Muwe tayari kwa siku ya Bwana

¹Ndugu, hakuna haja ya kuwaandikieni juu ya nyakati na majira ya mambo haya yatakapotukia.

²Maana nyinyi wenyewe mwajua kwamba siku ya Bwana itakuja kama mwizi ajavyo usiku.

³Watu watakapokuwa wanasema: “Kila kitu ni shwari na salama”, ndipo uharibifu utakapowaangukia ghafla! Mambo hayo yatatukia ghafla kama uchungu wa uzazi unavyomjia mama anayejifungua, wala watu hawataweza kuepukana nayo.[#5:3 Isa 13:8; Yer 6:24; taz Mat 24:6-8 maelezo.]

⁴Lakini nyinyi, ndugu, hamko gizani, na siku hiyo haipaswi kuwajieni ghafla kama vile mwizi.

⁵Nyinyi nyote ni watu mnaoishi katika mwanga, watu wa mchana. Sisi si watu wa usiku, wala wa giza.

⁶Basi, tusilale usingizi kama wengine; tunapaswa kukesha na kuwa na kiasi.

⁷Wanaolala hulala usiku, na walevi hulewa usiku.

⁸Lakini sisi ni watu wa mchana na tunapaswa kuwa na kiasi. Tunapaswa kuvaa imani na upendo kama vazi la kujikinga kifuani, na tumaini letu la wokovu kama kofia ya chuma.[#5:8 Paulo anatumia hapa vyombo vya vita vya askari wa Kiroma kuonesha jinsi Mkristo anavyopaswa kujiweka tayari na kuwa imara kwa imani, upendo na matumaini. Taz 1 Thes 1:3. Picha hiyo inaendelezwa kikamilifu zaidi katika Efe 6:11-17; taz Efe 6:11 maelezo.]

⁹Maana Mungu hakututeua ili tuangamizwe na ghadhabu yake, bali tuupate wokovu kwa njia ya Bwana wetu Yesu Kristo

¹⁰ambaye alikufa kwa ajili yetu, ili tuishi pamoja naye, iwe tu hai au tumekufa.[#5:10 Taz 1Thes 4:14-17.]

¹¹Kwa hiyo farijianeni na kusaidiana nyinyi kwa nyinyi, kama mnavyofanya sasa.

Maagizo ya mwisho na salamu

¹²Ndugu, tunawaombeni muwastahi wale wanaofanya kazi kati yenu, wale wanaowaongoza na kuwafundisheni kuhusu maisha ya Kikristo.

¹³Wapeni heshima kubwa na kuwapenda kwa sababu ya kazi wanayofanya. Muwe na amani kati yenu.

¹⁴Ndugu, tunawahimizeni muwaonye watu walio wavivu, muwatie moyo watu wanyonge, muwasaidie watu dhaifu, muwe na subira kwa wote.[#5:14 Labda yahusu watu walio dhaifu kiroho, ambao hawakukomaa kuhusu imani ya Kikristo. Taz Rom 14:1-2; 15:1; 1Kor 8:7-13.]

¹⁵Angalieni mtu yeyote asimlipe mwingine maovu kwa maovu, ila nia yenu iwe kutendeana mema daima na kuwatendea mema watu wote.[#5:15 Rom 12:17; 1Pet 3:9; rejea Mat 5:38-39.]

¹⁶Furahini daima,

¹⁷salini kila wakati

¹⁸na kuwa na shukrani katika kila hali. Hayo ndiyo anayotaka Mungu kwenu katika kuungana kwenu na Kristo Yesu.

¹⁹Msimpinge Roho Mtakatifu;

²⁰msidharau unabii.[#5:20 Kuhusu kipaji cha unabii, taz 1Kor 14:1 maelezo.]

²¹Pimeni kila kitu: zingatieni kilicho chema,

²²na kuepuka kila aina ya uovu.

²³Mungu mwenyewe anayetupatia amani awatakase nyinyi kabisa kwa kila namna na kuzilinda nafsi zenu — roho, mioyo na miili yenu — mbali na hatia yoyote wakati wa kuja kwake Bwana wetu Yesu Kristo.[#5:23 Maneno yanayotumika kutaja nafsi yote ya mtu.]

²⁴Yeye anayewaita nyinyi atafanya hivyo kwani ni mwaminifu.[#5:24 1 Kor 1:9; 2 Thes 3:3.]

²⁵Ndugu, tuombeeni na sisi pia.

²⁶Wasalimuni ndugu wote kwa ishara ya upendo.[#5:26 Taz Rom 16:16 maelezo.]

²⁷Nawahimizeni kwa jina la Bwana muwasomee ndugu zetu wote barua hii.

²⁸Tunawatakieni neema ya Bwana wetu Yesu Kristo.[#5:28 Katika hati nyingine za kale aya hii inaishia na neno “Amina”.]