Ndoto hazina maana

¹Mtu mjinga huwa na matumaini ya bure na ya uongo;

ndoto humpa mpumbavu mabawa ya kuruka.

²Kama mtu anayejaribu kushika kivuli na kufukuza upepo

ndivyo alivyo mtu anayeamini ndoto.

³Ndoto ni kama kioo,

sura inayoukabili uso.

⁴Ni kitu gani kiwezacho kutakaswa na uchafu?

Je, ukweli waweza kupatikana kwa uongo?

⁵Kupiga bao, ramli na ndoto ni upuuzi;

akili huwa na mawazo kama ya mama anayejifungua.

⁶Usizitie maanani ndoto

isipokuwa kama zimetoka kwa Mungu Mkuu.

⁷Maana ndoto zimewadanganya wengi,

na wale wanaozitumaini wameaibishwa.

⁸Sheria ni kamilifu bila udanganyifu huo,

nayo hekima ni kamilifu kwa mtu mwaminifu:

Kusafiri

⁹Mtu aliyesafiri sana anajua mengi,

na mtu mzoefu wa mengi anajua anachoongea.

¹⁰Mtu ambaye hajakumbana na matatizo hajui mengi,

¹¹lakini aliyesafiri sana amejipatia maarifa.

¹²Katika safari zangu nimeona mengi;

ninajua mengi kuliko niwezavyo kuyaeleza.

¹³Mara nyingi nimekuwa katika hatari ya kifo,

lakini nimechopoka kwa sababu ya maarifa haya.

Kumcha Bwana

¹⁴Wamchao Bwana wataishi,

¹⁵maana tumaini lao liko kwake yeye anayewaokoa.

¹⁶Amchaye Bwana hatakuwa na woga,

hawezi kuogopa kwani Bwana ndiye tumaini lake.

¹⁷Heri mtu ambaye anamcha Bwana!

¹⁸Maana anamtazamia yeye amtegemeze.

¹⁹Bwana huwaangalia kwa wema wale wampendao.

Yeye ni ngao imara na tegemeo lao thabiti;

yeye ni kinga yao mbali na upepo mkali,

ni kivuli chao wakati wa jua kali;

yeye huwalinda wasijikwae,

huwasaidia wasianguke.

²⁰Bwana huijaza mioyo furaha,

na huyatia macho mwanga.

Yeye huwapa watu afya, uhai na baraka

Tambiko

²¹Mtu akitoa sadaka kitu kilichopatikana kwa udanganyifu

tambiko yake hiyo ina dosari.

Zawadi za wasiotii sheria hazikubaliki.

²²Mungu Mkuu hakubali sadaka za wasiomcha,

wala wingi wa sadaka hauwezi kuleta upatanisho.

²³Mtu atoaye sadaka kitu alichomnyang'anya maskini,

ni sawa na mtu anayemuua mtoto mbele ya baba yake.

²⁴Chakula cha maskini ni uhai wake;

yeyote anayempora maskini chakula ni muuaji.

²⁵Kumnyang'anya jirani chakula chake ni kumuua;

na kumnyang'anya mwajiriwa mshahara wake ni kuua.

²⁶Mtu mmoja akijenga na mwingine akibomoa,

je, wamefanikiwa chochote ila kutoa jasho?

²⁷Mmoja akimwomba Mungu na mwingine akilaani,

je, Bwana ataisikiliza sauti ya nani?

²⁸Mtu akitawadha baada ya kushika maiti, akaishika tena,

je, amepata faida gani kwa kutawadha kwake?

²⁹Hivyo mtu akifunga kwa ajili ya dhambi zake,

kisha akaenda kufanya mambo yaleyale,

ni nani atakayesikiliza sala yake?

Tena amepata faida gani kwa kujinyenyekesha?