Toba isiyo ya kweli

¹“‘Twendeni, tukamrudie Mwenyezi-Mungu![#6:1 Taz 2:7; 3:5, ingawa maneno haya huonesha haja ya toba, watu hawa hawakuwa na toba ya kweli. Taz 7:2,9. Wanatubu lakini hawajitambui. Ling 6:2 n.k. Waliamini kuwa Mungu wa Baali aliyekuwa anakufa na kufufuka. Mfano wa toba ya kweli. Taz Luka 15:18; 5:8, ling Zab 51:4 pia 2Kor 7:10.]

Yeye mwenyewe ameturarua,

lakini yeye mwenyewe atatuponya.

Yeye mwenyewe ametujeruhi,

lakini yeye mwenyewe atatibu majeraha yetu.

²Baada ya siku mbili, atatupa uhai tena,

naam, siku ya tatu atatufufua

ili tuweze kuishi pamoja naye.

³Basi tumtambue,

tujitahidi kumjua Mwenyezi-Mungu.

Kuja kwake ni hakika kama alfajiri,

yeye atatujia kama manyunyu,

kama mvua za masika ziinyweshayo ardhi.’”

⁴Lakini Mwenyezi-Mungu asema hivi:

“Nitakutendea nini ee Efraimu?

Nikufanyie nini ee Yuda?

Upendo wenu kwangu ni kama ukungu wa asubuhi,

kama umande unaotoweka upesi.

⁵Ndiyo maana nimewavamia kwa njia ya manabii,

nimewaangamiza kwa maneno yangu,

hukumu yangu huchomoza kama pambazuko.

⁶Maana ninachotaka kwenu ni upendo na si tambiko,[#6:6 Kuhusu msimamo wa manabii juu ya tambiko na sadaka rejea 1Sam 15:22; Zab 40:6-8; 51:17-19; Isa 1:10-17; Yer 6:19-20; Amo 5:21-24; Mika 6:6-8. Taz pia Mat 9:13 maelezo.]

Kumjua Mungu na si kutoa sadaka za kuteketezwa.

Uhalifu umeenea kote nchini

⁷“Lakini mlilivunja agano langu

kama mlivyofanya mjini Adamu;

huko walinikosea uaminifu.

⁸Gileadi ni mji wa waovu,[#6:8 Jina hili kwa jumla linataja eneo la milima kaskazini ambamo kulikuwa na mji uitwao Ramoth-gileadi ambao ulifana kwa ukatili. Yabesh-gileadi ulikuwa mji mwingine, mashariki ya mto Yordani.]

umetapakaa damu.

⁹Kama wanyang'anyi wamwoteavyo mtu njiani,

ndivyo na makuhani walivyojikusanya na kuvizia.

Wanaua watu njiani kuelekea Shekemu,

naam, wanatenda uovu kupindukia.

¹⁰Nimeona jambo la kuchukiza sana

miongoni mwa Waisraeli:

watu wa Efraimu wanakimbilia miungu mingine

naam, Waisraeli wamejitia unajisi.

¹¹Nawe Yuda hali kadhalika,

nimekupangia wakati utakapovuna adhabu.