Abrahamu anamtoa Isaka sadaka

¹Baada ya muda fulani, Mungu alimjaribu Abrahamu. Mungu alimwita, “Abrahamu!” Naye akaitika, “Naam nasikiliza.”

²Mungu akamwambia, “Mchukue mwanao, Isaka, mwanao wa pekee umpendaye, uende mpaka nchi ya Moria, ukamtoe sadaka ya kuteketezwa juu ya mlima mmojawapo nitakaokuonesha.”[#22:2 Ndivyo katika Kiebrania lakini tafsiri ya Kigiriki ya Septuajinta (LXX) badala ya maneno hayo tuna “Mwanao mpendwa”. A.J. linafuata makala ya Septuajinta na kutumia maneno hayo kuhusu Yesu Kristo (Mat 3:17). Taz Efe 1:6.; #22:2 Eneo hilo halijulikani kwa uhakika. Katika 2Nya 3:1 jina la “mlima wa Moria” linataja mahali ambapo Solomoni alijenga hekalu la Yerusalemu.]

³Basi, kesho yake, Abrahamu akaamka asubuhi na mapema, akatandika punda wake, akawachukua watumishi wake wawili pamoja na Isaka mwanawe. Akatayarisha kuni kwa ajili ya sadaka ya kuteketezwa, kisha akaanza safari kuelekea mahali alipoambiwa na Mungu.

⁴Mnamo siku ya tatu, Abrahamu aliinua macho akapaona mahali hapo kwa mbali.

⁵Akawaambia wale watumishi wake, “Ngojeni hapa na huyu punda. Mimi na mwanangu tutakwenda mpaka kule, tukamwabudu Mungu, kisha tutawarudiani.”

⁶Basi, Abrahamu akazitwaa zile kuni, akamtwika Isaka mwanawe; yeye mwenyewe akachukua moto na kisu mkononi; wakaondoka pamoja.

⁷Isaka akamwuliza baba yake, “Baba, moto na kuni tunazo; lakini mwanakondoo wa sadaka ya kuteketezwa yuko wapi?”

⁸Abrahamu akamjibu, “Mwanangu, Mungu mwenyewe atatujalia mwanakondoo wa sadaka ya kuteketezwa.” Basi, wakaendelea na safari yao.[#22:8 Katika Kiebrania, maneno “Mungu atajalia” ni jina la Mlima. Na “Moria” linatamkika kama Kiebrania cha “Mungu atajalia”. Kitenzi hicho hicho ‘jalia’ kinatumika pia katika aya ya 14.]

⁹Walipofika mahali ambapo Mungu alimwagiza, Abrahamu akajenga madhabahu na kupanga kuni juu yake. Kisha akamfunga Isaka mwanawe na kumlaza juu ya kuni juu ya madhabahu.

¹⁰Abrahamu akaunyosha mkono wake, akatwaa kisu tayari kumchinja mwanawe.

¹¹Lakini malaika wa Mwenyezi-Mungu akamwita kutoka mbinguni, “Abrahamu! Abrahamu!” Naye akaitika, “Naam, nasikiliza!”[#22:11 Taz Mwa 16:7 maelezo.]

¹²Malaika akamwambia, “Usimdhuru mtoto wala usimfanye lolote! Sasa ninajua kwamba unamcha Mungu, kwani hukuninyima hata mwanao wa pekee.”

¹³Ndipo Abrahamu akatazama, akaona kondoo dume amenaswa pembe zake kichakani. Basi, akaenda, akamchukua huyo kondoo, akamtoa sadaka ya kuteketezwa badala ya mwanawe.[#22:13 Kitendo cha kubadili kafara ya binadamu kwa kafara ya mnyama chaweza pia kueleweka kwamba kafara za binadamu hazikubaliki au ni mwiko. Watu wa makabila mengine jirani na Israeli mara kwa mara walitambika kafara za binadamu hasa wakati wa hali ngumu (rejea 2Fal 3:26-27). Tena tunaambiwa mara kadhaa kwamba hata Waisraeli walitambika kafara za binadamu ingawa walikuwa wamekatazwa na sheria ya Mose kufanya hivyo (Lawi 20:1-5). Taz Isa 57:5 maelezo.]

¹⁴Kwa hiyo, Abrahamu akapaita mahali hapo, “Mwenyezi-Mungu hujalia.” Kama isemwavyo hata leo, “Katika mlima wa Mwenyezi-Mungu, watu hujaliwa.”

¹⁵Malaika wa Mwenyezi-Mungu akamwita Abrahamu mara ya pili kutoka mbinguni,

¹⁶akamwambia, “Mwenyezi-Mungu asema hivi: Nimeapa kwa nafsi yangu kwamba kwa kuwa umefanya hivi, wala hukuninyima mwanao wa pekee,

¹⁷hakika nitakubariki, na wazawa wako nitawazidisha kama nyota za mbinguni, na kama mchanga ufuoni mwa bahari. Wazawa wako wataimiliki miji ya adui zao.[#22:15-17 Kutokana na utii wa Abrahamu kwa Mungu, Mungu naye anarudia ile ahadi aliyompa (Mwa 12:2 maelezo; rejea Ebr 6:13-14; 11:12).]

¹⁸Kutokana na wazawa wako mataifa yote duniani yatabarikiwa kwa sababu wewe umeitii amri yangu.”[#22:18 Kuhusu ahadi hii taz Mwa 12:2-3 maelezo.]

¹⁹Basi, Abrahamu akawarudia wale watumishi wake, nao kwa pamoja wakaondoka, wakarudi Beer-sheba; Abrahamu akakaa huko Beer-sheba.

Watoto wa Nahori

²⁰Baada ya matukio hayo Abrahamu alipata habari kwamba Milka pia amemzalia Nahori, nduguye, watoto wa kiume:

²¹Usi mzaliwa wa kwanza, Buzi ndugu yake, Kemueli baba yake Aramu,

²²Kesedi, Hazo, Pildashi, Yidlafu na Bethueli.

²³Bethueli alimzaa Rebeka. Milka alimzalia Nahori, ndugu yake Abrahamu, watoto hao wanane.

²⁴Zaidi ya hayo, Reuma, suria wa Nahori, pia alimzalia watoto: Teba, Gahamu, Tahashi na Maaka.