maagizo mengine zaidi katika barua nyingine (2Kor 8—9).]

²Kila Jumapili kila mmoja wenu atenge kiasi cha fedha kadiri ya mapato yake, ili kusiwe na haja ya kufanya mchango wakati nitakapokuja.

³Wakati nitakapokuja kwenu, nitawatuma wale mtakaowachagua miongoni mwenu wapeleke barua na zawadi zenu Yerusalemu.[#16:3-4 Taz Mate 20:4 maelezo.]

⁴Kama itafaa nami niende, basi, watakwenda pamoja nami.

Mipango ya Paulo

⁵Nitakuja kwenu baada ya kupitia Makedonia — maana nataraji kupitia Makedonia.[#16:5-6 Rejea Mate 19:21 na taz Mate 20:1-6 maelezo.]

⁶Labda nitakaa kwenu kwa muda fulani, au huenda nitakaa pamoja nanyi wakati wote wa baridi, ili mpate kunisaidia niendelee na safari yangu kokote nitakakokwenda.

⁷Sipendi kupita kwenu harakaharaka na kuendelea na safari. Natumaini kukaa kwenu kwa kitambo fulani, Bwana akiniruhusu.

⁸Lakini nitabaki hapa Efeso mpaka siku ya Pentekoste.[#16:8 Mate 19:8-41; taz Mate 19:10 maelezo.]

⁹Mlango uko wazi kabisa kwa ajili ya kazi yangu muhimu hapa, ingawa wapinzani nao ni wengi.

¹⁰Timotheo akija, angalieni asiwe na hofu yoyote wakati yupo kati yenu, kwani anafanya kazi ya Bwana kama mimi.[#16:10 1Kor 4:17.]

¹¹Kwa hiyo mtu yeyote asimdharau, ila msaidieni aendelee na safari yake kwa amani ili aweze kurudi kwangu, maana mimi namngojea pamoja na ndugu zetu.

¹²Kuhusu ndugu Apolo, nimemsihi sana aje kwenu pamoja na ndugu wengine, lakini hapendelei kabisa kuja sasa ila atakuja mara itakapowezekana.[#16:12 1Kor 1:12]

Maneno ya mwisho

¹³Kesheni, simameni imara katika imani, muwe hodari na wenye nguvu.

¹⁴Kila mfanyacho kifanyike kwa upendo.[#16:14 Anachosema Paulo hapa amekiendeleza katika sura ya 13.]

¹⁵Ndugu, mnaifahamu jamaa ya Stefana; wao ni watu wa kwanza kabisa kuipokea imani ya Kikristo katika Akaya, na wamejitolea kuwatumikia watu wa Mungu. Ninawasihi nyinyi ndugu zangu,[#16:15 1Kor 1:16.]

¹⁶muufuate uongozi wa watu kama hao, na uongozi wa kila mtu afanyaye kazi na kutumika pamoja nao.

¹⁷Nafurahi sana kwamba Stefana, Fortunato na Akaiko wamefika; wamelijaza pengo lililokuwako kwa kutokuwako kwenu.[#16:17 Ni dhahiri kwamba hao waumini walifika kutoka Korintho kumtembelea Paulo.]

¹⁸Wameiburudisha roho yangu na yenu pia. Kwa hiyo inafaa kuwakumbuka watu wa namna hii.

¹⁹Makanisa yote ya Asia yanawasalimuni. Akula na Priska pamoja na watu wote wa Mungu walio nyumbani mwao wanawasalimuni sana katika kuungana na Bwana.[#16:19 Mkoa wa Kiroma wakati huo, mji wake mkuu ukiwa ni Efeso. Eneo hilo sasa ni nchi ya Uturuki.; #16:19 Hawa walikuwa hapo kwanza huko Korintho (Mate 18:2-3) halafu huko Efeso (Mate 18:18—19:26). Priska anatajwa pia kama “Priskila”.]

²⁰Ndugu wote wanawasalimuni. Nanyi salimianeni kwa ishara ya mapendo ya Mungu.[#16:20 Neno kwa neno “busu takatifu”. Taz Rom 16:16 maelezo.]

²¹Mimi Paulo nawasalimuni, nikiandika kwa mkono wangu mwenyewe.[#16:21 Baada ya Paulo kutoa imla, alitia sahihi kwa mkono wake mwenyewe na kujazia maneno ya mwisho (rejea Gal 6:11; Kol 4:18; 2Thes 3:17; File 19).]

²²Yeyote asiyempenda Bwana, na alaaniwe. MARANATHA — BWANA, NJOO![#16:22 Gal 1:8-9; maneno yaliyotumika ilipohitajika kwa maana ya “atengwe” yaani, mbali na jumuiya.; #16:22 Neno la Kiaramu lenye maana hiyo. Yamkini neno hilo lilikuwa limechukuliwa lilivyo katika lugha ya Kiaramu na kuingizwa katika sala ya Wakristo.]

²³Neema ya Bwana Yesu iwe nanyi.[#16:23 Paulo anamalizia barua yake kwa maneno kanuni (Rom 16:24; 2Kor 13:13, n.k.) ambayo yanatumika pia katika Ufu 22:20-21 yakiunganishwa na ombi: “Njoo Bwana Yesu!” kama hapa pia.]

²⁴Upendo wangu uwe kwenu katika kuungana na Kristo Yesu.[#16:24 Hati nyingine za kale zinajazia hapa neno “Amina”.]