Madhabahu katika Mlima Ebali

¹Musa na wazee wa Israeli wakawaagiza watu: “Yashikeni maagizo haya yote ninayowaagiza leo.

²Mtakapokuwa mmevuka Mto Yordani na kuingia katika nchi anayowapa Bwana Mungu wenu, msimamishe mawe makubwa na myapake chokaa.

³Andikeni juu yake maneno yote ya sheria hii wakati mtakapokuwa mmevuka na kuingia katika nchi anayowapa Bwana Mungu wenu, nchi inayotiririka maziwa na asali, kama vile Bwana , Mungu wa baba zenu, alivyowaahidi.

⁴Mtakapokuwa mmevuka Yordani, simamisheni mawe haya juu ya Mlima Ebali, kama ninavyowaagiza leo, na myapake chokaa.

⁵Huko mjengeeni Bwana Mungu wenu madhabahu, madhabahu ya mawe. Msitumie kifaa chochote cha chuma juu yake.

⁶Jengeni madhabahu ya Bwana Mungu wenu kwa mawe ya shambani, na mtoe sadaka za kuteketezwa juu yake kwa Bwana Mungu wenu.

⁷Toeni sadaka za amani juu yake, mkizila na kufurahia mbele za Bwana Mungu wenu.

⁸Nanyi mtaandika maneno yote ya sheria hii kwa wazi sana juu ya mawe haya ambayo mmesimamisha.”

Laana kutoka Mlima Ebali

⁹Kisha Musa na makuhani, ambao ni Walawi, wakawaambia Israeli wote, “Nyamaza ee Israeli, sikiliza! Sasa umekuwa taifa la Bwana Mungu wako.

¹⁰Mtii Bwana Mungu wako, na kufuata amri zake na maagizo ninayokupa leo.”

¹¹Siku ile ile Musa akawaagiza watu:

¹²Mtakapovuka Mto Yordani, makabila haya yatasimama juu ya Mlima Gerizimu kubariki watu: Simeoni, Lawi, Yuda, Isakari, Yusufu na Benyamini.

¹³Makabila haya yatasimama juu ya Mlima Ebali kwa kutamka laana: Reubeni, Gadi, Asheri, Zabuloni, Dani na Naftali.

¹⁴Nao Walawi watawasomea watu wote wa Israeli kwa sauti kubwa:

¹⁵“Alaaniwe mtu afanyaye sanamu ya kuchonga au mwenye kusubu sanamu, kitu ambacho ni chukizo kwa Bwana , kazi ya mikono ya fundi stadi, na kuisimamisha kwa siri.”

¹⁶“Alaaniwe mtu amdharauye baba yake na mama yake.”

¹⁷“Alaaniwe mtu asogezaye jiwe la mpaka wa jirani yake.”

¹⁸“Alaaniwe mtu ampotoshaye kipofu njiani.”

¹⁹“Alaaniwe mtu apotoshaye haki ya mgeni, yatima au mjane.”

²⁰“Alaaniwe mtu akutanaye kimwili na mke wa baba yake, kwa maana anadharau malazi ya baba yake.”

²¹“Alaaniwe mtu akutanaye kimwili na mnyama yeyote.”

²²“Alaaniwe mtu akutanaye kimwili na dada yake, binti ya baba yake au binti ya mama yake.”

²³“Alaaniwe mtu akutanaye kimwili na mama mkwe wake.”

²⁴“Alaaniwe mtu amuuaye jirani yake kwa siri.”

²⁵“Alaaniwe mtu apokeaye rushwa ili kumuua mtu asiye na hatia.”

²⁶“Alaaniwe mtu yule ambaye hatashikilia maneno ya sheria hii kwa kuyatekeleza.”