Mfalme ni sawa na watu wengine

¹Mimi ni binadamu ambaye hufa, sawa na wengine,

mzawa wa yule mtu wa kwanza aliyeumbwa kutoka kwa udongo.

Nilitengenezwa nikawa mwili tumboni mwa mama yangu

²kwa muda upatao miezi tisa,

baada ya kuwekwa pamoja kwa mbegu ya mtu

na kwa furaha ya ndoa.

³Nami nilipozaliwa, nilianza kupumua hewa ya kawaida

nilitua juu ya ardhi yenye asili moja nami,

na sauti ya kwanza niliyotoa ilikuwa kilio kama wengine.

⁴Nilivikwa nguo za kitoto, nikatunzwa kwa uangalifu.

⁵Hakuna mfalme yeyote aliyeanza kuishi kwa namna nyingine;

⁶maana wote huingia duniani kwa njia moja na hutoka humo kwa njia moja.

Solomoni anathamini Hekima

⁷Basi, niliomba, nami nikapewa maarifa;[#7:7 1Fal 3:5-15; Hek 9:1-18.]

nilimwomba Mungu, nayo roho ya Hekima ikanijia.

⁸Nilimthamini Hekima kuliko viti vya enzi na mamlaka,

nikaona utajiri si kitu ukilinganishwa naye.

⁹Sikumfananisha na johari yenye thamani kubwa,

maana dhahabu yote duniani ni kama mchanga,

na fedha ni kama udongo tu mbele yake.

¹⁰Nilimpenda Hekima kuliko afya na urembo,

nilimpendelea kuliko mwanga wa jua,

maana mwangaza wake haufifii kamwe.

¹¹Mema yote yalinijia pamoja na Hekima;

mikononi mwake nilipata mali isiyohesabika.

¹²Niliyafurahia hayo yote maana aliniletea Hekima;

lakini sikujua kwamba Hekima ndiye mama wa hayo yote.

¹³Nilijifunza bila hila na kufunza bila lalamiko;

utajiri wake sikuwaficha watu.

¹⁴Hekima ni hazina isiyomalizika kwa watu;

wanaopata Hekima hujipatia urafiki na Mungu;

yeye huthibitisha yote wanayojifunza kutoka kwake.

¹⁵Namwomba Mungu anijalie kunena kadiri atakavyo,

na mawazo yangu yastahili yale niliyojifunza.

Mungu mwenyewe ndiye kiongozi wa Hekima;

yeye huwakosoa wale walio na busara.

¹⁶Sisi tumo mikononi mwake, pamoja na maneno yetu;

naam, sisi, maarifa yetu na ufundi wetu.

¹⁷Yeye ndiye aliyenijalia ujuzi sahihi wa nguvu za maumbile:

ulimwengu ulitengenezwa kwa kitu gani,

na maunganisho ya maumbile yake,

¹⁸mianzo ya nyakati, miisho yake na katikati yake,

zamu za vituo vya jua na mabadiliko ya majira,

¹⁹mfululizo wa miaka, na makundi ya nyota.

²⁰Amenifundisha juu ya asili ya viumbe hai,

hisia za wanyama wa porini,

nguvu za roho,

uwezo wa akili ya binadamu,

mimea mbalimbali na matumizi ya mizizi yake.

²¹Nilijifunza mambo yaliyofichika na yaliyo dhahiri,

maana Hekima, mratibu wa mambo yote, alinifundisha.

Maumbile Yya Hekima

²²Katika Hekima kuna roho ya maarifa na utakatifu;

roho ya pekee inayojidhihirisha kwa namna nyingi,

nyepesi sana na yenye kumudu kwa urahisi;

dhahiri, safi, wazi, na isiyoweza kuharibiwa;

yenye kupenda wema, hodari na isiyoshindwa na chochote;

²³yenye ukarimu na yenye kupenda watu;

roho thabiti, yenye kuaminika na isiyo na wasiwasi;

yenye nguvu na uwezo wa kuona yote;

yenye kupenya kila chenye akili, kilicho safi

na chenye werevu wa hali ya juu.

²⁴Hekima huenda kwa urahisi kuliko mwendo wowote;

ni safi hivyo kwamba hupenya na kuenea ndani ya kila kitu.

²⁵Hekima ni pumzi ya nguvu ya Mungu,

mmiminiko safi wa utukufu wa Mungu Mwenye Nguvu;

hivyo, chochote kilicho najisi hakiwezi kumwingia.

²⁶Hekima ni mng'ao wa mwanga wa milele,

kioo safi cha matendo ya Mungu

na mfano wa wema wake.

²⁷Ingawa Hekima ni mmoja aweza kutenda chochote,

habadiliki, ingawa hufanya upya kila kitu.

Katika vizazi vyote huingia rohoni mwa watu watakatifu

na kuwafanya marafiki wa Mungu na manabii.

²⁸Maana Mungu humpenda tu mtu akaaye na Hekima.

²⁹Hekima ni mzuri kuliko jua

na apita makundi yote ya nyota;

ni bora kuliko mwanga wa mchana,

³⁰maana baada ya mchana huja usiku,

lakini uovu hauwezi kumshinda Hekima.