Sala ya kuomba Hekima

¹“Ee Mungu wa wazee wetu, Bwana mwenye huruma!

Kwa neno lako uliumba vitu vyote.

²Kwa Hekima yako ulimuumba mtu

avitawale viumbe ulivyoumba,

³aumiliki ulimwengu kwa utakatifu na uadilifu,

na kutekeleza haki kwa moyo mnyofu.

⁴Nakuomba unipe Hekima anayekaa kando ya kiti chako cha enzi;

wala usinikatae mimi miongoni mwa watumishi wako.

⁵Mimi ni mtumishi wako, mtoto wa mjakazi wako,

mtu dhaifu asiye wa siku nyingi,

wala sina nguvu ya kuelewa hukumu na sheria.

⁶Hata kama mtu yeyote akiwa mkamilifu kiasi gani,

bila Hekima atokaye kwako atakuwa bure tu.

⁷Ulinichagua mimi kuwa mfalme wa watu wako,

hakimu wa wanao wa kiume na wa kike.

⁸Uliniagiza nijenge hekalu juu ya mlima wako mtakatifu,

na madhabahu katika mji uliochagua kuwa makao yako,

mfano wa hema takatifu uliyoifanya tangu awali.

⁹Hekima yupo pamoja nawe; naye ajua matendo yako;

alikuwa pamoja nawe wakati ulipoumba ulimwengu.

Hekima anajua yanayokupendeza,

na yaliyo sawa kulingana na amri zako.

¹⁰Umpeleke, basi, kutoka mbingu tukufu,

kutoka kiti chako cha enzi kitukufu,

ili akae nami na kufanya kazi pamoja nami,

nipate kujifunza yale yanayokupendeza.

¹¹Maana Hekima anajua na anaelewa mambo yote,

naye ataniongoza kwa busara katika matendo yangu;

kwa utukufu wake atanilinda.

¹²Hapo matendo yangu yatakubalika.

Nitawahukumu watu wako kwa haki

na kustahili kuwa katika kiti cha enzi cha baba yangu.

¹³“Nani awezaye kuijua nia ya Mungu?

Au nani awezaye kufahamu matakwa yake?

¹⁴Akili ya binadamu haifai kitu

na elimu yetu huelekea kupotosha,

¹⁵kwa maana miili yetu yenye kufa hugandamiza roho zetu.

Mwili uliotengenezwa kwa udongo, ni mzigo kwa akili timamu.

¹⁶Twabahatisha tu kupambanua juu ya mambo ya duniani;

na yale yaliyo karibu nasi ni jasho kuyafahamu.

Nani basi, atakayefaulu kujifunza yaliyoko mbinguni?

¹⁷Hakuna aliyeweza kujifunza mashauri yako, ee Mungu, isipokuwa kwanza umempa Hekima

na kumpelekea roho yako kutoka juu.

¹⁸Ndivyo njia za watu duniani zilivyowekwa sawa,

wakajifunza yanayokupendeza

na kuokolewa na Hekima.”