¹Basi, nimeamua nisiwatembelee tena kuwatia huzuni.[#2:1 Ionekanavyo mahala pengine, hasa katika 2Kor 12:14, Paulo aliwatembelea Wakristo wa Korintho mara mbili. Yamkini ni wakati wa ziara hiyo ya pili Paulo alipohuzunishwa na mtu fulani naye Paulo akaitaka hiyo jumuiya kumchukulia hatua kali mtu huyo.]

²Maana nikiwahuzunisha nyinyi, basi, ni nani atakayenifariji? Ni walewale niliowahuzunisha!

³Ndiyo maana niliwaandikia: sikutaka kuja kwenu na kuhuzunishwa na nyinyi ambao ndio mngepaswa kuwa furaha yangu. Nina hakika kwamba mimi nikifurahi, nyinyi nyote pia mnafurahi.[#2:3-4 Ling na 2Kor 7:8-12. Yahusu barua nyingine ambayo Paulo aliandika baada ya ile ya kwanza na kabla ya hii Barua ya pili kwa Wakorintho.]

⁴Nilipowaandikia hapo awali katika hali ya huzuni na sikitiko moyoni na kwa machozi mengi, haikuwa kwa ajili ya kuwahuzunisha nyinyi, bali kwa ajili ya kuwaonesheni kwamba nawapenda mno.

Msamaha

⁵Ikiwa kuna mtu aliyemhuzunisha mwingine, hakunihuzunisha mimi, ila amewahuzunisha nyinyi nyote, na sipendi kuwa mkali zaidi.

⁶Adhabu aliyokwisha pata kutoka kwa wengi wenu inamtosha.[#2:6 Paulo anasema juu ya adhabu ambayo yeye na Wakorintho waliijua; labda ilikuwa adhabu ya kutengwa na jumuiya ya waumini. Lakini Paulo anawataka Wakorintho wamsamehe mtu huyo na kumpa moyo (aya 7).]

⁷Iliyobakia ni afadhali kwenu kumsamehe mtu huyo na kumpa moyo ili asije akahuzunika mno na kukata tamaa kabisa.

⁸Kwa hiyo nawasihi: mwonesheni kwamba mnampenda.

⁹Madhumuni yangu ya kuandika ile barua yalikuwa kutaka kujua kama mko tayari kutii katika kila jambo.

¹⁰Mkimsamehe mtu, nami pia ninamsamehe. Maana ninaposamehe, kama kweli ninacho cha kusamehe, nasamehe mbele ya Kristo kwa ajili yenu,

¹¹ili tusimpe nafasi Shetani atudanganye; maana twaijua mipango yake ilivyo.

Wasiwasi wa Paulo mjini Troa

¹²Nilipofika Troa kuhubiri Habari Njema ya Kristo, nilikuta mlango u wazi kwa ajili ya kazi ya Bwana.

¹³Lakini nilifadhaika sana kwa kutomkuta ndugu yetu Tito. Ndiyo maana niliwaaga wote pale nikaenda Makedonia.[#2:13 Paulo alikuwa amemtuma Tito Korintho (labda pamoja na ile barua anayotaja katika 2:3-4) na yamkini alikuwa anatazamia kupata habari za Wakorintho na alikuwa na wasiwasi sana juu ya kukawia kwake Tito.; #2:13 Kama kawaida ni namna au neno la kumtaja Mkristo kwa vile Wakristo wote ni kama wa jamaa moja ya Mungu au ya Kristo.; #2:13 Alikuwa mwenzi wake Paulo katika kuhubiri Habari Njema. Huyu ndiye yule yule aliyeandikiwa barua ijulikanayo sasa kama “Barua kwa Tito”. Kama jina lake linavyoashiria, yeye hakuwa Myahudi.]

Ushindi kwa msaada wa Kristo

¹⁴Lakini, shukrani kwa Mungu anayetuongoza daima katika msafara wa ushindi wa Kristo. Yeye hutufanya tuueneze ukweli wa Kristo kama harufu nzuri, kila mahali.[#2:14 Tafsiri nyingine yamkini: “Shukrani kwa Mungu ambaye hutuwezesha kushinda kwa kuungana na Kristo”.]

¹⁵Maana sisi ni kama harufu nzuri ya ubani ambayo Kristo anamtolea Mungu, harufu nzuri inayofikia wote, wanaookolewa na wanaopotea.

¹⁶Kwa wale wanaopotea, harufu hiyo ni kifo; lakini kwa wale wanaookolewa, harufu hiyo ni uhai. Nani basi, awezaye kushiriki katika kazi ya namna hiyo?

¹⁷Sisi si kama wengine ambao hufanya biashara na ujumbe wa Mungu; sisi tunahubiri kwa unyofu mbele ya Mungu, kama watu tuliotumwa na Mungu, tukiwa tumeungana na Kristo.