¹Ewe mwanamke uliye mzuri sana;

amekwenda wapi huyo mpenzi wako?

Ameelekea wapi mpenzi wako

ili tupate kushirikiana nawe katika kumtafuta?

²Mpenzi wangu amekwenda bustanini mwake,

mahali ambapo rihani hustawi.

Yeye analisha kondoo wake

na kukusanya yungiyungi.

³Mimi ni wake mpenzi wangu, naye ni wangu;

yeye huwalisha kondoo wake penye yungiyungi.

Shairi la tano

⁴Mpenzi wangu, wewe u mzuri kama Tirza,[#6:4 Huu ulikuwa mji mkuu wa kwanza wa utawala wa kaskazini chini ya Yeroboamu (931-910 K.K.).]

wapendeza kama Yerusalemu,

unatisha kama jeshi lenye bendera.

⁵Hebu tazama kando tafadhali;

ukinitazama nahangaika.

Nywele zako ni kama kundi la mbuzi,

wateremkao chini ya milima ya Gileadi.

⁶Meno yako kama kundi la kondoo majike

wanaoteremka baada ya kuogeshwa.

Kila mmoja amezaa mapacha,

na hakuna yeyote aliyefiwa.

⁷Mashavu yako ni kama nusu mbili za komamanga,

nyuma ya shela lako.

⁸Wapo malkia sitini, masuria themanini,[#6:8 Labda yahusu wake wengi wa Solomoni na masuria wake, ingawaje idadi hii ni ndogo kuliko ile ya 1Fal 11:3.]

na wasichana wasiohesabika!

⁹Hua wangu, mzuri wangu, ni mmoja tu,

na ni kipenzi cha mama yake;

yeye ni wa pekee kwa mama yake.

Wasichana humtazama na kumwita heri,

nao malkia na masuria huziimba sifa zake.

¹⁰Nani huyu atazamaye kama pambazuko?

Mzuri kama mwezi, mwangavu kama jua,

na anatisha kama jeshi lenye bendera.

¹¹Nimeingia katika bustani ya milozi

kutazama machipuko ya bondeni,

kuona kama mizabibu imechanua,

na mikomamanga imechanua maua.

¹²Bila kutazamia, mpenzi wangu,

akanitia katika gari la mkuu.

¹³Rudi, rudi ewe msichana wa Mshulami.[#6:13 Kiebrania ni “Shulammite” na huenda lilitumika hapa kukumbusha juu ya Solomoni, au hata uzuri wa yule Abishagi kutoka Shunemu (1Fal 1:3-4).]

Rudi, rudi tupate kukutazama.

Mbona mwataka kunitazama miye Mshulami

kana kwamba mnatazama ngoma

kati ya majeshi mawili?