Agano linathibitishwa

¹Mwenyezi-Mungu akamwambia Mose, “Njoni kwangu, wewe Aroni, Nadabu na Abihu, pamoja na wazee sabini wa Israeli, mniabudu kwa mbali.[#24:1 Hawa walikuwa watoto wa Aroni (Kut 6:23). Hao wawili waliuawa kwa sababu ya kukataa kumtii Mwenyezi-Mungu (Lawi 10:1-2; Hes 3:4; 20:25-28). Na, kuhusu hao “wazee” inaonekana kwamba hawa walikuwa wawakilishi wa watu wote ambao wanatajwa kwa mara ya kwanza katika Kut 3:16 kama “wazee wa Waisraeli”.]

²Wewe Mose peke yako ndiwe utakayenikaribia, lakini wengine wasije karibu, na Waisraeli wasipande mlimani pamoja nawe.”

³Basi, Mose akaenda na kuwaambia watu wote maneno na maagizo yote Mwenyezi-Mungu aliyomwambia. Watu wote wakajibu kwa sauti moja, “Mambo yote aliyoyasema Mwenyezi-Mungu, tutayafanya.”

⁴Mose akayaandika maagizo yote ambayo Mwenyezi-Mungu alimpa. Kisha akaamka asubuhi na mapema, akajenga madhabahu chini ya mlima na kusimamisha nguzo kumi na mbili kulingana na idadi ya makabila kumi na mbili ya Israeli.[#24:4 Hapa, katika mazingira ya kuratibisha agano, “madhabahu” inawakilisha Mwenyezi-Mungu. Na hizo nguzo ni ishara wakilishi za ushahidi na pia ukumbusho wa agano lililoadhimishwa mahali hapo. Taz Mwa 31:44-53; Yos 4:7; 24:27.]

⁵Kisha akawatuma vijana wa Waisraeli wamtolee Mwenyezi-Mungu sadaka za kuteketezwa na kumchinjia sadaka za amani za ng'ombe.

⁶Mose akachota nusu ya damu ya wanyama hao na kuiweka katika mabirika, na nusu nyingine akairashia ile madhabahu.[#24:6 Taz Mat 26:28; Marko 14:24; Luka 22:20; 1Kor 11:25; Ebr 9:19-20; 10:29. Hapa, damu ambayo katika utamaduni wa A.K. ilichukuliwa kuwa ni makao ya uhai, inatumika kuratibisha lile agano na kuweka uhusiano wa kudumu kati ya Waisraeli na Mwenyezi-Mungu.]

⁷Kisha akachukua kitabu cha agano la Mwenyezi-Mungu, akakisoma mbele ya watu, nao wakasema, “Hayo yote aliyoyasema Mwenyezi-Mungu, tutayafanya, nasi tutakuwa watiifu.”

⁸Mose akaichukua ile damu na kuwanyunyizia watu, akisema, “Hii ndiyo damu ya agano ambalo Mwenyezi-Mungu amelifanya nanyi kufuatana na maneno haya yote.”

⁹Kisha Mose, Aroni, Nadabu na Abihu na wazee sabini wa Israeli wakapanda mlimani,

¹⁰wakamwona Mungu wa Israeli. Chini ya miguu yake kulikuwa na kitu kama sakafu ya mawe ya johari ya rangi ya samawati, kikiwa safi kama mbingu angavu.

¹¹Na Mungu hakuwadhuru hao viongozi wa watu wa Israeli. Walimwona Mungu, wakala na kunywa.[#24:11 Katika agano na Abimeleki (Mwa 26:26-31) na lile la Yakobo na Labani (Mwa 31:54) kulikuwa pia na chakula na kinywaji cha kushiriki pamoja.]

Mose mlimani Sinai

¹²Mwenyezi-Mungu akamwambia Mose, “Njoo kwangu juu mlimani, ungoje huko. Mimi nitakupa vibao viwili vya mawe vyenye sheria na amri nilizoandika kwa ajili ya kuwafunza Waisraeli.”

¹³Basi, Mose akaondoka pamoja na Yoshua, mtumishi wake, akaenda kwenye mlima wa Mungu.

¹⁴Mose aliwaambia wale wazee, “Tungojeni hapa mpaka tutakapowarudia. Aroni na Huri wako pamoja nanyi; yeyote aliye na tatizo na awaendee wao.”

¹⁵Basi, Mose akaenda mlimani, na wingu likaufunika mlima.

¹⁶Utukufu wa Mwenyezi-Mungu ukatua juu ya mlima Sinai na wingu likaufunika mlima kwa muda wa siku sita. Siku ya saba Mungu akamwita Mose kutoka katikati ya lile wingu.

¹⁷Utukufu wa Mwenyezi-Mungu ulionekana mbele ya macho ya watu wa Israeli kama moto unaowaka juu ya mlima.

¹⁸Mose akaingia ndani ya lile wingu, akapanda mlimani. Alikaa huko kwa muda wa siku arubaini, mchana na usiku.[#24:18 Katika aya hii simulizi hili linawekwa kando kwa muda mpaka Kut 32 ambapo panatajwa tena kukaa kwake Mose kule juu mlimani. Na kuhusu muda wa siku “arubaini” taz Mwa 7:12 maelezo.]