Wimbo wa ushindi

¹Msifuni Mwenyezi-Mungu!

Mwimbieni Mwenyezi-Mungu wimbo mpya;

msifuni katika kusanyiko la waaminifu!

²Furahi ee Israeli kwa sababu ya Muumba wako,

wakazi wa Siyoni shangilieni kwa sababu ya Mfalme wenu.

³Lisifuni jina lake kwa ngoma,

mwimbieni kwa ngoma na zeze.

⁴Maana Mwenyezi-Mungu hupendezwa na watu wake;

yeye huwapamba wanyonge kwa ushindi.

⁵Watu waaminifu wafurahi kwa fahari;

washangilie hata walalapo.

⁶Wabubujike sifa kuu za Mungu,

na panga zenye makali kuwili mikononi mwao,

⁷wawalipe kisasi watu wa mataifa,

wawaadhibu watu wasiomjua Mungu;

⁸wawafunge wafalme wao kwa minyororo,

na viongozi wao kwa pingu za chuma,

⁹kusudi watekeleze adhabu iliyoamriwa![#149:6-9 Hapa sifa na kelele za shangwe na panga vinaonekana kama vita vya kulipiza kisasi. Ufafanuzi wa aya hizi si dhahiri. Katika Agano Jipya picha ya namna hiyo haitajwi na waandishi wake ila tu nguvu ya Mungu inayofanya kazi miongoni mwao (2Kor 10:3-5; Efe 6:12-17; Ebr 4:12) na kuwawezesha kuwa mfano hai wa upendo wake Mungu.]

Hiyo ndiyo fahari ya waaminifu wa Mungu.

Msifuni Mwenyezi-Mungu!