Vyakula vilivyo najisi na vilivyo safi

¹Ninyi ni watoto wa Bwana Mungu wenu. Msijichanje ama kujinyoa upara kwenye paji la uso kwa ajili ya aliyekufa,

²kwa kuwa ninyi ni taifa takatifu kwa Bwana Mungu wenu. Bwana amewachagua ninyi kuwa taifa lake la pekee kutoka mataifa yote duniani.

³Msile kitu chochote ambacho ni machukizo.

⁴Hawa ndio wanyama mtakaokula: ngʼombe, kondoo, mbuzi,

⁵kulungu, paa, kongoni, paa mweupe, mbuzi-mwitu, pofu na kondoo wa mlimani.

⁶Mnaweza kumla mnyama yeyote mwenye kwato zilizogawanyika mara mbili, pia yule anayecheua.

⁷Hata hivyo, miongoni mwa wale wanaocheua au wale walio na kwato zilizogawanyika kamwe msile ngamia, sungura na pelele. Iwapo wanacheua, lakini hawana kwato zilizogawanyika; ni najisi kwenu.

⁸Nguruwe pia ni najisi; ingawa ana kwato zilizogawanyika, hacheui. Msile nyama yake wala kugusa mzoga wake.

⁹Katika viumbe hai vyote viishivyo kwenye maji, mnaweza kula yeyote aliye na mapezi na magamba.

¹⁰Lakini chochote kisicho na mapezi na magamba msile; kwenu ni najisi.

¹¹Mnaweza kula ndege yeyote aliye safi.

¹²Lakini wafuatao msiwale: tai, furukombe, kipungu,

¹³kengewa mwekundu, kengewa mweusi, mwewe wa aina yoyote,

¹⁴kunguru wa aina yoyote,

¹⁵mbuni, kiruka-njia, dudumizi, kipanga wa aina yoyote,

¹⁶bundi, mumbi, bundi mkubwa,

¹⁷mwari, nderi, mnandi,

¹⁸korongo, koikoi wa aina yoyote, hudihudi na popo.

¹⁹Wadudu wote warukao kwa makundi ni najisi kwenu, msiwale.

²⁰Lakini viumbe vyote vyenye mabawa vilivyo safi mwaweza kula.

²¹Msile kitu chochote mtakachokuta kimekufa. Mnaweza kumpa mgeni yeyote anayeishi katika mojawapo ya miji yenu, naye anaweza kula au mnaweza kumuuzia mtu wa nchi nyingine. Lakini ninyi ni watu watakatifu kwa Bwana Mungu wenu.

Msitokose mwana-mbuzi katika maziwa ya mama yake.

Zaka

²²Hakikisheni mmetenga sehemu ya kumi ya mazao yote ya mashamba yenu kila mwaka.

²³Mtakula zaka za nafaka yenu, divai mpya, mafuta na wazaliwa wa kwanza wa makundi yenu ya ngʼombe na ya kondoo na mbuzi mbele za Bwana Mungu wenu pale mahali atakapopachagua kama maskani kwa ajili ya Jina lake, ili mpate kujifunza kumheshimu Bwana Mungu wenu daima.

²⁴Lakini ikiwa mahali pale ni mbali sana nanyi mmebarikiwa na Bwana Mungu wenu na hamwezi kubeba zaka yenu (kwa sababu mahali pale Bwana atakapopachagua kuliweka Jina lake ni mbali sana),

²⁵basi badilisheni zaka yenu kuwa fedha, mkaichukue hiyo fedha mwende nayo mahali Bwana Mungu wenu atakapopachagua.

²⁶Tumieni hiyo fedha kununua chochote ukitakacho: ngʼombe, kondoo, divai au kinywaji chochote chenye chachu au chochote mnachotaka. Kisha ninyi na watu wa nyumbani mwenu mtaila mbele za Bwana Mungu wenu na kufurahi.

²⁷Msiache kuwajali Walawi wanaoishi katika miji yenu, kwa kuwa hao hawana shamba wala urithi wao wenyewe.

²⁸Mwishoni mwa kila mwaka wa tatu, leteni zaka zote za mazao ya miaka ile na uyahifadhi kwenye miji yenu,

²⁹ili Walawi (ambao hawana mashamba wala urithi wao wenyewe) na wageni, yatima na wajane wanaoishi kwenye miji yenu wapate kuja kula na kushiba, ili Bwana Mungu wenu apate kuwabariki ninyi katika kazi zote za mikono yenu.