¹Mimi ni ua la Sharoni,

ni yungiyungi ya bondeni.

²Kama yungiyungi kati ya michongoma,

ndivyo alivyo mpenzi wangu kati ya wasichana.

³Kama mtofaa kati ya miti ya msituni,[#2:3 Hili ni jina la tunda mwitu lakini ni lipi hasa haijulikani. Matunda ya mtofaa yalifikiriwa kuwa na kitu cha kuhimiza mapenzi.]

ndivyo alivyo mpenzi wangu kati ya wavulana.

Nafurahia kuketi chini ya kivuli chake,

na tunda lake tamu sana kwangu.

⁴Alinichukua hadi ukumbi wa karamu,[#2:4 Neno kwa neno: “nyumba ya divai” divai ikiwa ni mfano wa furaha ya mapenzi.]

akatweka bendera ya mapenzi juu yangu.

⁵Nishibishe na zabibu kavu,

niburudishe kwa matofaa,

maana naugua kwa mapenzi!

⁶Mkono wake wa kushoto chini ya kichwa changu,

mkono wake wa kulia wanikumbatia.

⁷Nawasihi enyi wanawake wa Yerusalemu,

kama walivyo paa au swala wa porini,

msiyachochee wala kuyaamsha mapenzi,

hadi hapo wakati wake utakapofika.

Shairi la pili

⁸Hiyo ni sauti ya mpenzi wangu,

yuaja mbio,

anaruka milima,

vilima anavipita kasi!

⁹Mpenzi wangu ni kama paa,

ni kama swala mchanga.

Amesimama karibu na ukuta wetu,

achungulia dirishani,

atazama kimiani.

¹⁰Mpenzi wangu aniambia:

“Inuka basi, ewe mpenzi wangu, unipendezaye,

njoo twende zetu.

¹¹Tazama, majira ya baridi yamepita,[#2:11 Msimu wa baridi katika Mashariki ya Kati ulikuwa wakati wa mvua. Mwishoni mwa msimu huo huanza wakati wa joto na majani na maua kuchanua; ni wakati ambapo hua waliokuwa wamehama wakati wa baridi wanarudi tena.]

nazo mvua zimekwisha koma;

¹²maua yamechanua kila mahali.

Wakati wa kuimba umefika;

sauti ya hua yasikika mashambani mwetu.

¹³Mitini imeanza kuzaa;

na mizabibu imechanua;

inatoa harufu nzuri.

Njoo, basi, ewe mpenzi wangu unipendezaye,

njoo twende.

¹⁴Ee hua wangu, uliyejificha miambani.

Hebu niuone uso wako,

hebu niisikie sauti yako,

maana sauti yako yapendeza na uso wako wavutia.

¹⁵“Tukamatieni mbweha,[#2:15 Matumizi ya mbweha hapa si dhahiri. Huenda ni mfano wa vijana wanaume ambao wanachukuliwa kuwa tishio kwa bustani ya mizabibu ambayo hapa ni mfano wa vijana wanawake.]

wale mbweha wadogowadogo,

wanaoiharibu mizabibu yetu inayochanua.”

¹⁶Mpenzi wangu ni wangu, nami ni wake.

Yeye hulisha kondoo wake penye yungiyungi,

¹⁷hadi hapo jua linapochomoza

na vivuli kutoweka.

Rudi kama paa mpenzi wangu,

kama swala mdogo juu ya milima ya Betheri.