¹Ee Yerusalemu, vua vazi lako la huzuni na mateso,

ukavae milele uzuri wa utukufu wa Mungu.

²Jivike joho la uadilifu utokao kwa Mungu;

vaa kichwani taji la utukufu wa Mungu wa milele.

³Maana Mungu atadhihirisha fahari yako kila mahali duniani.

⁴Mungu atakupa jina hili milele:

“Amani kwa uadilifu; fahari kwa uchaji wa Mungu.”

⁵Inuka, ee Yerusalemu, usimame milimani,

tazama upande wa mashariki,

uwaone watoto wako wamekusanywa kutoka mashariki na magharibi,

kwa amri ya Mungu Mtakatifu.

Wanashangilia kwani Mungu amewakumbuka.

⁶Waliondoka kwako kwa miguu,

wakichukuliwa na maadui zako.

Lakini Mungu atawarejesha tena kwako

wakiwa wamebebwa kwa fahari kama juu ya kiti cha enzi cha mfalme.

⁷Mungu ametoa amri:

milima na vilima visawazishwe, na mabonde yafukiwe, nchi yote iwe tambarare,

Waisraeli watembee salama kwa utukufu wa Mungu.

⁸Kwa amri ya Mungu,

vichaka na miti itoayo harufu nzuri itawapa kivuli Waisraeli.

⁹Mungu atawaongoza Waisraeli kwa furaha;

kwa mwanga wa utukufu wake, kwa uadilifu utokao kwake mwenyewe.