¹Afadhali kukosa watoto na kuwa mnyofu,

maana unyofu wako utakumbukwa milele,

na unatambuliwa na Mungu na wanaadamu.

²Unyofu wako utawapa watu fursa ya kuuiga,

na usipokuwapo watu watasikitika kuukosa.

Siku zote unapita umevikwa taji ya ushindi,

mshindi katika mashindano ya tuzo zisizo na dosari.

³Lakini wazawa wengi wa wasiomcha Mungu hawafai kitu,

watoto wao haramu hawawezi kutoa mizizi

wala kuwa na msingi imara.

⁴Na hata wakitoa matawi ni ya muda tu,

bila mizizi imara watatikiswa na upepo

na kwa nguvu za dhoruba watang'olewa.

⁵Matawi yao yatavunjika kabla ya kukomaa,

matunda yao hayatafaa chochote,

hayataiva yaliwe, ni bure kabisa.

⁶Watoto waliozaliwa haramu

watashuhudia juu ya uovu wa wazazi wao wakati wa hukumu.

⁷Lakini mtu mwema, hata akifa kijana, atapata pumziko.

⁸Uzee unaheshimika sio tu kwa urefu wa maisha,

wala haupimwi kwa wingi wa miaka.

⁹Hekima na maisha mema ni ishara ya kukomaa;

hivyo huja pamoja na uzee.

¹⁰Palikuwa na mtu aliyempendeza Mungu naye Mungu akampenda,

wakati alipokuwa anaishi kati ya wenye dhambi, Mungu alimchukua,

¹¹akamhamisha ili uovu usibadili busara yake

udanganyifu usiweze kuipotosha roho yake.

¹²Mvuto wa uovu huzuia wema usionekane;

hata mtu asiweze kuona jambo jema mbele yake;

upepo wa tamaa waweza kumpotosha mtu mnyofu.

¹³Huyo alifikia ukamilifu kwa muda mfupi tu,

akawa ametimiza miaka mingi.

¹⁴Maisha yake yalimpendeza Bwana,

naye akaharakisha kumtoa kati ya uovu.

Watu waliona jambo hilo lakini hawakuelewa;

hawakuweza kutambua jambo hili moja:

¹⁵Kwamba Mungu ni mwema na mwenye huruma kwa watu wake;

huwalinda hao aliowateua kuwa wake.

¹⁶Mtu mwema ambaye amekwisha kufa

atawahukumu wasiomcha Mungu walio hai.

Kijana aliyefikia hali ya ukamilifu upesi,

atamwaibisha mzee mkongwe aliye dhalimu.

¹⁷Watu waovu watamwona mwenye busara anakufa

lakini hawataelewa matakwa ya Bwana juu yake,

wala kwa sababu gani alimweka salama.

¹⁸Watadhihaki kifo cha mtu mwema

lakini Bwana atawacheka.

Wao watakapokufa hawatazikwa kwa heshima;

na hata wafu watawapuuza milele.

¹⁹Bwana atawatupa chini na kuwanyamazisha;

atawatikisa mpaka misingi yao,

watakuwa magofu matupu na ukiwa

wataaibika kwa uchungu.

Hakuna mtu atakayewakumbuka tena.

Tofauti ya wema na waovu wakati wa hukumu

²⁰Waovu wataingia hukumuni kwa hofu na woga dhambi zao zitakapohesabiwa,

matendo yao maovu yatawahukumu mbele ya macho yao.