Kuhusu talaka

¹Yesu alipomaliza kusema maneno hayo, alitoka Galilaya, akaenda Yudea, ng'ambo ya mto Yordani.[#19:1 Taz maelezo ya namna hii ya kusema katika Mat 7:28.; #19:1 Yaani upande wa mashariki wa mto Yordani.]

²Watu wengi walimfuata huko, naye akawaponya.

³Mafarisayo kadhaa walimjia, wakamwuliza kwa kumtega, “Je, ni halali mume kumpa talaka mkewe kwa kisa chochote?”[#19:3 Ionekanavyo swali lenyewe na jinsi lilivyowekwa linaonesha kulikuwa na mgawanyiko kuhusu namna ya kufafanua sheria ya Kumb 24:1.]

⁴Yesu akawajibu, “Je, hamkusoma katika Maandiko Matakatifu kwamba Mungu aliyemuumba mtu tangu mwanzo alimfanya mwanamume na mwanamke,

⁵na akasema: ‘Kwa sababu hiyo mwanamume atamwacha baba yake na mama yake, ataungana na mke wake, nao wawili watakuwa mwili mmoja?’

⁶Kwa hiyo, wao si wawili tena bali mwili mmoja. Basi, alichounganisha Mungu, binadamu asikitenganishe.”

⁷Lakini wao wakamwuliza, “Kwa nini basi, Mose alituagiza mwanamke apewe hati ya talaka na kuachwa?”

⁸Yesu akawajibu, “Mose aliwaruhusu kuwaacha wake zenu kwa sababu ya ugumu wa mioyo yenu.

⁹Lakini haikuwa hivyo tangu mwanzo. Basi nawaambieni, yeyote atakayemwacha mke wake isipokuwa kwa sababu ya uzinzi, akaoa mke mwingine, anazini.”[#19:9 Taz Mat 5:32 maelezo; rejea pia Luka 16:18. Taz pia Mal 2:13-16; Marko 10:11-12; 1Kor 7:10-13.]

¹⁰Wanafunzi wake wakamwambia, “Ikiwa mambo ya mume na mkewe ni hivyo, ni afadhali kutooa kabisa.”

¹¹Yesu akawaambia, “Si wote wanaoweza kulipokea fundisho hili, isipokuwa tu wale waliojaliwa na Mungu.

¹²Maana kuna sababu kadhaa za kutoweza kuoa: wengine ni kwa sababu wamezaliwa hivyo, wengine kwa sababu wamefanywa hivyo na watu, na wengine wameamua kutooa kwa ajili ya ufalme wa mbinguni. Awezaye kulipokea fundisho hili na alipokee.”[#19:12 Yahusu mazingira ya pekee ambayo yanawahusu watu fulani tu. Taz pia 1Kor 7:6-9.]

Yesu anawabariki watoto wadogo

¹³Kisha watu wakamletea Yesu watoto wadogo ili awawekee mikono na kuwaombea. Lakini wanafunzi wakawakemea.

¹⁴Yesu akasema, “Waacheni hao watoto waje kwangu, wala msiwazuie; maana ufalme wa mbinguni ni wa watu walio kama watoto hawa.”[#19:14 Kuhusu “watoto wadogo” taz maelezo ya Mat 18:3.]

¹⁵Basi, akawawekea mikono, kisha akaondoka mahali hapo.

Kijana tajiri

¹⁶Mtu mmoja alimjia Yesu, akamwuliza, “Mwalimu, nifanye kitu gani chema ili niupate uhai wa milele?”

¹⁷Yesu akamwambia, “Mbona unaniuliza kuhusu jambo jema? Kuna mmoja tu aliye mwema. Ukitaka kuingia katika uhai, shika amri.”

¹⁸Yule mtu akamwuliza, “Amri zipi?” Yesu akasema, “Usiue, Usizini, Usiibe, Usitoe ushahidi wa uongo,

¹⁹Waheshimu baba yako na mama yako; na, Mpende jirani yako kama unavyojipenda mwenyewe.”

²⁰Huyo kijana akamwambia, “Hayo yote nimeyazingatia; nifanye nini zaidi?”

²¹Yesu akamwambia, “Kama unapenda kuwa mkamilifu, nenda ukauze mali yako, uwape maskini fedha hiyo, nawe utakuwa na hazina mbinguni, kisha njoo unifuate.”[#19:21 Neno hili katika Mathayo latumika tu katika 5:48 ambapo latumiwa kuhusiana na jinsi ya kuwapenda jirani. Hapa, kuwa mkamilifu ni sawa na kutimiza kabisa matakwa ya Mungu ambayo yamo katika kumfuata Kristo. Taz Mat 5:48.]

²²Huyo kijana aliposikia hayo, akaenda zake akiwa mwenye huzuni, maana alikuwa na mali nyingi.

²³Hapo Yesu akawaambia wanafunzi wake, “Kweli nawaambieni itakuwa vigumu sana kwa tajiri kuingia katika ufalme wa mbinguni.[#19:23-29 Mwishoni mwa majibizano na huyo kijana tajiri, Yesu anawaambia wanafunzi wake kwamba ni vigumu kwa mtu tajiri kuingia katika ufalme wa mbinguni (aya 23-24). Wanafunzi walishangaa (aya 25) kwani walifikiri utajiri ni ishara ya kukubaliwa na Mungu. Katika aya ya 26 Yesu anakabili mshangao wa hao wanafunzi.]

²⁴Tena nawaambieni, ni rahisi zaidi kwa ngamia kupita katika tundu la sindano, kuliko kwa tajiri kuingia katika ufalme wa Mungu.”[#19:24 Msemo namna ya kitendawili kuelezea jambo lisilowezekana (aya 26).]

²⁵Wale wanafunzi waliposikia hivyo walishangaa sana, wakamwuliza, “Ni nani basi, awezaye kuokoka?”

²⁶Yesu akawatazama, akasema, “Kwa binadamu jambo hili haliwezekani, lakini kwa Mungu mambo yote huwezekana.”

²⁷Kisha Petro akasema, “Na sisi je? Tumeacha yote tukakufuata; tutapata nini basi?”

²⁸Yesu akawaambia, “Nawaambieni kweli, Mwana wa Mtu atakapoketi katika kiti chake cha enzi kitukufu katika ulimwengu mpya, nyinyi mlionifuata mtaketi katika viti kumi na viwili mkiyahukumu makabila kumi na mawili ya Israeli.

²⁹Na kila aliyeacha nyumba, au ndugu, au dada, au baba, au mama, au watoto, au mashamba, kwa ajili yangu, atapokea mara mia zaidi, na kupata uhai wa milele.

³⁰Lakini walio wa kwanza watakuwa wa mwisho, na walio wa mwisho watakuwa wa kwanza.