Kuongoka kwa Saulo

¹Wakati huo Saulo alikuwa akizidisha vitisho vikali vya kuwaua wafuasi wa Bwana. Alikwenda kwa kuhani mkuu,[#9:1 Aitwaye Paulo kuanzia sura 13:9 (taz maelezo ya 7:58).]

²akaomba apatiwe barua za utambulisho kwa masunagogi ya Kiyahudi kule Damasko, ili akikuta huko wanaume au wanawake wanaofuata Njia hiyo, awakamate na kuwaleta Yerusalemu.[#9:2 Yaani kutoka kwa viongozi wa kidini wa Wayahudi au, aghalabu, kutoka kwa Baraza Kuu la Wayahudi.; #9:2 Mji maarufu kupita yote huko Siria na ambako kulikuwa na jamii kubwa ya Wayahudi.; #9:2 Jina la kupanga kukitaja kikundi cha Wakristo, wafuasi wa Bwana Yesu, na kumaanisha mwenendo wao wa kutenda na kuishi; ling na matumizi ya mara kwa mara ya neno “njia” katika Zaburi na Methali. Taz pia Mate 19:9,23; 22:4; 24:14,22 na Yoh 14:6.]

³Lakini alipokuwa njiani karibu kufika Damasko, ghafla mwanga kutoka angani ulimwangazia pande zote.

⁴Akaanguka chini na kusikia sauti ikimwambia: “Saulo, Saulo! Kwa nini unanitesa?”[#9:4 Ling na Mat 10:40; 25:40,45; Luka 10:16; kuwatesa waumini ni kumtesa Yesu.]

⁵Naye Saulo akauliza, “Ni nani wewe Bwana?” Na ile sauti ikajibu, “Mimi ni Yesu ambaye wewe unamtesa.

⁶Lakini simama sasa, uingie mjini na huko utaambiwa unachopaswa kufanya.”

⁷Wale watu waliokuwa wanasafiri pamoja na Saulo walisimama pale, wakiwa hawana la kusema; walisikia ile sauti lakini hawakumwona mtu.

⁸Saulo aliinuka, na alipofumbua macho yake hakuweza kuona chochote; hivyo wale watu wakamwongoza kwa kumshika mkono mpaka mjini Damasko.

⁹Saulo alikaa siku tatu bila kuona, na wakati huo hakula au kunywa chochote.

¹⁰Basi, huko Damasko kulikuwa na mfuasi mmoja aitwaye Anania. Bwana akamwambia katika maono, “Anania!” Anania akaitika, “Niko hapa, Bwana.”

¹¹Naye Bwana akamwambia, “Jitayarishe uende kwenye barabara inayoitwa Barabara ya Moja kwa Moja, na katika nyumba ya Yuda umtake mtu mmoja kutoka Tarso aitwaye Saulo. Sasa anasali;[#9:11 Yamkini barabara mojawapo maarufu huko Damasko.; #9:11 Taz maelezo ya 11:25.]

¹²na katika maono ameona mtu aitwaye Anania akiingia ndani na kumwekea mikono ili apate kuona tena.”

¹³Lakini Anania akajibu, “Bwana, nimesikia habari za mtu huyu kutoka kwa watu wengi; nimesikia juu ya mabaya aliyowatendea watu wako huko Yerusalemu.

¹⁴Na amekuja hapa akiwa na mamlaka kutoka kwa makuhani wakuu kuwatia nguvuni wote wanaoomba kwa jina lako.”

¹⁵Lakini Bwana akamwambia, “Nenda tu, kwa maana nimemchagua awe chombo changu, alitangaze jina langu kwa mataifa na wafalme wao na kwa watu wa Israeli.[#9:15 Mate 22:21; Rom 1:5; Gal 1:16. Paulo anajulikana kama “Mtume wa Mataifa” au wa watu wa mataifa mengine (wasio Wayahudi); Ling Rom 11:13. Ingawa kwa jumla ujumbe wake ulielekezwa kwa watu wa mataifa mengine, Paulo aliwahubiria pia Waisraeli na wafalme (Mate 25:22-23; 26:1).]

¹⁶Mimi mwenyewe nitamwonesha mengi yatakayomlazimu kuteswa kwa ajili ya jina langu.”

¹⁷Basi, Anania akaenda, akaingia katika hiyo nyumba. Kisha akaweka mikono yake juu ya Saulo, akasema, “Ndugu Saulo, Bwana ambaye ndiye Yesu mwenyewe aliyekutokea ulipokuwa njiani kuja hapa, amenituma ili upate kuona tena na kujazwa Roho Mtakatifu.”[#9:17 Angalia maelezo ya Mate 6:6.]

¹⁸Mara vitu kama magamba vikaanguka kutoka machoni mwa Saulo, akaweza kuona tena. Akasimama, akabatizwa.

¹⁹Na baada ya kula chakula, nguvu zake zikamrudia.

Saulo anahubiri huko Damasko

Saulo alikaa siku chache pamoja na wafuasi huko Damasko.

²⁰Mara alianza kuhubiri katika masunagogi kwamba Yesu ni Mwana wa Mungu.[#9:20 Hapa tu katika kitabu chote cha Matendo (taz Zab 2:7 ambayo imekaririwa katika 13:33).]

²¹Watu wote waliomsikia walishangaa, wakasema, “Je, mtu huyu si yuleyule aliyewaua wale waliokuwa wanaomba kwa jina hili kule Yerusalemu? Tena alikuja hapa akiwa na madhumuni ya kuwatia nguvuni watu hao na kuwapeleka kwa makuhani!”

²²Saulo alizidi kupata nguvu, na kwa jinsi alivyothibitisha wazi kwamba Yesu ndiye Kristo, Wayahudi wa huko Damasko walivurugika kabisa.[#9:22 Paulo alifanya hivyo kwa kutumia Maandiko Matakatifu (taz Mate 17:2-5; na pia 18:28).]

²³Baada ya siku nyingi kupita, Wayahudi walikusanyika na kufanya mpango wa kumuua Saulo.

²⁴Lakini Saulo alipata habari ya mpango huo. Usiku na mchana walilinda milango ya kuingia mjini ili wapate kumuua.

²⁵Lakini wakati wa usiku wanafunzi wake walimchukua, wakamteremsha chini ndani ya kapu kubwa kwa kupitia nafasi iliyokuwako ukutani.

Saulo anarudi Yerusalemu

²⁶Saulo alipofika Yerusalemu alijaribu kujiunga na wale wanafunzi. Lakini wote walimwogopa hawakuweza kuamini kwamba yeye amekuwa mfuasi.

²⁷Hapo, Barnaba alikuja akamchukua Saulo, akampeleka kwa mitume na kuwaeleza jinsi Saulo alivyomwona Bwana njiani na jinsi Bwana alivyoongea naye. Aliwaambia pia jinsi Saulo alivyokuwa amehubiri bila woga kule Damasko.

²⁸Basi, Saulo alikaa pamoja nao, akatembelea Yerusalemu yote akihubiri neno la Bwana bila hofu.

²⁹Pia aliongea na kubishana na Wayahudi wanaoongea Kigiriki, lakini wao walijaribu kumwua.[#9:29 Neno kwa neno: taz maelezo ya Mate 6:1.]

³⁰Wale ndugu walipogundua jambo hilo, walimchukua Saulo, wakampeleka Kaisarea, wakamwacha aende zake Tarso.[#9:30 Taz maelezo ya Mate 1:16.]

³¹Wakati huo kanisa likawa na amani popote katika Yudea, Galilaya, na Samaria. Lilijengwa na kukua katika kumcha Bwana, na kuongezeka likitiwa moyo na Roho Mtakatifu.

Ainea anaponywa

³²Petro alipokuwa anasafirisafiri kila mahali alifika pia kwa watu wa Mungu waliokuwa wanaishi Luda.

³³Huko alimkuta mtu mmoja aitwaye Ainea ambaye kwa muda wa miaka minane alikuwa amelala kitandani kwa sababu alikuwa amepooza.

³⁴Basi, Petro akamwambia, “Ainea, Yesu Kristo anakuponya. Amka utandike kitanda chako.” Ainea akaamka mara.

³⁵Wakazi wote wa Luda na Saroni walimwona Ainea, na wote wakamgeukia Bwana.

Dorka anaponywa

³⁶Kulikuwa na mfuasi mmoja mwanamke mjini Yopa aitwaye Tabitha (kwa Kigiriki ni Dorka, maana yake, Paa). Huyo mwanamke alikuwa akitenda mema na kuwasaidia maskini daima.[#9:36 Mji wa sasa ni Yaffa. Ni hapa tu katika Matendo ambapo mwanamke anatajwa kama]

³⁷Wakati huo ikawa kwamba aliugua, akafa. Watu wakauosha mwili wake, wakaulaza katika chumba ghorofani.

³⁸Yopa si mbali sana na Luda; kwa hiyo wafuasi waliposikia kwamba Petro alikuwa Luda, wakawatuma watu wawili kwake na ujumbe: “Njoo kwetu haraka iwezekanavyo.”

³⁹Basi, Petro akaenda pamoja nao. Alipofika alipelekwa ghorofani katika kile chumba. Huko wajane wengi walimzunguka Petro wakilia na kumwonesha makoti na nguo ambazo Dorka alikuwa akitengeneza wakati alipokuwa hai.

⁴⁰Petro aliwatoa nje wote, akapiga magoti, akasali. Kisha akaigeukia ile maiti, akasema, “Tabitha, amka.” Naye akafumbua macho yake, na alipomwona Petro, akaketi.[#9:40 Hapa tu na katika Luka 7:15; mahali pote pawili kuhusu mtu aliyekufa akafufuliwa.]

⁴¹Petro akamsaidia kusimama, halafu akawaita wale watu wa Mungu na wale wajane, akamkabidhi kwao akiwa mzima.

⁴²Habari za tukio hili zilienea kila mahali huko Yopa, na watu wengi wakamwamini Bwana.

⁴³Petro alikaa siku kadhaa huko Yopa, akiishi kwa mtu mmoja mtengenezaji wa ngozi aitwaye Simoni.