Malaika na kitabu kidogo

¹Kisha, nikamwona malaika mwingine mwenye nguvu akishuka kutoka mbinguni. Alikuwa amevikwa wingu na upinde wa mvua kichwani mwake. Uso wake ulikuwa kama jua, na miguu yake ilikuwa kama nguzo za moto.[#10:1—11:14 Muundo wa maandishi ya 10:1-11 unafanana na ule wa Eze 1—3. Sehemu hii na ifuatayo, yaani 11:1-14 inatumika kushikilia sehemu iliyotangulia na inayofuata, yaani kati ya tukio la tarumbeta ya sita na ya saba.]

²Mikononi mwake alishika kitabu kidogo kimefunguliwa. Aliweka mguu wake wa kulia juu ya bahari na wa kushoto juu ya nchi kavu,

³na kuita kwa sauti kubwa kama ya mngurumo wa simba. Alipopaza sauti, ngurumo saba ziliitikia kwa kishindo.[#10:3-4 Hapa yaonekana kwamba Mungu ndiye anayehusika katika maelezo hayo; yaani mwandishi anasema ni malaika kuepa kumtaja Mungu moja kwa moja (Zab 29:3-9). Katika Ufunuo kwa jumla ngurumo huhusu aghalabu hasira ya Mungu (Rejea Ufu 8:5; 11:19; 16:18).]

⁴Na hizo ngurumo saba ziliposema, mimi nikataka kuandika. Lakini nikasikia sauti kutoka mbinguni: “Maneno ya ngurumo hizo saba ni siri; usiyaandike!”

⁵Kisha, yule malaika niliyemwona akisimama juu ya bahari na juu ya nchi kavu akainua mkono wake wa kulia juu mbinguni,

⁶akaapa kwa jina la Mungu aishiye milele na milele, Mungu aliyeumba mbingu na vyote vilivyomo, bahari na vyote vilivyomo, dunia na vyote vilivyomo. Akasema, “Wakati wa kusubiri zaidi umekwisha![#10:6 Au: Wakati umekwisha (Dan 12:6-7).]

⁷Lakini wakati yule malaika wa saba atakapotoa sauti ya tarumbeta yake, Mungu atakamilisha mpango wake wa siri kama alivyowatangazia watumishi wake manabii.”

⁸Kisha, ile sauti niliyokuwa nimeisikia kutoka mbinguni pale awali ikasema nami tena: “Nenda ukakichukue kile kitabu kilichofunguliwa, kilicho mkononi mwa malaika asimamaye juu ya bahari na juu ya nchi kavu.”[#10:8-11 Rejea 10:2. Ni kitabu kidogo kilicho mviringo (taz Ufu 5:1); kisa hiki chafanana na yaliyompata Ezekieli (Eze 2:7-34) ila hapa badala ya utamu tunapata uchungu ambao wahusu si tu uchungu wa adhabu bali pia uchungu ambao mjumbe atapaswa kuteseka na kufa kwa ajili ya ushuhuda wake.]

⁹Basi, nikamwendea huyo malaika, nikamwambia anipe hicho kitabu kidogo. Naye akaniambia, “Kichukue, ukile. Kinywani mwako kitakuwa kitamu kama asali, lakini tumboni kitakuwa kichungu!”

¹⁰Basi, nikakichukua kitabu hicho kidogo kutoka mkononi mwa huyo malaika, nikakila. Nacho kilikuwa kitamu kinywani mwangu kama asali, lakini nilipokimeza kikawa kichungu tumboni mwangu.

¹¹Kisha, nikaambiwa, “Inakubidi tena kutoa unabii kuhusu watu wengi, mataifa, watu wa lugha nyingi na wafalme!”