Hotuba ya Holoferne

¹Baada ya ghasia zilizosababishwa na Akioro kwenye mkutano kutulia, Holoferne, jemadari wa jeshi la Ashuru, alimwambia Akioro, mbele ya wanajeshi wote wa kukodishwa kutoka pwani ya bahari ya Mediteranea na Wamoabu.[#6:1 Baadhi ya hati zinaongeza Waamoni.]

²“Akioro, wewe ni nani, na wanajeshi wa kukodishwa kutoka Efraimu, hata ujifanye nabii? Wewe ni nani kututabiria tusiende kupigana na watu wa Israeli ati kwa sababu Mungu wao atawalinda? Ni nani aliye mungu kama si Nebukadneza?[#6:2 Holoferne anamfikiria Akioro na askari wake kama wanajeshi wa kukodishwa wa Waisraeli na kwamba wameuzwa kwa Waisraeli.]

³Nebukadneza atapeleka wanajeshi wake na kuwatupilia mbali watu hao kutoka uso wa dunia. Mungu wao hataweza kuwaokoa. Sisi ambao ndio watumishi wa mfalme Nebukadneza tutawaangamiza mara moja. Hawawezi kusimama dhidi ya nguvu za jeshi letu.

⁴Tutawateketeza mara moja, milima yao itafurika damu yao na mashamba yao yatajaa maiti. Hawawezi kushindana na sisi. Mfalme Nebukadneza, bwana wa dunia yote ameagiza kuwa ni lazima kuwafagilia mbali, na maneno aliyoyasema hayawezi kuwa yasiyo na maana.

⁵“Lakini wewe Akioro uliyekodishwa na Waamoni, wewe ni msaliti. Hutaniona tena hadi hapo nitakapokuwa nimewaadhibu wale watoro kutoka nchi ya Misri.

⁶Baada ya hayo, wanajeshi wangu watakuua kwa upanga. Utakuwa mmoja wao wale watakaouawa.

⁷“Sasa, watu wangu watakupeleka milimani na kukuacha katika mmojawapo wa miji ya watu wa Israeli,

⁸nawe utafia huko pamoja na watu wengine.

⁹Usiwe na masikitiko ikiwa unafikiri kuwa hawatashindwa. Nimesema, hakuna neno langu lolote litakalokuwa halina maana.”

Akioro anapelekwa mjini Bethulia

¹⁰Basi, Holoferne akawaagiza watu wake waliokuwa wanamtumikia kwenye hema yake wamkamate Akioro na kumpeleka mjini Bethulia, wakamkabidhi kwa watu wa Israeli.

¹¹Wale watu wakamkamata Akioro, wakamtoa nje ya kambi na kumpeleka bondeni. Kutoka huko wakampeleka milimani kwenye chemchemi iliyokuwa karibu na mji wa Bethulia.

¹²Watu wa mjini walipowaona wale watu wanakaribia mjini, wakachukua silaha zao na kukimbilia mlimani. Kila mtu aliyetumia kombeo kama silaha akawa anawarushia mawe wanajeshi wa Holoferne. Hivyo, hao wanajeshi wakashindwa kupanda mlimani.

¹³Wakalazimika kujikinga ubavuni mwa mlima, ambapo walimfunga Akioro kamba. Kisha wakamwacha hapo, wakaenda zao kwa mkuu wao.

¹⁴Baadaye, Waisraeli waliposhuka kutoka mjini Bethulia walimfungua Akioro, wakampeleka mjini kwa maofisa wa mji.

¹⁵Wakuu wa wakati huo walikuwa Uzia, mwana wa Mika, kutoka kabila la Simeoni, Kabrisi mwana wa Gothonieli, na Karmisi mwana wa Melkieli.

¹⁶Hao maofisa wakawakusanya wazee wa mji, nao wanawake wote na vijana wakakimbilia mkutanoni. Akioro akaletwa mbele ya watu, na Uzia akaanza kumhoji.

¹⁷Akioro akawasimulia yote yaliyosemwa kwenye mkutano wa Holoferne kuhusu vita. Akawasimulia yale aliyosema yeye mwenyewe mbele ya viongozi wa Waashuru na jinsi Holoferne alivyojigamba angewatenda watu wa Israeli.

¹⁸Watu waliposikia hayo, walianguka chini na kumwabudu Mungu. Wakamlilia wakisema,

¹⁹“Ee Bwana, Mungu wa mbinguni, ona jinsi maadui zetu wanavyojigamba na jinsi wanavyokusudia kutudhili. Tuonee huruma sisi watu wako”.

²⁰Kisha, wakamthibitishia Akioro juu ya usalama wake na kumsifu sana kwa yote aliyotenda.

²¹Baada ya mkutano kumalizika, Uzia akampeleka Akioro nyumbani kwake ambako alimfanyia karamu pamoja na wazee wa mji. Usiku kucha wakamwomba Mungu wa Israeli awasaidie.