Kufufuka kwa Yesu

¹Baada ya Sabato, karibu na mapambazuko ya siku ile ya Jumapili, Maria Magdalene na yule Maria mwingine walikwenda kutazama lile kaburi.

²Ghafla kukatokea tetemeko kubwa la nchi; malaika wa Bwana alishuka kutoka mbinguni, akalivingirisha lile jiwe, akalikalia.

³Alionekana kama umeme na mavazi yake yalikuwa meupe kama theluji.

⁴Walinzi wa lile kaburi wakatetemeka kwa hofu kubwa, hata wakawa kama wamekufa.

⁵Lakini yule malaika akawaambia wale wanawake, “Nyinyi msiogope! Najua kwamba mnamtafuta Yesu aliyesulubiwa.

⁶Hayupo hapa maana amefufuka kama alivyosema. Njoni mkaone mahali alipokuwa amelala.[#28:6 Mat 16:21; 17:23; 20:19 (rejea Luka 24:6-7)]

⁷Basi, nendeni upesi mkawaambie wanafunzi wake kwamba amefufuka kutoka kwa wafu, na sasa anawatangulieni kule Galilaya; huko mtamwona. Haya, mimi nimekwisha waambieni.”

⁸Wakiwa wenye hofu na furaha kubwa, hao wanawake walitoka upesi kaburini, wakakimbia kwenda kuwaambia wanafunzi wake.

⁹Mara, Yesu akakutana nao, akasema: “Salamu.” Hao wanawake wakamwendea, wakapiga magoti mbele yake, wakashika miguu yake.

¹⁰Kisha Yesu akawaambia, “Msiogope! Nendeni mkawaambie ndugu zangu waende Galilaya, na huko wataniona.”[#28:10 Bwana Yesu aliyefufuka anawaita wafuasi wake “ndugu zake” (rejea Mat 12:48-50; Yoh 20:17).]

Taarifa ya walinzi wa kaburi

¹¹Wale wanawake walipokuwa wanakwenda zao, baadhi ya walinzi wa lile kaburi walikwenda mjini kutoa taarifa kwa makuhani wakuu juu ya mambo yote yaliyotukia.

¹²Basi, wakakutana pamoja na wazee, na baada ya kushauriana, wakawapa wale askari kiasi kikubwa cha fedha

¹³wakisema, “Nyinyi mtasema hivi: ‘Wanafunzi wake walikuja usiku, wakamwiba sisi tukiwa tumelala.’

¹⁴Na kama mkuu wa mkoa akijua jambo hili, sisi tutasema naye na kuhakikisha kuwa nyinyi hamtapata matatizo.”

¹⁵Wale walinzi wakazichukua zile fedha, wakafanya kama walivyofundishwa. Habari hiyo imeenea kati ya Wayahudi mpaka leo.[#28:15 Yaani wakati Injili hii ilipoandikwa.]

Yesu anawatokea wanafunzi wake

¹⁶Wale wanafunzi kumi na mmoja walikwenda Galilaya kwenye ule mlima aliowaagizia Yesu.

¹⁷Walipomwona wakamwabudu, ingawa wengine walikuwa na mashaka.

¹⁸Yesu akaja karibu, akawaambia, “Nimepewa mamlaka yote mbinguni na duniani.

¹⁹Nendeni basi, mkawafanye watu wa mataifa yote wawe wanafunzi wangu, mkiwabatiza kwa jina la Baba, na la Mwana, na la Roho Mtakatifu.[#28:19 Katika aya hii majina ya Baba, Mwana na Roho Mtakatifu yanaunganishwa katika msemo mmoja ambao ulianza kutumiwa katika Kanisa kama maneno rasmi ya Ubatizo. Taz hasa 2Kor 13:13 maelezo. Inamaanisha kuweko uhusiano wa pekee (taz 1Kor 1:13; 10:2) na hivyo kuweka uhusiano wa pekee kati ya huyo mbatizwa na Baba, Mwana na Roho Mtakatifu.]

²⁰Wafundisheni kushika maagizo yote niliyowapeni. Nami nipo pamoja nanyi siku zote; naam, mpaka mwisho wa nyakati.”