¹“Mtu ni mtoto tu wa mwanamke;[#14:1 Matumizi ya maneno haya hapa yana shabaha ya kuelezea hali dhaifu ya binadamu.]

huishi siku chache tena zilizojaa taabu.

²Huchanua kama ua, kisha hunyauka.

Hukimbia kama kivuli na kutoweka.

³Ee Mungu, kwa nini unajali hata kumwangalia

na kuanza kuhojiana naye?

⁴Nani awezaye kutoa kitu kisafi kutoka kitu kichafu?

Hakuna anayeweza.

⁵Siku za kuishi binadamu zimepimwa;

ee, Mungu umeipanga idadi ya miezi yake;

hawezi kupita kikomo ulichomwekea.

⁶Angalia pembeni basi, umwache;

ili apate kufurahia siku zake kama kibarua.

⁷Maana mti ukikatwa lipo tumaini la kuota,

waweza kuchipua tena.

⁸Japo mizizi yake itazeeka udongoni,

na shina lake kufia ardhini,

⁹lakini kwa harufu tu ya maji utachipua;

utatoa matawi kama chipukizi.

¹⁰Lakini mtu hufa na huo ndio mwisho wake.

Akisha toa roho anabakiwa na nini tena?

¹¹“Kama vile maji yakaukavyo ziwani,

na mto unavyokoma kutiririka,

¹²ndivyo anavyokufa mtu, wala haamki tena;[#14:12 Katika Agano la Kale jambo la kufufuka kwa wafu na maisha baada ya kifo halikuwa dhahiri, ila tu baadaye. Taz Zab 6:5; 88:10-12; 115:16-17; Isa 38:18. Uhakika wa jambo hili utadhihirika kikamilifu katika A.J. (Mat 13:43; 1Kor 15; Ufu 21—22). Lakini kabla ya A.J. wazo la maisha mapya pamoja na Mungu lilikuwako (taz Zab 16:10; 15; Dan 12:12-13).]

hataamka tena wala kugutuka,

hata hapo mbingu zitakapotoweka.

¹³“Laiti ungenificha kuzimu;

ungenificha hadi ghadhabu yako ipoe;

nao muda ulionipimia ukiisha ungenikumbuka.

¹⁴Je, mtu akifa anaweza kuishi tena?

Siku zangu zote za kazi ningekungoja

hadi wakati wa kufunguliwa ufike.

¹⁵Hapo ungeniita, nami ningeitika,

wakati ungetaka kuniona mimi kiumbe chako.

¹⁶Ndipo ungeweza kuzihesabu hatua zangu,

ungeacha kuzichunguza dhambi zangu.

¹⁷Makosa yangu yangefungiwa katika mfuko,

nawe ungeufunika uovu wangu.

¹⁸“Lakini milima huanguka

majabali hung'oka mahali pake.

¹⁹Mtiririko wa maji hula miamba,

mvua kubwa hufanya mmomonyoko wa ardhi.

Ndivyo nawe unavyoharibu tumaini la binadamu.

²⁰Wewe wamwangusha binadamu, naye akatoweka milele;

waubadilisha uso wake na kumtupilia mbali.

²¹Watoto wake wakiheshimika, yeye hana habari.

Wakiporomoshwa, yeye haoni kabisa.

²²Huhisi tu maumivu ya mwili wake,

na kuomboleza tu hali yake mbaya.”