Wafanyakazi katika shamba la mizabibu

¹“Ufalme wa mbinguni unafanana na mtu mwenye shamba la mizabibu, ambaye alitoka asubuhi na mapema kuwaajiri wafanyakazi katika shamba lake.

²Akapatana nao kuwalipa fedha denari moja kwa siku, kisha akawapeleka katika shamba lake la mizabibu.[#20:2 Kiasi cha fedha alicholipwa kibarua kwa siku.]

³Akatoka mnamo saa tatu asubuhi, akaona watu wengine wamesimama sokoni, hawana kazi.

⁴Akawaambia, ‘Nendeni nanyi mkafanye kazi katika shamba la mizabibu, nami nitawapeni haki yenu.’

⁵Basi, wakaenda. Huyo mwenye shamba akatoka tena mnamo saa sita na saa tisa, akafanya vivyo hivyo.

⁶Hata mnamo saa kumi na moja jioni, akatoka tena; akakuta watu wengine wamesimama pale sokoni. Basi, akawauliza, ‘Mbona mmesimama hapa mchana kutwa bila kazi?’

⁷Wakamjibu: ‘Kwa sababu hakuna mtu aliyetuajiri.’ Naye akawaambia, ‘Nendeni nanyi mkafanye kazi katika shamba la mizabibu.’

⁸“Kulipokuchwa, huyo mwenye shamba alimwambia mtunza hazina wake, ‘Waite wafanyakazi ukawalipe mshahara wao, ukianzia na wale walioajiriwa mwisho, na kumalizia na wale wa kwanza.’

⁹Basi, wakaja wale walioajiriwa mnamo saa kumi na moja, wakapokea kila mmoja fedha dinari moja.

¹⁰Wale wa kwanza walipofika, walikuwa wanadhani watapewa zaidi; lakini hata wao wakapewa kila mmoja dinari moja.

¹¹Wakazipokea fedha zao, wakaanza kumnung'unikia yule bwana.

¹²Wakasema, ‘Watu hawa walioajiriwa mwisho walifanya kazi kwa muda wa saa moja tu, mbona umetutendea sawa na wao hali sisi tumevumilia kazi ngumu kutwa na jua kali?’

¹³“Hapo yule bwana akamjibu mmoja wao, ‘Rafiki, sikukupunja kitu! Je, hukupatana nami mshahara wa dinari moja?

¹⁴Chukua haki yako, uende zako. Napenda kumpa huyu wa mwisho sawa na wewe.

¹⁵Je, sina haki ya kufanya na mali yangu nipendavyo? Je, unaona kijicho kwa kuwa mimi ni mwema?’”[#20:15 Neno kwa neno: “una jicho baya” taz Mat 6:22-23.]

¹⁶Yesu akamaliza kwa kusema, “Hivyo, walio wa mwisho watakuwa wa kwanza na wa kwanza watakuwa wa mwisho.”

Yesu anasema mara ya tatu kuhusu kifo na ufufuo wake

¹⁷Yesu alipokuwa anakwenda juu Yerusalemu, aliwachukua wale wanafunzi kumi na wawili faraghani, na njiani akawaambia,

¹⁸“Sikilizeni! Tunakwenda Yerusalemu, na huko Mwana wa Mtu atakabidhiwa kwa makuhani wakuu na waalimu wa sheria, nao watamhukumu auawe.

¹⁹Watamkabidhi kwa watu wa mataifa mengine ili adhihakiwe, apigwe viboko na kusulubiwa; lakini siku ya tatu atafufuliwa.”[#20:19 Hapa yahusu watawala wa Kiroma.]

Ombi la mama wa Yakobo na Yohane

²⁰Hapo mama yao wana wa Zebedayo alimjia Yesu pamoja na wanawe, akapiga magoti mbele yake na kumwomba kitu.[#20:20 Yaani, Yakobo na Yohane (rejea Mat 4:21).]

²¹Yesu akamwuliza, “Unataka nini?” Huyo mama akamwambia, “Ahidi kwamba katika ufalme wako, hawa wanangu wawili watakaa mmoja upande wako wa kulia na mwingine upande wako wa kushoto.”[#20:21 Katika Marko 10:35 inatajwa kuwa walioomba moja kwa moja ni Yakobo na Yohane, wana wa Zebedayo (taz 1:19,29; 3:17; 5:37; 9:2; 13:3; 14:33).; #20:21 Wanafunzi walidhani kwamba Yesu angeanzisha utawala wa kidunia ambao ungekuwa na nyadhifa na nafasi mbalimbali za heshima.]

²²Yesu akajibu, “Hamjui mnaomba nini. Je, mnaweza kunywa kikombe nitakachokunywa mimi?” Wakamjibu, “Tunaweza.”[#20:22 Msemo “kunywa kikombe” una maana ya kushiriki mateso au majaribu magumu (taz maelezo ya 26:39).]

²³Yesu akawaambia, “Kweli mtakunywa kikombe changu, lakini kuketi kulia au kushoto kwangu si kazi yangu kupanga; jambo hilo watapewa wale waliowekewa tayari na Baba yangu.”[#20:23 Yakobo aliuawa na Herode Agripa mwaka wa 42 B.K. (Mate 12:1-3).]

²⁴Wale wanafunzi wengine kumi waliposikia hayo, wakawakasirikia hao ndugu wawili.

²⁵Hivyo Yesu akawaita, akawaambia, “Mnajua kwamba watawala wa mataifa hutawala watu wao kwa mabavu, na wakuu hao huwamiliki watu wao.

²⁶Lakini kwenu isiwe hivyo, ila anayetaka kuwa mkuu kati yenu sharti awe mtumishi wa wote;

²⁷na anayetaka kuwa wa kwanza kati yenu sharti awe mtumishi wenu.

²⁸Jinsi hiyohiyo, Mwana wa Mtu hakuja kutumikiwa, bali kutumikia na kutoa maisha yake kuwa fidia ya watu wengi.”[#20:28 Luka 22:27; Yoh 13:12-15; Fil 2:5-7.; #20:28 Yawezekana kwamba hapa mwandishi anagusia Isa 52:13—53:12 mahali ambapo yahusu mateso ya Mtumishi wa Bwana. Taz Marko 10:45 maelezo. Rejea pia Yoh 10:11; Efe 1:7; Kol 1:13-14; 1Tim 2:5-6; Tito 2:14; Ebr 2:9; 1Pet 1:18-19.]

Yesu anawaponya vipofu wawili

²⁹Yesu alipokuwa anaondoka mjini Yeriko, umati wa watu ulimfuata.

³⁰Basi, kulikuwa na vipofu wawili wameketi kando ya njia, na waliposikia kwamba Yesu alikuwa anapitia hapo, walipaza sauti: “Bwana, Mwana wa Daudi, utuhurumie!”[#20:30 Jina la sifa ambalo linatumiwa pia na wale vipofu wawili ambao Yesu alikuwa amewaponya (9:27). Katika Marko (10:46) na Luka (18:35) tuna kipofu mmoja tu.]

³¹Ule umati wa watu ukawakemea na kuwaambia wanyamaze. Lakini wao wakazidi kupaza sauti: “Bwana, Mwana wa Daudi, utuhurumie!”

³²Yesu akasimama, akawaita na kuwauliza, “Mnataka niwafanyie nini?”

³³Wakamjibu, “Bwana, tunaomba macho yetu yafumbuliwe.”

³⁴Basi, Yesu akawaonea huruma, akawagusa macho yao, na papo hapo wakaweza kuona, wakamfuata.