Hazina ya mbinguni katika vyombo vya udongo

¹Kwa hiyo, kwa kuwa tuna huduma hii kwa rehema za Mungu, hatukati tamaa.

²Lakini tumekataa mambo ya siri na ya aibu; hatufuati njia za udanganyifu, wala kulichanganya neno la Mungu na uongo. Kinyume cha hayo, tunadhihirisha kweli waziwazi na kujitambulisha wenyewe kwenye dhamiri ya kila mtu mbele za Mungu.

³Hata nayo Injili yetu kama imetiwa utaji, ni kwa wale tu wanaopotea.

⁴Kwa habari yao, mungu wa dunia hii amepofusha akili za wasioamini, ili wasione nuru ya Injili ya utukufu wa Kristo, aliye sura ya Mungu.

⁵Kwa maana hatujihubiri sisi wenyewe, ila tunamhubiri Yesu Kristo kuwa ni Bwana, na sisi ni watumishi wenu kwa ajili ya Yesu.

⁶Kwa kuwa Mungu, yeye aliyesema, “Nuru na ingʼae gizani,” ameifanya nuru yake ingʼae mioyoni mwetu ili kutupatia nuru ya maarifa ya utukufu wa Mungu katika uso wa Kristo.[#4:6 Mwa 1:3]

⁷Lakini tunayo hazina hii katika vyombo vya udongo, ili ijulikane wazi kwamba uwezo huu wa ajabu unatoka kwa Mungu, wala si kwetu.

⁸Twataabika kila upande lakini hatuangamizwi; twaona wasiwasi lakini hatukati tamaa;

⁹twateswa lakini hatuachwi; twatupwa chini lakini hatupondwi.

¹⁰Siku zote twachukua katika mwili kufa kwake Yesu ili uzima wa Yesu uweze kudhihirishwa katika miili yetu.

¹¹Kwa maana sisi tulio hai siku zote tumetolewa tufe kwa ajili ya Yesu, ili uzima wake upate kudhihirishwa katika mwili wetu upatikanao na mauti.

¹²Hivyo basi, mauti inatenda kazi ndani yetu, bali uzima unatenda kazi ndani yenu.

¹³Imeandikwa, “Niliamini, kwa hiyo nimesema.” Kwa roho yule yule wa imani pia tuliamini na hivyo tunasema,[#4:13 Za 116:10]

¹⁴kwa sababu tunajua kwamba yeye aliyemfufua Bwana Yesu kutoka kwa wafu atatufufua sisi pia pamoja na Yesu na kutuleta sisi pamoja nanyi mbele zake.

¹⁵Haya yote ni kwa faida yenu, ili neema ile inavyowafikia watu wengi zaidi na zaidi ipate kusababisha shukrani nyingi kwa utukufu wa Mungu.

¹⁶Kwa hiyo, hatukati tamaa. Ingawa utu wetu wa nje unachakaa, utu wetu wa ndani unafanywa upya siku kwa siku.

¹⁷Kwa maana dhiki yetu nyepesi iliyo ya kitambo inatutayarisha kwa ajili ya utukufu wa milele unaozidi kuwa mwingi kupita kiasi.

¹⁸Kwa hivyo hatuangalii yale yanayoonekana, bali yale yasiyoonekana. Kwa maana yale yanayoonekana ni ya kitambo tu, bali yale yasiyoonekana ni ya milele.