Elia amkabili mfalme na manabii wa Baali

¹Ikawa baada ya siku nyingi, mnamo mwaka wa tatu wa ukame, neno hili la Mwenyezi-Mungu likamjia Elia: “Nenda ukajioneshe kwa mfalme Ahabu, halafu nitanyesha mvua nchini.”[#18:1 Yaani tangu ule ukame ulipoanza (rejea aya 1).]

²Basi, Elia akaenda kujionesha kwa Ahabu.

Wakati huo, njaa ilikuwa kali sana huko Samaria.

³Basi, Ahabu akamwita Obadia msimamizi wa ikulu. (Obadia alikuwa mtu amchaye Mwenyezi-Mungu sana,[#18:3 Katika Biblia kuna watu kadhaa wanaoitwa Obadia, lakini huyu si yule Obadia aliyekuwa mwandishi wa Kitabu cha nabii Obadia. Tunaambiwa tu alikuwa mcha Mungu na kwamba aliwathamini sana manabii wa Mwenyezi-Mungu. Lakini haisemwi kwamba yeye alikuwa nabii.]

⁴na wakati Yezebeli alipowaua manabii wa Mwenyezi-Mungu, Obadia aliwachukua manabii 100, akawaficha hamsinihamsini pangoni, akawa anawapelekea chakula na maji).[#18:4 Yezebeli (rejea 19:2-18). Yezebeli ndiye aliyemshawishi na kumtia moyo mfalme Ahabu awaruhusu watu wamwabudu Baali. Hao manabii wa Mwenyezi-Mungu ambao baadhi yao Yezebeli aliwaua walikuwa wakikaa katika mahali fulani fulani pa ibada na huenda walikuwa sehemu ya kundi la manabii (1Sam 10:5; 19:20; 2Fal 4:38).]

⁵Kisha, Ahabu akamwambia Obadia, “Labda tutapata majani na hapo tutawaokoa baadhi ya farasi na nyumbu wetu.”

⁶Basi, wakagawana nchi ili wapate kuipitia yote; Ahabu akaenda upande mmoja na Obadia upande mwingine.

⁷Obadia alipokuwa njiani, alikutana na Elia; naye Obadia alipomtambua Elia, aliinama chini na kusema, “Kumbe! Ni wewe bwana wangu Elia?”

⁸Elia akamwambia, “Naam! Ni mimi Elia. Nenda ukamwambie bwana wako kwamba niko hapa.”

⁹Obadia akasema, “Nimekosa nini hata utake kunitia hatarini ili niuawe na mfalme Ahabu?

¹⁰Nakuapia kwa jina la Mwenyezi-Mungu, Mungu wako aliye hai, kwamba mfalme amekuwa akikutafuta duniani kote. Na mfalme yeyote akisema kwamba hujaonekana huko, Ahabu alimtaka huyo mfalme aape na watu wake kwamba kweli hupo.

¹¹Na sasa, wataka niende kumwambia kwamba wewe uko hapa!

¹²Ninahofia kwamba mara nitakapoondoka, Roho ya Mwenyezi-Mungu itakunyakua na kukupeleka mahali nisipopajua! Nikienda kumwambia Ahabu kwamba uko hapa, naye akikutafuta asikupate, ataniua mimi, ingawaje mimi mtumishi wako nimemcha Mwenyezi-Mungu tangu ujana wangu.[#18:12 Si dhahiri kwa nini Obadia anasema hivyo; lakini baadaye Elia atachukuliwa mbinguni kwa namna ya ajabu (2Fal 2:11-12). Taz pia Eze 3:12,14; 8:3; 11:1; 43:5; Mate 8:39.; #18:12 Msemo ambao Obadia anautumia kuonesha heshima kwa Elia kwani hakuwa amemfanyia chochote. Msemo huu waonesha kuwa manabii waliheshimiwa.]

¹³Je, huna habari kwamba Yezebeli alipokuwa akiwaua manabii wa Mwenyezi-Mungu, mimi niliwaficha manabii 100, watu hamsinihamsini pangoni, nikawa nawapa chakula na maji?

¹⁴Sasa waniambia ati niende kumwambia bwana wangu kwamba wewe Elia uko hapa! Ahabu ataniua.”

¹⁵Elia akamwambia, “Nakuapia kwa jina la Mwenyezi-Mungu wa Majeshi, aishivyo ambaye ninamtumikia: leo hii nitajitokeza mbele ya mfalme.”[#18:15 Kwa kutamka kwamba yeye Elia ni mtumishi wa Mwenyezi-Mungu anatumia sifa ambayo ilikuwa hasa ya wafalme wa Israeli ambao wadhifa wao ulikuwa kumtumikia Mwenyezi-Mungu na kuwaongoza watu wazitii amri zake lakini hawakufanya hivyo. Wadhifa wa Elia kama nabii na mtumishi wa Mungu ulikuwa kuwaongoza watu wamrudie Mwenyezi-Mungu.]

¹⁶Basi, Obadia akaenda kwa mfalme Ahabu, akampa habari hizo. Naye Ahabu akaenda kukutana na Elia.

¹⁷Ahabu alipomwona Elia, alisema, “Kumbe kweli ni wewe, mtaabishaji wa Israeli?”

¹⁸Elia akamjibu, “Mtaabishaji wa Israeli si mimi, bali ni wewe na jamaa ya baba yako. Nyinyi mmekiuka amri za Mwenyezi-Mungu na kuabudu Mabaali.

¹⁹Sasa, uwakusanye watu wote wa Israeli mbele yangu huko mlimani Karmeli. Hali kadhalika, wakusanye wale manabii 450 wa Baali, na manabii 400 wa Ashera mungu wa kike, ambao huhifadhiwa na malkia Yezebeli.”[#18:19 Mlima huu uko pwani ya Bahari ya Mediteranea karibu na upande wa magharibi wa bonde la Yezreeli.]

²⁰Basi, Ahabu akawaita watu wote wa Israeli, akawakusanya na manabii wote kule mlimani Karmeli.

²¹Kisha, Elia akawakaribia watu hao, akawaambia, “Mtasitasita na kuyumbayumba mioyoni mpaka lini? Ikiwa Mwenyezi-Mungu, ndiye Mungu mfuateni; lakini ikiwa Baali ni Mungu, basi, mfuateni yeye.” Lakini watu hawakumjibu neno lolote.[#18:21 Katika ushindani huu kati ya nguvu za Baali na nguvu za Mungu, Elia anawakabili watu mara tatu kuwataka waamue: anawalaumu kwa kumwabudu Baali badala ya Mungu (18:21); atawaonesha ni nani aliye mkuu zaidi, Mungu au Baali (18:22-24) na mwishowe atawataka wawaangamize manabii wa Baali (18:39-40).]

²²Hapo, Elia akawaambia, “Mimi tu ndiye peke yangu nabii wa Mwenyezi-Mungu niliyebaki, lakini manabii wa Baali wapo 450.

²³Haya! Leteni fahali wawili; manabii wa Baali wajichagulie fahali mmoja, wamchinje, wamkate vipandevipande na kumweka juu ya kuni, bila kuwasha moto. Nami pia nitamtwaa huyo fahali mwingine, nitamchinja na kumweka juu ya kuni bila kuwasha moto.

²⁴Kisha, wao watamwomba mungu wao, nami nitamwomba Mwenyezi-Mungu. Mungu atakayejibu kwa kuleta moto, huyo ndiye Mungu wa kweli.” Na hapo umati wote ukasema, “Naam! Na iwe hivyo.”

²⁵Kisha, Elia akawaambia manabii wa Baali, “Nyinyi ni wengi; basi anzeni. Jichagulieni fahali, mtayarisheni na kumwomba mungu wenu, lakini msiwashe moto.”

²⁶Hao manabii wakamtwaa fahali wao waliyepewa, wakamtayarisha, kisha wakaanza kumlilia Baali kutoka asubuhi hadi adhuhuri, wakirukaruka na kuyumbayumba kuizunguka madhabahu waliyotengeneza wakisema: “Ee Baali, utusikie!” Lakini hapakutokea sauti yoyote, wala hakuna aliyewajibu.

²⁷Ilipofika saa sita mchana, Elia akaanza kuwadhihaki akisema, “Ombeni kwa sauti kubwa zaidi! Yeye ni mungu ati! Huenda ikawa amezama katika mawazo yake, amekwenda haja, au yumo safarini! Labda amelala, mnapaswa kumwamsha!”

²⁸Manabii hao wakapiga kelele zaidi, wakajikatakata kwa visu na simi, kufuatana na desturi yao, hata wakabubujika damu.[#18:28 Kujikatakata kama sehemu mojawapo ya ibada na maombolezo ilikuwa kawaida huko Mashariki ya Kati ya Kale (taz Lawi 19:27-28; 21:5; Kumb 14:1 Hos 7:14).]

²⁹Wakaendelea kupiga makelele na kufanya kama wendawazimu hadi alasiri wakati wa kutoa tambiko; lakini hakuna aliyewajibu wala kuwajali.

³⁰Basi, Elia akawaambia watu, “Sogeeni karibu nami.” Wao wakamkaribia. Kisha Elia akaijenga upya madhabahu ya Mwenyezi-Mungu iliyokuwa imebomolewa.

³¹Alitwaa mawe kumi na mawili, hesabu ya makabila kumi na mawili yaliyopewa majina ya wana wa Yakobo ambaye Mwenyezi-Mungu alimwambia “Jina lako litakuwa Israeli.”

³²Kwa mawe hayo, Elia alimjengea Mwenyezi-Mungu madhabahu, akachimba na mtaro kuizunguka madhabahu hiyo; mtaro uwezao kuchukua kama debe moja na nusu la nafaka.

³³Kisha akapanga kuni vizuri, akamkata vipandevipande yule fahali, akaviweka juu ya kuni. Kisha akawaambia watu, “Jazeni mitungi minne maji mkaimwagie tambiko hii ya kuteketezwa pamoja na kuni.” Wakafanya hivyo.[#18:33 Kitendo cha kumwaga maji kilikuwa na shabaha ya kuonesha ilivyo vigumu kabisa kuwasha moto hapo na hivyo kuonesha ukuu wa Mungu juu ya Baali.]

³⁴Kisha akawaambia, “Rudieni tena.” Nao wakafanya hivyo mara ya pili. Naye akawaambia, “Fanyeni hivyo tena mara ya tatu.” Nao wakafanya hivyo.

³⁵Maji yakatiririka chini pande zote za madhabahu, hata yakajaa mtaroni.

³⁶Mnamo alasiri, wakati wa kutoa tambiko, nabii Elia aliikaribia madhabahu, akaomba, “Ee Mwenyezi-Mungu, Mungu wa Abrahamu, Isaka na Yakobo, waoneshe watu leo hii kwamba wewe ndiwe Mungu wa Israeli, na kwamba mimi ni mtumishi wako na nimefanya mambo haya kwa amri yako.

³⁷Unijibu, ee Mwenyezi-Mungu; unijibu ili watu hawa wajue kuwa wewe Mwenyezi-Mungu ndiwe Mungu, na kwamba umeigeuza mioyo yao wakurudie.”

³⁸Mara, Mwenyezi-Mungu akashusha moto, ukaiteketeza tambiko hiyo ya kuteketezwa, kuni, mawe na vumbi, na kuyakausha maji yote mtaroni.

³⁹Watu walipoona hivyo, walianguka kifudifudi na kusema, “Mwenyezi-Mungu, ni Mungu; Mwenyezi-Mungu, ni Mungu!”

⁴⁰Ndipo Elia akawaambia, “Wakamateni manabii wote wa Baali. Msimwache hata mmoja wao atoroke!” Basi, watu wakawakamata wote, naye Elia akawapeleka mtoni Kishoni, akawaulia huko.

Mwisho wa ukame

⁴¹Baada ya hayo, Elia akamwambia mfalme Ahabu, “Nenda ukale na kunywa. Nasikia kishindo cha mvua.”[#18:41 Kwa sababu ya hiyo njaa iliyowakaba watu kutokana na ukame, watu walikuwa wanafunga kama ishara ya kumwomba Mungu aondoe baa hilo la njaa. Sasa nabii anamwambia Ahabu aende kula na kunywa kama namna ya kusema afanye sherehe kwani mwisho wa ukame unakaribia.]

⁴²Basi, Ahabu akaenda zake kula na kunywa; naye Elia akapanda juu ya kilele cha mlima Karmeli, na huko akainama hadi chini na kuuweka uso wake katikati ya magoti yake.

⁴³Kisha akamwambia mtumishi wake, “Sasa, nenda utazame upande wa baharini.” Mtumishi akaenda, akatazama, kisha akarudi akasema, “Hamna kitu.” Elia akamwambia, “Nenda tena mara saba.”

⁴⁴Mara ya saba, huyo mtumishi akarudi, akasema, “Naona wingu dogo kama mkono wa mtu linatoka baharini.” Elia akamwambia, “Nenda umwambie mfalme Ahabu atayarishe gari lake la kukokotwa, ateremke, asije akazuiliwa na mvua.”

⁴⁵Muda haukupita mrefu mbingu zikatanda mawingu mazito, upepo ukavuma, pakanyesha mvua kubwa. Ahabu naye akapanda gari lake la kukokotwa, akarudi Yezreeli.

⁴⁶Nguvu ya Mwenyezi-Mungu ikamjia Elia, naye akajifunga na kukaza joho lake, akakimbia na kumtangulia Ahabu kuingia mjini Yezreeli.[#18:46 Kitendo hiki cha kutangulia ni cha mfano: kiongozi wa kweli wa watu ni nabii wa Mungu na sio mfalme Ahabu.]